ପାଟନା: ବିହାରରେ ଦୀର୍ଘ ଦିନର ଟଣାଓଟରା ପରେ ଶେଷରେ ମଙ୍ଗଳବାର ହୋଇଛି ନୀତିଶ କୁମାର ମନ୍ତ୍ରୀମଣ୍ଡଳର ବିସ୍ତାର । ମୋଟ ୧୭ ଜଣ ମନ୍ତ୍ରୀଙ୍କୁ ଶପଥ ଗ୍ରହଣ କରାଇଛନ୍ତି ରାଜ୍ୟପାଳ ଫଗୁ ଚୌହାନ । ଶପଥ ନେଇଥିବା ମନ୍ତ୍ରୀଙ୍କ ମଧ୍ୟରେ ବିଜେପିରୁ ୯ ଓ ଜେଡିୟୁରୁ ୮ ଜଣ ସାମିଲ ଅଛନ୍ତି ।
ବିଜେପି ପକ୍ଷରୁ ବିଧାନପରିଷଦ ସଦସ୍ୟ ଶାହନୱାଜ ହୁସେନ ଓ ଦିବଙ୍ଗତ ଅଭିନେତା ସୁଶାନ୍ତ ସିଂହ ରାଜପୁତଙ୍କ ଭାଇ ନୀରଜ ସିଂହ ବବଲୁଙ୍କୁ ମନ୍ତ୍ରୀମଣ୍ଡଳରେ ସାମିଲ କରାଯାଇଛି ।
ଯୁବ ଚେହେରାକୁ ଗୁରୁତ୍ବ
ଗୋଟିଏ ପକ୍ଷରେ ବିଜେପି ଯୁବ ଚେହେରାଙ୍କୁ ଗୁରୁତ୍ବ ଦେଇଥିବା ବେଳେ ଜେଡିୟୁ ଅନୁଭବୀ ଓ ଯୁବ ଉଭୟର ତାଳମେଳ କରିବାକୁ ପ୍ରୟାସ କରିଛି । ସଂଖ୍ୟାଲଘୁ ଚେହେରା ଭାବେ ବହୁଜନ ସମାଜ ପାର୍ଟିରୁ ଆସିଥିବା ଜମା ଖାନଙ୍କୁ ମନ୍ତ୍ରୀ କରିଛି ଜେଡିୟୁ । ସେପଟେ ବିଜେପି ମଧ୍ୟ ଶାହନାୱାଜ ହୁସେନଙ୍କୁ ମନ୍ତ୍ରୀ ପଦରେ ବସାଇଛି ।
ବିଜେପି କୋଟାରୁ ମନ୍ତ୍ରୀ
ନୀତିଶ କ୍ୟାବିନେଟରେ ବିଜେପି ପକ୍ଷରୁ ଶାହନୱାଜ ହୁସେନଙ୍କ ସମେତ ସମ୍ରାଟ ଚୌଧୁରୀ, ସୁଭାଷ ସିଂହ, ଆଲୋକ ରଞ୍ଜନ ଝା, ପ୍ରମୋଦ କୁମାର, ଜନକରାମ, ନାରାୟଣ ପ୍ରସାଦ, ନିତିନ ନବୀନ, ନୀରଜ ସିଂହ ବବଲୁ ମନ୍ତ୍ରୀ ହୋଇଛନ୍ତି ।
ଜେଡିୟୁ କୋଟାରୁ ମନ୍ତ୍ରୀ
ସେପଟେ ଜେଡିୟୁ ପକ୍ଷରୁ ପୂର୍ବତନ ମନ୍ତ୍ରୀ ଶ୍ରବଣ କୁମାରଙ୍କୁ ପୂନର୍ବାର ମନ୍ତ୍ରୀ କରାଯାଇଛି । ଏହା ସମେତ ଲେସି ସିଂହ, ସଞ୍ଜୟ ଝା, ମଦନ ସାହନୀ ମଧ୍ୟ ମୁଖ୍ୟମନ୍ତ୍ରୀଙ୍କ ସହଯୋଗୀ ଭାବରେ ମନ୍ତ୍ରୀମଣ୍ଡଳରେ ସାମିଲ ହୋଇଛନ୍ତି । ସେହିପରି ନିର୍ଦଳୀୟ ସୁମିତ କୁମାର ସିଂହ, ଜୟନ୍ତ ରାଜ ଓ ସୁନୀଲ କୁମାର ମଧ୍ୟ ନେଇଛନ୍ତି ମନ୍ତ୍ରୀ ପଦର ଶପଥ ।
ମନ୍ତ୍ରୀମଣ୍ଡଳ ବିସ୍ତାରରେ ଏନଡିଏରେ ସାମିଲ ହିନ୍ଦୁସ୍ତାନୀ ଆୱାମ ମୋର୍ଚ୍ଚା ଓ ବିକାଶଶୀଳ ଇନସାନ ପାର୍ଟିରୁ କାହାକୁ ମନ୍ତ୍ରୀ କରାଯାଇନାହିଁ ।
