ମୁମ୍ବାଇ: ରବିବାର ଖୋଲା ରହିବ ଶିରିଡି ସ୍ଥିତ ସାଇବାବାଙ୍କ ମନ୍ଦିର । ସାରା ଶିରିଡିରେ ବନ୍ଦ ପାଳନ ହେବ କିନ୍ତୁ ମନ୍ଦିର ଖୋଲା ରହିବ ବୋଲି ମନ୍ଦିର ଟ୍ରଷ୍ଟ ପକ୍ଷରୁ ସୂଚନା ଦିଆଯାଇଛି । ସୂଚନା ଯୋଗ୍ୟ, ଯେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ସାଇବାବାଙ୍କ ଜନ୍ମ ସ୍ଥାନକୁ ନେଇ ଦେଇଥିଲେ ବିବାଦୀୟ ବୟାନ । ଉଦ୍ଧବ କହିଥିଲେ ଯେ, ସାଇବାବାଙ୍କ ଜନ୍ମ ସ୍ଥାନ ଶିରିଡି ନୁହେଁ ପାଥରୀ । ଯାହାକୁ ନେଇ ଶିରିଡି ବାସୀଙ୍କୁ ଆଘାତ ଲାଗିଥିଲା ।
ତେବେ ଉଦ୍ଧବଙ୍କ ଏହି ବୟାନ ପରେ ଶିରିଡିବାସୀ କ୍ଷୁବ୍ଧ ହୋଇ ଶିରିଡିରେ ରବିବାର ବନ୍ଦ ପାଳନ ନିଷ୍ପତ୍ତି ନେଇଛନ୍ତି । କିନ୍ତୁ ସାରା ଦେଶରୁ ଲକ୍ଷାଧିକ ଶ୍ରଦ୍ଧାଳୁ ଆସୁଥିବାରୁ ମନ୍ଦିର ବନ୍ଦ କରାଯିବ ନାହିଁ ବୋଲି କହିଛନ୍ତି ସାଇବାବା ସଂସ୍ଥାନର ମୁଖ୍ୟ କାର୍ଯ୍ୟକାରୀ ଅଧିକାରୀ ଦୀପକ ମୁଗଲିକର । ସେପଟେ ଶିରିଡି ବନ୍ଦକୁ ସମର୍ଥନ କରିଛନ୍ତି ସ୍ଥାନୀୟ ବିଧାୟକ ରାଧାକୃଷ୍ଣ ବିଖେ ପାଟିଲ ।
ଏହା ସହ ମୁଖ୍ୟମନ୍ତ୍ରୀ ନିଜ ବୟାନ ଫେରାଇ ନିଅନ୍ତୁ ବୋଲି କହିଛନ୍ତି ପାଟିଲ । "ଦେଶରେ ଅନେକ ସାଇ ମନ୍ଦିର ଅଛି ପାଥରୀରେ ମଧ୍ୟ ଅଛି । ତେବେ ଏହାକୁ ସାଇଙ୍କ ଜନ୍ମସ୍ଥାନ କହିବା ନୁହେଁ । ଏହା ଦ୍ବାରା ଲୋକଙ୍କ ମନରେ ଆଘାତ ଲାଗିଛି ତେଣୁ ଏହି ବିବାଦ ଶୀଘ୍ର ସରିବା ଆବଶ୍ୟକ ବୋଲି ସେ କହିଛନ୍ତି" ।
ବ୍ୟୁରୋ ରିପୋର୍ଟ, ଇଟିଭି ଭାରତ
