ପାଟନା: ଗଙ୍ଗା ନଦୀରେ ଅଘଟଣ । ନଦୀକୁ ଗାଧୋଇବାକୁ ଯାଇଥିବା ବେଳେ ବୁଡି ଗଲେ ୪ ନାବାଳକ । ଏଭଳି ଅଭାବନୀୟ ଘଟଣା ଘଟିଛି ବିହାର ପାଟନାର LCT ଘାଟ ଗଙ୍ଗା ନଦୀରେ । ଗତକାଲି ଦ୍ବିପ୍ରହର ସମୟରେ ଏହି ଘଟଣା ଘଟିଥିବା ସୂଚନା ମିଳିଛି ।
ସୂଚନା ଅନୁଯାୟୀ, ଗତକାଲି ୬ଜଣ ନାବାଳକ ବୁଦ୍ଧ କଲୋନୀ ପୋଲିସ ଷ୍ଟେସନ ଅନ୍ତର୍ଗତ LCT ଘାଟକ କ୍ରିକେଟ ଖେଳିବାକୁ ଯାଇଥିଲେ । ଖେଳିସାରିବା ପରେ ସେମାନଙ୍କ ମଧ୍ୟରୁ ୫ ଜଣ ନାବାଳକ ଗଙ୍ଗା ନଦୀରେ ଗାଧୋଇବା ପାଇଁ ଯାଇଥିଲେ । ତେବେ ଗାଧୋଇବା ସମୟରେ ହଠାତ ଜଣେ ବୁଡିଯିବା ପରେ ତାଙ୍କୁ ବଞ୍ଚାଇବାକୁ ଯାଇ ଆଉ ତିନି ଜଣ ବୁଡିଯାଇଥିଲେ । କିନ୍ତୁ ଜଣେ ନାବାଳକ ପହଁରା ଶିଖିଥିବାରୁ ନିଜ ଜୀବନ ଫେରିପାଇଥିଲେ । ଏନେଇ ଖବର ପାଇଁ ଘଟଣାସ୍ଥଳରେ ଉଦ୍ଧାରକାରୀ ଦଳ ପହଞ୍ଚି ସର୍ଚ୍ଚ ଅପରେସନ୍ ଆରମ୍ଭ କରି ତିନୋଟି ମୃତଦେହକୁ ଉଦ୍ଧାର କରିବାରେ ସଫଳ ହୋଇଥିଲେ । କିନ୍ତୁ ଅନ୍ୟ ଜଣଙ୍କ ମୃତଦେହ ଏପର୍ଯ୍ୟନ୍ତ ମିଳିପାରି ନାହିଁ । ଏହି ଘଟଣା ଦିନ ୧୧ଟା ୩୦ ମଧ୍ୟରେ ଘଟିଥିବା ନେଇ ବୁଦ୍ଧ କଲୋନୀ SHO ନିହାର ଭୂଷଣ କହିଛନ୍ତି ।
