ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତ୍ରିରାଷ୍ଟ୍ରୀୟ ବିଦେଶ ଗସ୍ତ ସାରି ମଙ୍ଗଳବାର ଭାରତ ଫେରିଛନ୍ତି । ସ୍ବଦେଶ ପ୍ରତ୍ୟାବର୍ତ୍ତନ ପରେ ମୋଦି ପୂର୍ବତନ ଅର୍ଥମନ୍ତ୍ରୀ ଦିବଙ୍ଗତ ଅରୁଣ ଜେଟଲୀଙ୍କ ଘରକୁ ଯାଇ ଅରୁଣଙ୍କ ପତ୍ନୀ ସଙ୍ଗୀତା, ପୁଅ ରୋହନ ଓ କନ୍ୟା ସୋନାଲୀଙ୍କୁ ଭେଟିଛନ୍ତି । ପ୍ରଧାନମନ୍ତ୍ରୀ ସକାଳ 11ଟାରେ ଜେଟଲୀଙ୍କ ଘରକୁ ଯାଇ ପରିବାର ସଦସ୍ୟଙ୍କୁ ଭେଟିଛନ୍ତି । ଅରୁଣଙ୍କ ପରିବାର ସହ ପ୍ରଧାନମନ୍ତ୍ରୀଙ୍କ ସାକ୍ଷାତ ସମୟରେ ଗୃହମନ୍ତ୍ରୀ ଅମିତ ଶାହ ମଧ୍ୟ ଉପସ୍ଥିତ ଥିଲେ ।
ଦୀର୍ଘ ଦିନ ଅସୁସ୍ଥ ପରେ 23 ଅଗଷ୍ଟରେ ଅରୁଣଙ୍କ ପରଲୋକ ହୋଇଥିଲା । ପ୍ରଧାନମନ୍ତ୍ରୀ ବିଦେଶରେ ଥାଇ ଅରୁଣଙ୍କ ପତ୍ନୀ ସଙ୍ଗୀତା ଓ ପୁତ୍ର ରୋହନଙ୍କ ସହ ଫୋନରେ କଥା ହୋଇଥିବା ବେଳେ ପରିବାର ଲୋକେ ମୋଦିଙ୍କୁ ବିଦେଶ ଗସ୍ତ ରଦ୍ଧ ନ କରିବାକୁ କହିଥିଲେ । ବାହରିନରୁ ମୋଦି ନିଜ ବନ୍ଧୁ ଅରୁଣଙ୍କ ପାଇଁ ଗଭୀର ଶୋକ ବ୍ୟକ୍ତ କରିଥିଲେ ।
ଶନିବାର 66 ବର୍ଷ ବୟସରେ ଦିଲ୍ଲୀ ଏମ୍ସରେ ଅରୁଣ ଜେଟଲୀଙ୍କ ବିୟୋଗ ହୋଇଥିଲା । ଅରୁଣଙ୍କ ଅସ୍ଥି ସୋମବାର ହରିଦ୍ବାରର ଗଙ୍ଗାରେ ବିସର୍ଜନ କରାଯାଇଛି ।
