ନୂଆଦିଲ୍ଲୀ: ଉତ୍ତର ପ୍ରଦେଶ ବିଧାନସଭା ନିର୍ବାଚନର ପ୍ରଥମ ପର୍ଯ୍ୟାୟ ମତଦାନର ଗୋଟିଏ ଦିନ ପୂର୍ବରୁ ଖବର ସରବରାହ ସଂସ୍ଥା ANI କୁ ସାକ୍ଷାତକାର ଦେଇଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ତେବେ ଉକ୍ତ ସାକ୍ଷାତକାରକୁ ନେଇ ପ୍ରଶ୍ନ ଉଠାଇଲା କଂଗ୍ରେସ । ଫେବୃଆରୀ 10ରେ ପ୍ରଧାନମନ୍ତ୍ରୀଙ୍କ ସାକ୍ଷାତକାର ଭାରତୀୟ ନିର୍ବାଚନ କମିଶନଙ୍କ ଦ୍ବାରା ଜାରି କରାଯାଇଥିବା ନିର୍ବାଚନ ଆଚରଣ ବିଧିର ସମ୍ପୂର୍ଣ୍ଣ ଉଲଙ୍ଘନ ବୋଲି କହିଛନ୍ତି ରାଜ୍ୟସଭା ସଦସ୍ୟ ତଥା କଂଗ୍ରେସ ମୁଖପାତ୍ର ଶକ୍ତିସିନ୍ ଗୋହିଲ ।
ଇଟିଭି ଭାରତ ସହ ସ୍ବତନ୍ତ୍ର ଆଲୋଚନା ବେଳେ ଗୋହିଲ କହିଛନ୍ତି, 2017 ଗୁଜୁରାଟ ବିଧାନସଭା ନିର୍ବାଚନରେ କଂଗ୍ରେସ ନେତା ରାହୁଲ ଗାନ୍ଧୀ କିଛି ଗଣମାଧ୍ୟମକୁ ସାକ୍ଷାତକାର ଦେଇଥିବା ବେଳେ ଏହାକୁ ଆଚରଣ ବିଧିର ଉଲଂଙ୍ଘନ ବୋଲି ବିଚାର କରି ନିର୍ବାଚନ ଆୟୋଗ କାରଣ ଦର୍ଶାଅ ନୋଟିସ ଜାରି କରିଥିଲେ । ତେବେ ଉତ୍ତର ପ୍ରଦେଶ ବିଧାନସଭା ନିର୍ବାଚନ ପ୍ରଥମ ପର୍ଯ୍ୟାୟ ଭୋଟିଂର ମାତ୍ର ଗୋଟିଏ ଦିନ ପୂର୍ବରୁ ପ୍ରଧାନମନ୍ତ୍ରୀଙ୍କ ଦୀର୍ଘ ସମୟ ଧରି ସାକ୍ଷାତକାର ସମସ୍ତଙ୍କୁ ଆଶ୍ଚର୍ଯ୍ୟଚକିତ କରିଛି ।
ଗୋହିଲ କହିଛନ୍ତି, ଏହି ଘଟଣା ପାଇଁ ସେ ସାମ୍ବିଧାନିକ ଅନୁଷ୍ଠାନକୁ ଆକ୍ଷେପ କରିବାକୁ ଚାହୁୁଁନାହାନ୍ତି । କିନ୍ତୁ ପ୍ରଧାନମନ୍ତ୍ରୀଙ୍କ ଦୀର୍ଘ ସମୟ ସାକ୍ଷାତକାର ପରି ଘଟଣା ତାଙ୍କୁ ଆଶ୍ଚର୍ଯ୍ୟ କରିଛି । ଗୋହିଲ କହିଛନ୍ତି ନିର୍ବାଚନ ନିର୍ବାଚନ ଆୟୋଗ ଏକ ସାମ୍ବିଧାନିକ ଅନୁଷ୍ଠାନ, କିନ୍ତୁ ସରକାର ଓ ବିରୋଧୀଙ୍କ ପାଇଁ ଦୁଇଟି ଭିନ୍ନ ନିଷ୍ପତ୍ତି ଗ୍ରହଣ କରିବା ଆମର ବ୍ୟବସ୍ଥା ଓ ନିର୍ବାଚନର ସ୍ବଚ୍ଛତା ଉପରେ ପ୍ରଶ୍ନ ସୃଷ୍ଟି କରିଛି ।
ନ୍ୟୁଜ୍ ଏଜେନ୍ସିକୁ ଦେଇଥିବା ସାକ୍ଷାତକାରରେ ପ୍ରଧାନମନ୍ତ୍ରୀ ମୋଦି ଯୋଗୀ ଆଦିତ୍ୟନାଥଙ୍କ ସଫଳତା ତାଲିକାଭୁକ୍ତ କରିଥିଲେ, ଯାହା ପରୋକ୍ଷ ପ୍ରଚାର ସଦୃଶ୍ୟ । ସେହିପରି ସଂସଦରେ ଅଭିଭାଷଣ ଦେବା ସମୟରେ ସରକାରଙ୍କ ଉପରେ ହୋଇଥିବା ଅଭିଯୋଗକୁ ଦର୍ଶାଇ ପ୍ରଧାନମନ୍ତ୍ରୀ ରାହୁଲ ଗାନ୍ଧୀଙ୍କ ଉପରେ ମଧ୍ୟ ଘୋର ରାଜନୈତିକ ଆକ୍ରମଣ କରିଥିଲେ । ତେବେ ଉଭୟ ଗଣମାଧ୍ୟମରେ ସାକ୍ଷାତକାର ଓ ସଂସଦରେ ଉତ୍ତର ରଖିବା ସମୟରେ ପ୍ରଧାନମନ୍ତ୍ରୀ ରାଜନୀତିର କଥା କହିଛନ୍ତି । ଯାହା ନିର୍ବାଚନ ଆଚରଣର ଖୋଲା ଉଲଙ୍ଘନ ବୋଲି କଂଗ୍ରେସ କହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
