ଡେରାଡୁନ: 18କି.ମି ପାଦଚଲା ଦୁର୍ଗମ ରାସ୍ତା ଅତିକ୍ରମ କରି ଶ୍ରଦ୍ଧାଳୁମାନେ ଆସି ପହଞ୍ଚୁଛନ୍ତି କେଦାରନାଥ ଧାମରେ । ହେଲେ ବାବା କେଦାରନାଥଙ୍କ ଦର୍ଶନ କରି ପାରୁ ନାହାଁନ୍ତି ଶ୍ରଦ୍ଧାଳୁ । ଫଳରେ କେଦାରନାଥ ଧାମରୁ ନିରାଶ ମନରେ ଫେରୁଛନ୍ତି । ଏଥିଲାଗି ଧାମର ତୀର୍ଥ ପୁରୋହିତମାନେ ବି ଅସନ୍ତୋଷ ପ୍ରକାଶ କରିଛନ୍ତି ।
ସୂଚନାଥାଉକି, କୋରୋନା ମହାମାରୀ ମଧ୍ୟରେ ଉତ୍ତରାଖଣ୍ଡର ବାସିନ୍ଦାଙ୍କୁ କେଦାରନାଥଧାମର ଯାତ୍ରା ନିମନ୍ତେ ଅନୁମତି ମିଳିଛି । କିନ୍ତୁ ଦେବସ୍ଥାନମ୍ ବୋର୍ଡ ଶ୍ରଦ୍ଧାଳୁଙ୍କୁ କେବଳ ମନ୍ଦିର ପରିସର ଯାଏଁ ଯିବାର ଅନୁମତି ଦେଇଛନ୍ତି । ମନ୍ଦିରର ସଭାମଣ୍ଡପ ଓ ଗର୍ଭଗୃହରେ ପ୍ରବେଶ ଉପରେ ଲାଗିଛି କଟକଣା । ଏପଟେ ବାବା କେଦାରନାଥ ତ୍ରିକୋଣୀୟ ଆକାରର ମନ୍ଦିରର ଗର୍ଭଗୃହରେ ବିରାଜମାନ ଅଛନ୍ତି। ଫଳରେ ଶ୍ରଦ୍ଧାଳୁମାନେ ବାବାଙ୍କ ଦର୍ଶନରୁ ବଞ୍ଚିତ ହେଉଛନ୍ତି ।
ସେଠାକାର ତୀର୍ଥ ପୁରୋହିତ ଅଙ୍କିତ ସେମଓ୍ବାନ କହିଛନ୍ତି ଯେ, ଶ୍ରଦ୍ଧାଳୁମାନେ ଏତେ ଦୂରରୁ ଆସୁଛନ୍ତି ବାବାଙ୍କ ଦର୍ଶନ ପାଇଁ କିନ୍ତୁ ମନ୍ଦିର ମଧ୍ୟକୁ ପ୍ରବେଶକୁ ଅନୁମତି ଦିଆଯାଉ ନାହିଁ । ସରକାର ସଭାମଣ୍ଡପରୁ ବାବାଙ୍କ ଦର୍ଶନ ନିମନ୍ତେ ଅନୁମତି ଦେବା ଉଚିତ ।
ଅନ୍ୟପଟେ ପୋଲିସ ଅଧିକ୍ଷକ ନବନୀତ ସିଂ ଭୁଲ୍ଲର କହିଛନ୍ତି ଯେ, କୋରୋନା ସଂକ୍ରମଣକୁ ଦେଖି ଗର୍ଭଗୃହ ଓ ସଭାମଣ୍ଡପରେ ଭକ୍ତଙ୍କ ପ୍ରବେଶରେ କଟକଣା ଲାଗିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
