ନୂଆଦିଲ୍ଲୀ: ସର୍ବୋଚ୍ଚ କୋର୍ଟଙ୍କ ସାମ୍ବିଧାନିକ ଖଣ୍ଡପୀଠକୁ ଗଲା ରାଜଧାନୀ ଦିଲ୍ଲୀରେ ପ୍ରଶାସନିକ ସେବା ନିୟନ୍ତ୍ରଣ ପାଇଁ କେନ୍ଦ୍ର ସରକାର ଜାରି କରିଥିବା ଅଧ୍ୟାଦେଶ ମାମଲା । ଆଜି ଏହି ମାମଲା ପ୍ରଧାନ ବିଚାରପତି ଜଷ୍ଟିସ ଡି.ଓ୍ବାଇ ଚନ୍ଦ୍ରଚୂଡ଼ଙ୍କ ଅଧ୍ୟକ୍ଷତାରେ ଗଠିତ ତିନିଜଣିଆ ଖଣ୍ଡପୀଠରେ ହୋଇଥିଲା । ପ୍ରଧାନ ବିଚାରପତି କହିଥିଲେ,"ଆମେ ଏହି ମାମଲାକୁ ସାମ୍ବିଧାନିକ ଖଣ୍ଡପୀଠକୁ ସ୍ଥାନାନ୍ତର କରୁଛୁ ।" ଆଜି ଶୁଣାଣିରେ ପ୍ରଧାନ ବିଚାରପତି ଚନ୍ଦ୍ରଚୂଡ଼ଙ୍କ ସହ ଜଷ୍ଟିସ ପି.ଏସ ନରସିଂହ୍ମା ଓ ଜଷ୍ଟିସ ମନୋଜ ମିଶ୍ର ମଧ୍ୟ ରହିଥିଲେ ।
ଚଳିତ ମାସ(ଜୁଲାଇ) 17 ତାରିଖରେ ଏହି ମାମଲାର ପ୍ରଥମ ଶୁଣାଣି କରିଥିଲେ ସର୍ବୋଚ୍ଚ କୋର୍ଟ । ମାମଲାରେ ଅଧିକ ତର୍ଜମାର ଆବଶ୍ୟକତା ଅନୁଭବ କରି କୋର୍ଟ ଏହାକୁ ବୃହତ୍ତର ବା ସାମ୍ବିଧାନିକ ଖଣ୍ଡପୀଠକୁ ପଠାଇବା ଲାଗି କହିଥିଲେ । କୋର୍ଟ ଅନୁଭବ କରିଥିଲେ, ଦିଲ୍ଲୀ ସରକାରଙ୍କ ଅଧୀନରୁ ପ୍ରଶାସନିକ ସେବା ନିୟନ୍ତ୍ରଣକୁ ପୃଥକ କରିବା ପାଇଁ କେନ୍ଦ୍ର ସରକାର ଧାରା 239-AA ଓ କ୍ଲଜ-7ର କ୍ଷମତା ଉପଯୋଗ କରି ଏହି ସଂଶୋଧିତ ନିଷ୍ପତ୍ତି ଗ୍ରହଣ କରିଛି । ଏଥିପାଇଁ ଏକ ସଂଶୋଧିତ ଅଧ୍ୟାଦେଶ ମଧ୍ୟ ଜାରି କରିଛି କେନ୍ଦ୍ର । ତେଣୁ ଏହି ମାମଲାରେ ସାମ୍ବଧାନିକ ଦିଗ କ’ଣ ରହିଛି, ତାର ତର୍ଜମା ଆବଶ୍ୟକତା । ସର୍ବୋଚ୍ଚ କୋର୍ଟ ଏହି ମାମଲାକୁ ସାମ୍ବିଧାନିକ ଖଣ୍ଡପୀଠକୁ ପଠାଯିବାର ଆବଶ୍ୟକତା ଥିବା 17 ତାରିଖ ଶୁଣାଣିରେ କହିବା ପରେ ଆଜି ମାମଲାକୁ ହସ୍ତାନ୍ତର କରାଯାଇଛି । ଖୁବଶୀଘ୍ର 5 ଜଣିଆ ସାମ୍ବିଧାନିକ ଖଣ୍ଡପୀଠ ଏହି ମାମଲାର ଶୁଣାଣି ଆରମ୍ଭ କରିବେ ।
