ରାଇପୁର: ଆତଙ୍କ ସୃଷ୍ଟି କରିବା ପାଇଁ ଏବେ ଡ୍ରୋନର ସାହାଯ୍ୟ ନେଉଛନ୍ତି ନକ୍ସଲମାନେ । ଏହି ଡ୍ରୋନ ଜରିଆରେ ସେମାନେ ସୁରକ୍ଷାକର୍ମୀଙ୍କ ଶିବିର ପର୍ଯ୍ୟନ୍ତ ପହଞ୍ଚୁଛନ୍ତି ଏବଂ ସେମାନଙ୍କ ଉପରେ ଆକ୍ରମଣ କରିବାର ଭିଭିନ୍ନ ରାସ୍ତା ବାହାର କରୁଛନ୍ତି । ତେବେ ନିକଟରେ ଏଭଳି କିଛି ଘଟଣା ଦେଖିବାକୁ ମିଳିଥିଲା ଛତିଶଗଡର ସୁକୁମା ଅଞ୍ଚଳରେ । ସୁକୁମାରେ ସିଆରପିଏଫ ଶିବିର ଉପରେ ଡ୍ରୋନ ଉଡୁଥିବା ଦେଖିବାକୁ ମିଳିଥିଲା । ତେବେ ଏଭଳି ବିପଦକୁ ଦୃଷ୍ଟିରେ ରଖି ନକ୍ସଲ ପ୍ରଭାବିତ ରାଜ୍ୟ ଗୁଡିକରେ ଡ୍ରୋନ ଦେଖିବା ମାତ୍ରେ ତାକୁ ଗୁଳି କରି ଖସାଇବାକୁ ସୁରକ୍ଷାକର୍ମୀଙ୍କୁ ନିର୍ଦ୍ଦେଶ ଦିଆଯାଇଛି । ଏହି ନିର୍ଦ୍ଦେଶ ସୁରକ୍ଷା ଏବଂ ଗୁଇନ୍ଦା ସଂସ୍ଥାର କେନ୍ଦ୍ର କମାଣ୍ଡ ପକ୍ଷରୁ ଦିଆଯାଇଛି ।
ସୁକୁମାର କିସ୍ତରାମ ଏବଂ ପାଲୋଡୀରେ ସିଆରପିଏଫ ଶିବିର ନିକଟରେ ଗତ ଏକ ମାସ ମଧ୍ୟ 4 ଥର ଡ୍ରୋନ ଉଡୁଥିବା ଦେଖିବାକୁ ମିଳିଥିଲା । ତେବେ ଡ୍ରୋନର ଶବ୍ଦ ଶୁଣି ସୁରକ୍ଷାକର୍ମୀ ହାଇ ଆଲର୍ଟରେ ରହି ସର୍ଚ୍ଚ ଅପରେସନ ଆରମ୍ଭ କରିଥିଲେ । କିନ୍ତୁ କୌଣସି କାର୍ଯ୍ୟାନୁଷ୍ଠାନ ନେବା ପୂର୍ବରୁ ଡ୍ରୋନ ଗାୟବ ହୋଇଯାଇଥିଲା । ତେବେ ଏହି ଡ୍ରୋନ ବିବାହ ଏବଂ ସିନେମାରେ ବ୍ୟବହୃତ ଡ୍ରୋନ ବୋଲି ପ୍ରାଥମିକ ତଦନ୍ତରୁ ଜଣା ପଡିଛି । କିନ୍ତୁ ନକ୍ସଲ ଏହି ଡ୍ରୋନ ସାହାଯ୍ୟରେ ସୁରକ୍ଷାକର୍ମୀଙ୍କ ସମ୍ପର୍କରେ ତଥ୍ୟ ହାସଲ କରିବାକୁ ଚାହୁଁଥିବା ଗୁଇନ୍ଦା ସଂସ୍ଥା ପକ୍ଷରୁ ଆଶଙ୍କା କରାଯାଉଛି ।
