ପାଟନା: ବିହାର ରାଜନୈତିକ ପାଣିପାଗ ଏବେ ସରଗରମ । ଗୋଟିଏ ପଟେ ଆରଜେଡି-କଂଗ୍ରେସ ସିଟ ବଣ୍ଟାକୁ ନେଇ ଏହା ଚର୍ଚ୍ଚାରେ ଥିବାବେଳେ ଅନ୍ୟପଟେ ଜେଡିୟୁରେ ଆଭ୍ୟନ୍ତରୀଣ କନ୍ଦଳ ମାମଲାରେ ଉଷ୍ଣତା ଭରିଦେଇଛି । ତେବେ ପ୍ରଚାର ଅଭିଯାନରୁ ଜନତା ଦଳ ୟୁନାଇଟେଡ(ଜେଡିୟୁ)ର ପ୍ରଶାନ୍ତ କିଶୋର ଓହରିଯିବା ପରେ ଦଳର ଆଭ୍ୟନ୍ତରୀଣ କନ୍ଦଳ ବାହାରେ ପଡିଛି ।
ଶୁକ୍ରବାର ଏକ ଟ୍ବିଟ୍ କରି ଜେଡିୟୁ ଜାତୀୟ ଉପସଭାପତି ପ୍ରଶାନ୍ତ ଲେଖିଥିଲେ ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ବିହାର ମୁଖ୍ୟମନ୍ତ୍ରୀ ନୀତିଶ କୁମାରଙ୍କ ନେତୃତ୍ବରେ ଏନଡିଏ ମେଣ୍ଟ ଶକ୍ତିଶାଳୀ ରହିଛି । ଆଗାମୀ ନିର୍ବାଚନରେ ଦଳ ପାଇଁ ପ୍ରଚାର ଦାୟିତ୍ବ ତୁଲାଉଛନ୍ତି ଅଭିଜ୍ଞ ଓ ବରିଷ୍ଠ ନେତା ଆର ସି ପି ସିଂହ । ତାଙ୍କ କାର୍ଯ୍ୟ କେବଳ ସହଯୋଗ କରିବା ଓ ଶିଖିବାର ଥିଲା ବୋଲି ସେ କହିଛନ୍ତି ।
ଏହାସହ ଶୁଣାଯାଉଛି ଯେ ଜଣେ ରାଜନୈତିକ ଷ୍ଟ୍ରାଟେଜିମେକର ଥିବା ପ୍ରଶାନ୍ତ କିଶୋର ବର୍ତ୍ତମାନ ୱାଇଏସଆରସିପି ଲିଡର ଜଗନ ମୋହନ ରେଡ୍ଡୀଙ୍କ ପାଇଁ ଷ୍ଟ୍ରାଟେଜି ତିଆରି କରୁଛନ୍ତି । ଏହାପରେ ସେ ଶିବସେନା ପାଇଁ ଆଗାମୀ ନିର୍ବାଚନ ଋଣନୀତି ତିଆରି କରିବେ ବୋଲି ସୂଚନା ରହିଛି । ତେଣୁ ସେ ଜେଡିୟୁ ପାଇଁ ପ୍ରଚାର କାର୍ଯ୍ୟ କରିପାରିବେ ନାହିଁ । ତେବେ ତାଙ୍କୁ ଦଳ ଷ୍ଟାର ପ୍ରଚାରକ ତାଲିକାରେ ରଖିଥିଲା ।
ହେଲେ ଏବେ ସେ ଦଳର ପ୍ରଚାର ଅଭିଯାନ ଏବଂ ପରିଚାଳନା କମିଟିର ପ୍ରଭାରୀ ପଦରୁ ଓହରି ଯାଇଛନ୍ତି । ଏହା ପଛରେ ଆର ସି ପି ସିଂହଙ୍କ ସହ ତାଙ୍କ ମତଭେଦ ପ୍ରମୁଖ କାରଣ ବୋଲି କୁହାଯାଉଛି । କିଛିଦିନ ତଳେ ସିଂହ ଗଣମାଧ୍ୟମରେ ପ୍ରଶାନ୍ତଙ୍କ ବିରୋଧରେ ବିବୃତି ଦେଇଥିଲେ । ଏହାସହ ବହୁ ପ୍ରମୁଖ ନେତା ମଧ୍ୟ ତାଙ୍କ ବିରୋଧରେ ଅସନ୍ତୋଷ ଜାହିର କରିବା ପରେ କିଶୋର ଏଭଳି ପଦକ୍ଷେପ ନେଇଛନ୍ତି ବୋଲି କୁହାଯାଉଛି ।
ବିହାରରେ ପ୍ରଥମ ପର୍ଯ୍ୟାୟ ନିର୍ବାଚନ ପାଇଁ ଆଉ ମାତ୍ର ୨ ସପ୍ତାହରୁ କମ ସମୟ ରହିଛି । ଏପରି ସ୍ଥିତିରେ ଦଳୀୟ କନ୍ଦଳ ଜେଡିୟୁ ପାଇଁ ସମସ୍ୟା ସୃଷ୍ଟି କରିଛି । ଦଳ ସୁପ୍ରିମୋ ତଥା ମୁଖ୍ୟମନ୍ତ୍ରୀ ନିତୀଶ କୁମାରଙ୍କୁ ଏଥିରେ ହସ୍ତକ୍ଷେପ କରିବା ପାଇଁ ଅନେକ କର୍ମୀ ଦାବି କରିଛନ୍ତି ।
