ଯାନ୍ତ୍ରିକ ତ୍ରୁଟି ଯୋଗୁଁ ମୁମ୍ବାଇ ଫେରିଲା ଗୋଆ ଯାଉଥିବା ଗୋ ଫାଷ୍ଟ ବିମାନ

ମଝି ଆକାଶରେ ଯାନ୍ତ୍ରିକ ତ୍ରୁଟି । ମୁମ୍ବାଇ ଫେରିଲା ଗୋଆ ଯାଉଥିବା ଗୋ ଫ୍ଲାଷ୍ଟ ବିମାନ । ଅଧିକ ପଢନ୍ତୁ

ମୁମ୍ବାଇ: ମଝି ଆକାଶରେ ଯାନ୍ତ୍ରିକ ତ୍ରୁଟି ଯୋଗୁଁ ମୁମ୍ବାଇ ଫେରିଲା ଗୋଆ ଯାଉଥିବା ଗୋ ଫ୍ଲାଷ୍ଟ ବିମାନ । ବୁଧବାର ରାତିରେ ବିମାନଟି ମୁମ୍ବାଇ ବିମାନ ବନ୍ଦରରୁ ଗୋଆ ଅଭିମୁଖେ ଉଡାଣ ଭରିଥିଲା । ମାତ୍ର ଯାନ୍ତ୍ରିକ ତ୍ରୁଟି ସମ୍ପର୍କରେ ଜଣାପଡିବା ପରେ ପାଇଲଟ ଅଧାବାଟରୁ ବିମାନକୁ ଫେରାଇ ଆଣି ମୁମ୍ବାଇରେ ଅବତରଣ କରାଇଥିଲେ(Goa Bound Go First Flight Returns To Mumbai) । ଏହି ବିମାନରେ ମୋଟ ୧୮୨ ଜଣ ଯାତ୍ରୀ ଥିଲେ । ଏନେଇ ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ(DGCA) ପକ୍ଷରୁ ସୂଚନା ଦିଆଯାଇଛି ।

ସୂଚନା ମୁତାବକ, ଗୋ ଫାଷ୍ଟର G8-371 ବିମାନରେ ଏହି ଯାନ୍ତ୍ରିକ ତ୍ରୁଟି ଦେଖାଦେଇଥିଲା । ବୁଧବାର ରାତିରେ ବିମାନଟି ମୁମ୍ବାଇରୁ ଗୋଆ ଯାଉଥିବା ବେଳେ ମଝି ଆକାଶରେ ଏଥିରେ ତ୍ରୁଟି ଥିବା ଜାଣି ପାଇଲଟ ପୁଣି ମୁମ୍ବାଇକୁ ଫେରି ଆସିଥିଲେ । ଏହାପରେ ଆଉ ଏକ ବିମାନ ଯୋଗେ ଯାତ୍ରୀଙ୍କୁ ଗୋଆ ନିଆଯାଇଥିଲା । ଏହି ଅସୁବିଧା ପାଇଁ ସମ୍ପୃକ୍ତ ଏୟାରଲାଇନ୍ସ ପକ୍ଷରୁ ଦୁଃଖ ପ୍ରକାଶ କରାଯାଇଛି । ତେବେ ବିମାନରେ ଯାନ୍ତ୍ରିକ ତ୍ରୁଟି ଦେଖାଦେବା କିଛି ନୂଆ କଥା ନୁହେଁ । ପୂର୍ବରୁ ଇଣ୍ଡିଗୋ ଠାରୁ ନେଇ ଭିସ୍ତାରା ଯାଏଁ ଅନେକ ବିମାନରେ ମଝି ଆକାଶରେ ଯାନ୍ତ୍ରିକ ତ୍ରୁଟି ଯୋଗୁଁ ଏହାର ଜରୁରୀ ଅବତରଣ କରିଛି ।

କିଛି ଦିନ ତଳେ କେରଳରୁ ଦୁବାଇ ଯାଇଥିବା ଏୟାର ଇଣ୍ଡିଆ ଏକ୍ସପ୍ରେସ ବିମାନରୁ ଏକ ସାପ ଉଦ୍ଧାର ହୋଇଥିଲା । ବିମାନଟି ଦୁବାଇ ବିମାନ ବନ୍ଦରରେ ଅବତରଣ କରିବା ପରେ ସେଥିରେ ଏକ ସାପ ଥିବା ଜଣାପଡିଥିଲା ।