ପାଟନା: ବିହାର ମୁଖ୍ୟମନ୍ତ୍ରୀ ନୀତିଶ କୁମାର ନିଜର ମନ୍ତ୍ରିମଣ୍ଡଳର ସମ୍ପ୍ରସାରଣ କରିଛନ୍ତି । 8 ଜଣ ନୂଆ ଚେହେରାଙ୍କୁ କରିଛନ୍ତି ସାମିଲ । ବିଧାନ ପରିଷଦର ତିନି ଜଣ ସଦସ୍ୟଙ୍କ ସହ ପାଞ୍ଚ ଜଣ ବିଧାୟକଙ୍କୁ ରାଜ୍ୟପାଳ ଲାଲଜୀ ଟଣ୍ଡନ ରାଜଭବନରେ ପଦ ଓ ଗୋପନୀୟତାର ଶପଥପାଠ କରାଇଛନ୍ତି ।
ବିହାରରେ ଜେଡ଼ିୟୁ, ବିଜେପି ଓ ଏଲଜେପି ମେଣ୍ଟରେ ସରକାର ଗଠିତ ହୋଇଥିବା ବେଳେ ନୀତିଶଙ୍କ 8 ମନ୍ତ୍ରୀଙ୍କ ମଧ୍ୟରେ ଜଣେ ବି ନାହାଁନ୍ତି ବିଜେପି କିମ୍ବା ଏଲଜେପି ବିଧାୟକ । ଶପଥ ନେଇଥିବା ସମସ୍ତ ସଦସ୍ୟ ଜେଡ଼ିୟୁର ହୋଇଥିବାରୁ ତାହାକୁ ନେଇ ଆରମ୍ଭ ହୋଇଛି ଚର୍ଚ୍ଚା ।
ନବଗଠିତ ମୋଦିଙ୍କ ମନ୍ତ୍ରିମଣ୍ଡଳରେ ଜେଡ଼ିୟୁ କୌଣସି ସାଂସଦ ନଥିବାରୁ ନୀତିଶ ଏପରି ନିଷ୍ପତ୍ତି ନେଇଥିବା ଶୁଣିବାକୁ ମିଳୁଥିବା ବେଳେ ସ୍ବୟଂ ନୀତିଶ ଏହା ଉପରେ ପକାଇଛନ୍ତି ପୂର୍ଣ୍ଣଛେଦ । ସେପରି କିଛି ଅସନ୍ତୋଷ ଏନଡିଏ ସହ ନାହିଁ, ମନ୍ତ୍ରୀ ପରିଷଦରେ ଜେଡ଼ିୟୁର ନେତାଙ୍କର କୋଟା ଥିଲା ସେଥିପାଇଁ ସେମାନଙ୍କୁ ସାମିଲ କରାଯାଇଥିବା କହିଛନ୍ତି ମୁଖ୍ୟମନ୍ତ୍ରୀ ନୀତିଶ କୁମାର ।
