ନୂଆଦିଲ୍ଲୀ: ଦିଲ୍ଲୀ ଅବକାରୀ ଦୁର୍ନୀତି ପ୍ରସଙ୍ଗରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କୁ ଆନ୍ନା ହାଜାରେଙ୍କ ଉଦବେଗପୂର୍ଣ୍ଣ ଚିଠି ପରେ ଏହାର ପ୍ରତିକ୍ରିୟା ରଖିଛନ୍ତି ଆପ ମୁଖ୍ୟ ଅରବିନ୍ଦ କେଜ୍ରିଓ୍ବାଲ । ତାଙ୍କୁ ଟାର୍ଗେଟ କରିବା ପାଇଁ ଆନ୍ନା ହାଜାରେଙ୍କୁ ଭାରତୀୟ ଜନତା ପାର୍ଟି ବ୍ୟବହାର କରୁଥିବା କେଜ୍ରିଓ୍ବାଲ ପାଲଟା ଅଭିଯୋଗ ଆଣିଛନ୍ତି (BJP using Anna Hazare says kejirwal)। ଆଜି ଆନ୍ନା ଚିଠି ଲେଖି କେଜ୍ରିଓ୍ବାଲଙ୍କ ଉପରେ ବର୍ଷିଥିଲେ । ଏକାଦା ଆନ୍ନାଙ୍କ ଘନିଷ୍ଠ ସହଯୋଗୀ ଥିବା କେଜ୍ରିଓ୍ବାଲ ରାଜନୀତିକୁ ଆସିବା ପରେ ନିଜ ମୂଳ ଆଦର୍ଶବାଦକୁ ଭୁଲି କ୍ଷମତାରେ ନିଶାଶକ୍ତ ହୋଇ ସାରିଛନ୍ତି ବୋଲି ଆନ୍ନା ତାଙ୍କ ଚିଠିରେ ଉଲ୍ଲେଖ କରିଥିଲେ ।
ତେବେ ଆନ୍ନାଙ୍କ ଚିଠି ପ୍ରସଙ୍ଗ (Anna Hazare letter to Kejriwal) ରେ କେଜ୍ରିଓ୍ବାଲଙ୍କ ଅଡୁଆ ବଢିଥିବା ବେଳେ କେଜ୍ରିଓ୍ବାଲ ତାକୁ ରାଜନୈତିକ ଢଙ୍ଗରେ ଉପସ୍ଥାପିତ କରିଛନ୍ତି । ଆନ୍ନାଙ୍କ ଏପରି ସମାଲୋଚନାରେ ବିଜେପିର ଭୂମିକାକୁ ମଧ୍ୟ ସିଧାସଳଖ ଦାୟୀ କରିଛନ୍ତି । ଦୀର୍ଘଦିନ ହେବ ଆପ ଓ ବିଜେପି ମଧ୍ୟରେ ତୀବ୍ର ଉତ୍ତେଜନା ଲାଗି ରହିଥିବା ବେଳେ ଆନ୍ନାଙ୍କୁ ବିଜେପି ବ୍ୟବହାର କରି ତାଙ୍କୁ ଟାର୍ଗେଟ କରିବା ଆରମ୍ଭ କରିଛି ବୋଲି ସେ ସିଧାସଳଖ ଅଭିଯୋଗ କରିଛନ୍ତି ।
ଏହା ମଧ୍ୟ ପଢନ୍ତୁ :-କେଜ୍ରିଓ୍ୱାଲଙ୍କୁ ଆନ୍ନାଙ୍କ ଚିଠି, କହିଲେ କ୍ଷମତା ନିଶାରେ ବୁଡି ଭୁଲି ଯାଇଛ ଆଦର୍ଶବାଦ
କେଜ୍ରିଓ୍ବାଲ କହିଛନ୍ତି, ‘‘ବିଜେପି କହୁଛି ଦିଲ୍ଲୀରେ ଅବକାରୀ ଦୁର୍ନୀତି ହୋଇଛି, କିନ୍ତୁ ତଦନ୍ତକାରୀ ସଂସ୍ଥା CBI ଦୁର୍ନୀତିର କଥା ଉଲ୍ଲେଖ କରିନାହିଁ । ଲୋକେ ସେମାନଙ୍କୁ ବିଶ୍ବାସ କରୁନାହାନ୍ତି । ତେଣୁ ସେମାନେ ଆନ୍ନା ହାଜାରେଜୀଙ୍କ କାନ୍ଧରେ ବନ୍ଧୁକ ରଖି ଗୁଳି ଫୁଟାଇବା ପାଇଁ ପ୍ରାୟସ କରୁଛନ୍ତି । ଏହା ରାଜନୀତିରେ ଏକ ସାଧାରଣ ଘଟଣା । ଆମେ ଯେତେବେଳେ ସାଧାରଣ ଲୋକଙ୍କ ପାଇଁ କାର୍ଯ୍ୟ କରିବାକୁ ଆସିଲୁ, ଆମେ କୌଣସି ଅଭିଯୋଗର ତଦନ୍ତ ପାଇଁ ସବୁବେଳେ ପ୍ରସ୍ତୁତ ରହିଛୁ ।’’
