ଗୌହାଟୀ: ଆସାମ ଓ ମିଜୋରାମ ମଧ୍ୟରେ ଦେଖାଦେଇଥିବା ସୀମା ବିବାଦ ଦିନକୁ ଦିନ ଉଗ୍ର ରୂପ ଧାରଣା କରିବାରେ ଲାଗିଛି । ଆଜି ଆସାମର ଜନ ସାଧାରଣଙ୍କୁ ମିଜୋରାମ ନଯିବା ପାଇଁ ପରାମର୍ଶ ଜାରି କରିଛନ୍ତି ଆସାମ ସରକାର । ଆସାମ ସରକାରଙ୍କ ଗୃହ ରାଜନୈତିକ ବ୍ୟାପାର ବିଭାଗ ପକ୍ଷରୁ ଏକ ବିଜ୍ଞପ୍ତି ମାଧ୍ୟମରେ ରାଜ୍ୟବାସୀଙ୍କୁ ଏହି ପରାମର୍ଶ ଜାରି କରାଯାଇଛି ।
ଗତ ୧୬ ତାରିଖରେ ଉଭୟ ରାଜ୍ୟ ମଧ୍ୟରେ ଥିବା ସୀମା ବିବାଦ ଉଗ୍ରରୂପ ଦେଖିବାକୁ ମିଳିଥିଲା । ଦୁଇ ରାଜ୍ୟର ସୀମାନ୍ତରେ ହୋଇଥିବା ସଂଘର୍ଷରେ ଆସାମ ପୋଲିସର ୬ କର୍ମଚାରୀଙ୍କ ମୃତ୍ୟୁ ହୋଇଥିବା ବେଳେ ଅନେକ ପୋଲିସ କର୍ମୀ ଓ ସାଧାରଣ ଜନତା ଆହତ ହୋଇଥିଲେ । ଘଟଣା ଘଟିବା ପରେ ଏହାକୁ ନେଇ ତତ୍ପରତା ପ୍ରକାଶ କରିଥିଲା କେନ୍ଦ୍ର ଗୃହମନ୍ତ୍ରଣାଳୟ । ଉଭୟ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ଆଲୋଚନା ମଧ୍ୟ ହୋଇଥିଲା ।
ତେବେ ଏବେ ପର୍ଯ୍ୟନ୍ତ ଦୁଇ ରାଜ୍ୟ ମଧ୍ୟରେ ସମାଧାନର ବାଟ ବାହାରି ପାରିନଥିବା ବେଳେ ଉଭୟ ରାଜ୍ୟ ପରସ୍ପର ଉପରେ ଦୋଷାରୋପ କରିଛନ୍ତି । ଅନ୍ୟପଟେ କୌଣସି ଅପ୍ରିତିକର ପରିସ୍ଥିତି ସୃଷ୍ଟି ହେବା ଆଶଙ୍କାରେ ଆସାମ ତାର ଜନସଧାରଣଙ୍କୁ ମିଜୋରାମ ସୀମାରେ ପ୍ରବେଶ ନ କରିବା ପାଇଁ ପରାମର୍ଶ ଦେଇଛି ।
ତେବେ ବିଭିନ୍ନ ରାଜ୍ୟ ମଧ୍ୟରେ ସୀମା ବିବାଦ ଥିଲେ ସୁଦ୍ଧା ଏପରି ରକ୍ତାକ୍ତ ସଘଂର୍ଷ ଘଟିନଥିଲା । ଗୋଟିଏ ରାଜ୍ୟରେ ପ୍ରବେଶ ପାଇଁ ଅନ୍ୟ ରାଜ୍ୟ କଟକଣା ଜାରି କରିବା ମଧ୍ୟ ପ୍ରଥମ ବୋଲି କୁହାଯାଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