ପୂର୍ବରୁ ଏହି ମାମଲାରେ ସର୍ବୋଚ୍ଚ କୋର୍ଟ ଦିଲ୍ଲୀ ସରକାରଙ୍କ ସପକ୍ଷରେ ରାୟ ଦେଇଥିଲେ । ଦିଲ୍ଲୀରେ ଏକ ନିର୍ବାଚିତ ସରକାର ରହିଛି । ତେଣୁ କେବଳ ଅଧିକୃତ ପ୍ରସଙ୍ଗ ବ୍ୟତୀତ କେନ୍ଦ୍ର ସରକାର ବା ତାଙ୍କ ପ୍ରତିିନିଧି ଉପରାଜ୍ୟପାଳ ସମସ୍ତ ପ୍ରସଙ୍ଗରେ ହସ୍ତକ୍ଷେପ କରିବା ଅନୁଚିତ । ତେଣୁ ପ୍ରଶାସନିକ ଅଧିକାରୀଙ୍କ ନିଯୁକ୍ତି ଓ ବଦଳି ଦିଲ୍ଲୀର ନିର୍ବାଚିତ ସରକାର କରିବେ ବୋଲି କୋର୍ଟ କହିଥିଲେ । ମାତ୍ର ଏହାର ଗୋଟିଏ ଦିନ ପରେ କେନ୍ଦ୍ର ସରକାର ଅଧ୍ୟାଦେଶ ଜାରି କରି ଏହି ପ୍ରକ୍ରିୟା ପାଇଁ ଏକ ପ୍ରାଧିକରଣ ଗଠନ କରିବାର ବ୍ୟବସ୍ଥା କରିଥିଲା । ଏହି ପ୍ରାଧିକରଣରେ ମୁଖ୍ୟମନ୍ତ୍ରୀ, ମୁଖ୍ୟ ଶାସନ ସଚିବ ଓ ଗୃହ ସଚିବ ସଦସ୍ୟ ରହିବେ । ହେଲେ ଚୂଡ଼ାନ୍ତ କ୍ଷମତା ଦିଲ୍ଲୀ ଉପରାଜ୍ୟପାଳଙ୍କ ପାଖରେ ରହିବା ନେଇ ବ୍ୟବସ୍ଥା ରଖାଯାଇଥିଲା । ଯାହାକୁ ଚ୍ୟାଲେଞ୍ଜ କରି ଦିଲ୍ଲୀ ସରକାର ସର୍ବୋଚ୍ଚ କୋର୍ଟରେ ଦ୍ବାରସ୍ଥ ହୋଇଥିଲା ।
ଆଜି ଆବେଦନକାରୀ ଦିଲ୍ଲୀ ସରକାରଙ୍କ ପକ୍ଷରୁ ବରିଷ୍ଠ ଆଇନଜୀବୀ ଅଭିଶେକ ମନୁ ସିଙ୍ଘଭୀ ପକ୍ଷ ରଖିଥିବା ବେଳେ ଦିଲ୍ଲୀ ଉପରାଜ୍ୟପାଳଙ୍କ ପକ୍ଷରୁ ବରିଷ୍ଠ ଆଇନଜୀବୀ ହରିଶ ସାଲଭେ ପକ୍ଷ ରଖିଥିଲେ । ଅନ୍ୟପଟେ ଆଜିଠାରୁ ସଂସଦର ମୌସୁମୀ ଅଧିବେଶନ ଆରମ୍ଭ ହୋଇଛି । 23 ଦିନର ଏହି ଅଧିବେଶନର ପ୍ରାୟ 31 ବିଲ୍ ଆସିବାକୁ ଥିବା ବେଳେ ଏହି ଦିଲ୍ଲୀ ଅଧ୍ୟାଦେଶ ବିଲ୍ ମଧ୍ୟ ଆଗତ ହେବ । ଯାହାକୁ କଂଗ୍ରେସ ସମେତ ଏକାଧିକ ବିରୋଧୀ ରାଜନୈତିକ ଦଳ ବିରୋଧ କରିବା ନେଇ ସଙ୍କେତ ଦେବା ସହ ଦିଲ୍ଲୀ ମୁଖ୍ୟମନ୍ତ୍ରୀ କେଜ୍ରିଓ୍ବାଲଙ୍କୁ ସମର୍ଥନ ଦେଇସାରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
