ପାଟନା: କିଛି କରିବାର ଉତ୍ସାହ ଓ ଅଦମ୍ୟ ଇଚ୍ଛା ଶକ୍ତି ବଳରେ ଜଣେ ଯେକୌଣସି ଶିଖର ଛୁଇଁପାରେ । ୱାଚ୍ମ୍ୟାନରୁ ହେଲେ ୟୁନଭର୍ସିଟିର ପ୍ରଫେସର । ବିହାରର ଜଣେ ବ୍ୟକ୍ତି ଏହି ଉକ୍ତିକୁ ପ୍ରମାଣିତ କରି ଦେଖାଇଛନ୍ତି । ଏହି ବ୍ୟକ୍ତି ଜଣକ ଦିନେ ଯେଉଁଠି ୱାଚ୍ମେନ ଚାକିରି କରିଥିଲେ, ଆଜି ସେଠାରେ ପ୍ରଫେସର ଭାବରେ ନିଜକୁ ପ୍ରତିଷ୍ଠିତ କରିଛନ୍ତି । ଏହାକୁ ନେଇ କମଲ କିଶୋର କହିଛନ୍ତି, "ମୁଁ ମୋର ସ୍ବପ୍ନ ସମ୍ମୁଖରେ ଗରିବୀ ଓ ପାରିବାରିକ ସମସ୍ୟାକୁ ବାଧା ହେବାକୁ ଦେଇନି ।"
ବିହାର ମୁଙ୍ଗେର ଜିଲ୍ଲାର ବାସିନ୍ଦା ହେଉଛନ୍ତି କମଲ କିଶୋର ମଣ୍ଡଳ । ନିଜ ଆକ୍ଲାନ୍ତ ପରିଶ୍ରମ ବଳରେ ଆଜି ସେ ପ୍ରଫେସର ହୋଇ ପାରିଛନ୍ତି । କିଶୋର କମଲ ପ୍ରଥମେ ତିଲକମାଞ୍ଝି ଭାଗଲପୁର ବିଶ୍ବବିଦ୍ୟାଳୟରେ ୱାଚମ୍ୟାନ୍ ଭାବରେ ନିଜ କ୍ୟାରିଅର ଆରମ୍ଭ କରିଥିଲେ । ଏହି ସମୟରେ ଜଣେ ପ୍ରଫେସର ହେବାକୁ ଲକ୍ଷ୍ୟ ରଖିଥିଲେ କମଲ କିଶୋର । ଏଥିପାଇଁ ସେ ଶିକ୍ଷା ଗ୍ରହଣ କରିଥିଲେ । ଯାହାଫଳରେ ସେ ବିହାର ପ୍ରଶାସନିକ ପରୀକ୍ଷା, National Eligibility Test(NET) ଭଳି ଅନେକ ପରୀକ୍ଷା ଦେଇ କୃତକାର୍ଯ୍ୟ ହୋଇଥିଲେ ।
ଏହାପରେ ୱାଚମ୍ୟାନ୍ ଚାକିରି ଛାଡ଼ି ଦେଇଥିଲେ କମଲ କିଶୋର । ଏହାକୁ ନେଇ ସେ କହିଛନ୍ତି, "ମୁଁ ୨୦୦୯ ମସିହାରେ PhD ପାଇଁ ଆବେଦନ କରିଥିଲି । ତେବେ ମୋର ବିଭାଗ ମୋତେ ୩ ବର୍ଷ ପରେ ୨୦୧୨ ମସିହାରେ PhD ପାଇଁ ଅନୁମତି ଦେଇଥିଲେ । ମୁଁ ମୋର ସ୍ବପ୍ନ ସମ୍ମୁଖରେ ଗରିବୀ ଓ ପାରିବାରିକ ସମସ୍ୟାକୁ ବାଧା ହେବାକୁ ଦେଇନି । ୱାଚମ୍ୟାନ୍ ଚାକିରି କରିବା ବେଳେ ମୁଁ ସକାଳେ ପାଠ ପଢ଼ୁଥିଲି । ରାତିରେ ଡ୍ୟୁଟି କରୁଥିଲି । ରାତିରେ ମଧ୍ୟ ମୁଁ ଯାହା ପଢ଼ିଛି ତାହାକୁ ରିଭିଜନ କରୁଥିଲି ।"
୪୨ ବର୍ଷୀୟ କମଲ କିଶୋର ମଣ୍ଡଳ ଭାଗଲପୁର ସହରରେ ଥିବା ମୁଣ୍ଡିଚାକ ଅଞ୍ଚଳରେ ବାସ କରନ୍ତି । ତାଙ୍କୁ ୨୩ ବର୍ଷ ବୟସ ହୋଇଥିବା ବେଳେ ସେ ଏଠାକୁ ଆସିଥିଲେ । ଏହାପରେ ସେ ସ୍ଥାନୀୟ RD and DG କଲେଜରେ ୱାଚମ୍ୟାନ୍ ଭାବରେ ଚାକିରି କରିଥିଲେ । ଏହି ସମୟରେ ସେ ସମ୍ପୃକ୍ତ କଲେଜରେ ରାଜନୀତି ବିଜ୍ଞାନରେ ସ୍ନାତ୍ତକ ହାସଲ କରିଥିଲେ । ସେହି ସମୟରେ ଯାହା ରୋଜଗାର କରୁଥିଲେ ତାହା ପର୍ଯ୍ୟାପ୍ତ ହୋଇ ପାରୁନଥିଲା ।
ସେହି ସମୟରେ ତାଙ୍କୁ ଭାଗଲପୁର ବିଶ୍ବବିଦ୍ୟାଳୟକୁ ବଦଳି କରାଯାଇଥିଲା । ସେଠକୁ ଯିବାପରେ ସେ ନିଜ ସ୍ବପ୍ନ ସାକାର ପାଇଁ ଲାଗି ପଡ଼ିଥିଲେ । ଆଜି ତାଙ୍କ ସ୍ବପ୍ନ ସାକାର ହୋଇଛି । ଆଜି ବିହାର ତଥା ସମଗ୍ର ଦେଶ ପାଇଁ ଜଣେ ଉଦାହରଣ ପାଲଟି ଯାଇଛନ୍ତି । କଲମ କିଶୋରଙ୍କୁ ନେଇ ଛାତ୍ରଛାତ୍ରୀଙ୍କୁ ପ୍ରେରଣା ମିଳିଛି ।