ଆହରି ମଧ୍ୟ ସେ କହିଛନ୍ତି, ‘‘ସିବିଆଇ ତାର ତଦନ୍ତ ସାରି ସାରିଛି । ମନୀଷ ସିସୋଦିଆଙ୍କୁ 14 ଘଣ୍ଟା ଧରି ପ୍ରଶ୍ନ କରିଥିଲା ତଦନ୍ତକାରୀ ସଂସ୍ଥା । ସେ ତଦନ୍ତରେ ସମ୍ପୂର୍ଣ୍ଣ ସହଯୋଗ ସ୍ବରୂପ ସମସ୍ତ ପ୍ରଶ୍ନର ଉତ୍ତର ଦେଇଥିଲେ । ତାଙ୍କ ବାସଭବନରୁ ଟଙ୍କା କିମ୍ବା ଅନ୍ୟ କିଛି ମଧ୍ୟ ମିଳିନଥିଲା । କିନ୍ତୁ ବିଜେପି କହୁଛୁ ଦୁର୍ନୀତି ହୋଇଛି ।’’ ବିଜେପି କରିଥିବା ଷଡଯନ୍ତ୍ର ବିରୋଧରେ ମଧ୍ୟ ତଦନ୍ତ ହେବାର ଆବଶ୍ୟକତା ରହିଥିବା କେଜ୍ରିଓ୍ବାଲ କହିଛନ୍ତି । ବିଜେପି ତାଙ୍କ ସରକାର ଭାଙ୍ଗିବା ପାଇଁ ଆପର ବିଧାୟକଙ୍କୁ 20 କୋଟି ଟଙ୍କାର ପ୍ରଲୋଭନ ଦେଖାଇଥବା ଘଟଣାର ମଧ୍ୟ ତଦନ୍ତ ହେବା ଆବଶ୍ୟକ ବୋଲି ସେ କହିଛନ୍ତି ।
ଦିଲ୍ଲୀ ଅବକାରୀ ଦୁର୍ନୀତିକୁ ନେଇ କେନ୍ଦ୍ରୀୟ ସଂସ୍ଥାର ତଦନ୍ତ ସାଙ୍ଗକୁ ରାଜନୈତିକ ବୟାନବାଜୀ ମଧ୍ୟରେ ଆନ୍ନା ହାଜାରେ କେଜ୍ରିଓ୍ବାଲଙ୍କୁ ଲେଖିଥିବା ଚିଠି ସାମ୍ନାକୁ ଆସିଥିଲା । ଉଦବେଗ ପ୍ରକାଶ କରି ଆନ୍ନା ଲେଖିଥିଲେ, କେଜ୍ରିଓ୍ବାଲ କ୍ଷମତାରେ ନିଶାରେ ସମ୍ପୂର୍ଣ୍ଣ ବୁଡି ସାରିଛନ୍ତି । ଯେଉଁ ଆନ୍ଦୋଳନ ଆମ ଆଦମୀ ପାର୍ଟି ପ୍ରତିଷ୍ଠା ହେବାରେ ଗୁରୁ ଭୂମିକା ତୁଲାଇଥିଲା, ତାହାର ମୂଳ ଆଦର୍ଶବାଦକୁ କେଜ୍ରିଓ୍ବାଲ ସମ୍ପୂର୍ଣ୍ଣ ଭୁଲି ସାରିଛନ୍ତି । ଅବକାରୀ ଦୁର୍ନୀତି ମାମଲାରେ ତାଙ୍କ ସରକାରର ଭୂମିକା ଆସିବା ନିରାଶଜନକ ବୋଲି ଆନ୍ନା ଚିଠିରେ ଦର୍ଶାଇଥିଲେ ।
ଆନ୍ନା ହାଜାରେ ଚିଠିରେ ଲେଖିଥିଲେ, ‘‘ତୁମେ ମୁଖ୍ୟମନ୍ତ୍ରୀ ହେବା ପରେ ମୁଁ ପ୍ରଥମ ଥର ପାଇଁ ତୁମକୁ ଏହି ଚିଠି ଲେଖୁଛି । ଦିଲ୍ଲୀରେ ଅବକାରୀ ଦୁର୍ନୀତି ସମ୍ପର୍କରେ ଦିଲ୍ଲୀ ସରକାରର ଭୂମିକା ଅତ୍ୟନ୍ତ ନିରାଶଜନକ । ମୁଁ ଗାନ୍ଧିଜୀ ଏବଂ ତାଙ୍କ ଆଦର୍ଶ ‘ଗାନ୍ଧୀବାଦ’ ଦ୍ୱାରା ଅନୁପ୍ରାଣିତ । ଏହି ଆଦର୍ଶବାଦକୁ ଆଧାର କରି ମୋର ଅଛି ମୁଁ ମୋ ଜୀବନକୁ ଲୋକ, ସମାଜ ଏବଂ ଦେଶ ପାଇଁ ଉତ୍ସର୍ଗ କରିଛି । ଗତ 47 ବର୍ଷ ଧରି ମୁଁ ସମାଜର ଉନ୍ନତି ତଥା ଭ୍ରଷ୍ଟାଚାର ବିରୋଧ ଦିଗରେ କାର୍ଯ୍ୟ ଜାରି ରଖିଛି ।’’
ବ୍ୟୁରୋ ରିପୋର୍ଟ, ଇଟିଭି ଭାରତ
