ମୁମ୍ବାଇ: ଗୋଟିଏ ପଟେ ଦେଶ କୋରୋନା ଭାଇରସ ସହ ମୁକାବିଲା କରିବା ପାଇଁ ବିଦେଶରୁ ପିପିଇ କିଟ ମଗାଉଛି । କୋରୋନା ଯୋଦ୍ଧାମାନେ ଏହାକୁ ପିନ୍ଧି କୋରୋନା ସହ ଲଢୁଛନ୍ତି । ହେଲେ ଅନ୍ୟ ପଟେ କିଛି ଲୋକ ବର୍ତ୍ତମାନ ପିପିଇ କିଟ ପିନ୍ଧି ଡକାୟତି କରିବା ଆରମ୍ଭ କରିଦେଇଛନ୍ତି ।
ଏଭଳି ଏକ ଘଟଣା ଦେଖିବାକୁ ମିଳିଛି ମହାରାଷ୍ଟ୍ରର ସତାରା ଜିଲ୍ଲାରେ । ଯେଉଁଠି ଚୋରମାନେ ପିପିଇ କିଟ ପିନ୍ଧି ଏକ ଦୋକାନରୁ ସୁନା ଚୋରି କରିଛନ୍ତି। ଏହି ଘଟଣାର ତଦନ୍ତ ପାଇଁ ପୋଲିସ ଦୋକାନର ସିସିଟିଭି ଫୁଟେଜ ଅନୁସନ୍ଧାନ କରିବା ପରେ ଏହା ଜଣାପଡିଥିଲା ଯେ, ପିପିଇ କିଟ ପିନ୍ଧିଥିବା ଚୋରମାନେ ଦୋକାନର ବିଭିନ୍ନ ସ୍ଥାନରୁ କିଛି ଶୋକେସ ଏବଂ ସୁନା ଅଳଙ୍କାର ଚୋରି କରିଥିଲେ। ଯାହାର ଓଜନ ପ୍ରାୟ 780 ଗ୍ରାମ ଅଟେ ।
ଏହି ଫୁଟେଜରେ ଚୋର ହାତରେ ଗ୍ଲୋବସ, ମାସ୍କ, ପିପିଇ କିଟ ଓ କ୍ୟାପ ପିନ୍ଧି ନିଜ ଶରୀର ସହ ମୁହଁକୁ ସମ୍ପୂର୍ଣ୍ଣ ଲୁଚାଇ ଦୋକାନରୁ ଚୋରି କରୁଥିବା ଦେଖିବାକୁ ମିଳିଛି । ତେବେ ଚୋରି ହୋଇଥିବା ସୁନାର ମୂଲ୍ୟ ପ୍ରାୟ ଲକ୍ଷାଧିକ ଟଙ୍କା ହେବ।
ତେବେ ଚୋରମାନେ ଦୋକାନ କାନ୍ଥ ତାଡି ଦୋକାନ ଭିତରକୁ ପ୍ରବେଶ କରିଥିଲେ। ଏନେଇ ଏକ ମାମଲା ରୁଜୁ କରିବା ସହ ତଦନ୍ତ ଆରମ୍ଭ କରିଛି ପୋଲିସ ।
