ନୂଆଦିଲ୍ଲୀ: ଶନିବାର ପଦ୍ମ ପୁରସ୍କାର 2020ର ଘୋଷଣା କରିଛନ୍ତି କେନ୍ଦ୍ର ସରକାର । 71ତମ ସାଧାରଣତନ୍ତ୍ର ଦିବସ ଅବସରରେ 141 ଜଣ ମାନ୍ୟଗଣ୍ୟ ବ୍ୟକ୍ତିଙ୍କୁ ସମ୍ମାନଜନକ ପଦ୍ମ ପୁରସ୍କାର ପାଇଁ ଦିଆଯିବ । ମନୋନୀତଙ୍କ ମଧ୍ୟରୁ 7 ଜଣ ପଦ୍ମ ବିଭୂଷଣ, 16 ଜଣ ପଦ୍ମ ଭୂଷଣ ଏବଂ 118 ଜଣ ପଦ୍ମଶ୍ରୀ ପାଇଁ ଯୋଗ୍ୟ ବିବେଚିତ ହୋଇଛନ୍ତି । ତେବେ ପଦ୍ମ ପୁରସ୍କାର ପାଇଁ ମନୋନୀତ ହୋଇଥିବା ସମସ୍ତ ବ୍ୟକ୍ତିଙ୍କୁ ଶୁଭେଚ୍ଛା ଜଣାଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।
ମୋଦି ଟ୍ବିଟ କରି କହିଛନ୍ତି, ପଦ୍ମ ପୁରସ୍କାର ପାଇଁ ଯୋଗ୍ୟ ବିବେଚିତ ହୋଇଥିବା ସମସ୍ତ ବ୍ୟକ୍ତିଙ୍କୁ ଶୁଭେଚ୍ଛା । ବରିଷ୍ଠ ବ୍ୟକ୍ତିଙ୍କ ସମାଜ ଏବଂ ଦେଶ ପ୍ରତି ଥିବା ଅତୂଳନୀୟ ଅବଦାନ ପାଇଁ ସେମାନଙ୍କୁ ଏହି ପୁରସ୍କାର ପାଇଁ ମନୋନୀତ କରାଯାଇଛି।
