ନୂଆଦିଲ୍ଲୀ: ଦେଶରେ ମାରାତ୍ମକ କୋରୋନା ବିସ୍ତାର ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ‘ମନ୍ କି ବାତ୍’ କହିଛନ୍ତି। ଲକଡାଉନରେ ତୃତୀୟ ଥର ପାଇଁ ମୋଦି ମନ୍ କି ବାତ୍ କହିଛନ୍ତି । ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ ବିଶ୍ବ ଅପେକ୍ଷା ଭାରତରେ କୋରୋନା ବିସ୍ତାର କମ୍ ରହିଛି । ଏବେ ଆମକୁ ଅଧିକ ସଚେତନ ହେବାକୁ ପଡିବ । ସେ କହିଛନ୍ତି ସାମାଜିକ ଦୂରତା ସହ ମୁହଁରେ ମାସ୍କ ଓ ଘରେ ରହିବା ନିୟମକୁ ପାଳନ କରିବାକୁ ପଡିବ ।
ଏହି ପ୍ରସଙ୍ଗରେ ମୋଦି କହିଛନ୍ତି ଯେ ସମସ୍ତ ସତର୍କତା ସହିତ ବିମାନ ଉଡାଣ ଆରମ୍ଭ ହୋଇଛି। ଧିରେ ଧିରେ ଉଦ୍ୟୋଗ ମଧ୍ୟ ଆରମ୍ଭ ହେବ । ଏହାର ଅର୍ଥ ହେଉଛି ଅର୍ଥନୀତିର ଏକ ବଡ ଅଂଶ ବର୍ତ୍ତମାନ ଚାଲିବ । ଏଭଳି ପରିସ୍ଥିତିରେ ଆମକୁ ଅଧିକ ସଜାଗ ରହିବା ଆବଶ୍ୟକ। ସେ ଆହୁରି ମଧ୍ୟ କହିଛନ୍ତି ଯେ ଦେଶର ସମସ୍ତଙ୍କ ସାମୂହିକ ଉଦ୍ୟମ ଯୋଗୁଁ କୋରୋନା ବିରୋଧରେ ଲଢେଇ ଚାଲିଛି। ଯେତେବେଳେ ଆମେ ଦୁନିଆକୁ ଦେଖିବା, ସେତେବେଳେ ଆମେ ଅନୁଭବ କରିଥାଉ ଯେ ପ୍ରକୃତରେ ଭାରତୀୟମାନଙ୍କର ସଫଳତା କେତେ ବଡ । ଅଧିକାଂଶ ଦେଶ ତୁଳନାରେ ଆମର ଜନସଂଖ୍ୟା ଅନେକ ଗୁଣରେ ଅଧିକ । ଆମ ଦେଶରେ ବିଭିନ୍ନ ପ୍ରକାରର ଆହ୍ବାନ ରହିଛି କିନ୍ତୁ ତଥାପି ଆମ ଦେଶ କୋରୋନା ଅନ୍ୟ ଦେଶ ତୁଳନାରେ କମ୍ ବ୍ୟାପିଛି।
ମୋଦି କହିଛନ୍ତି ଯେ ଦେଶରେ ହୋଇଥିବା କ୍ଷୟକ୍ଷତି ପାଇଁ ଆମେ ଦୁଃଖିତ । କିନ୍ତୁ ଆମେ ଯାହା ବି ସଞ୍ଚୟ କରିବାରେ ସକ୍ଷମ ହୋଇଛେ, ତାହା ନିଶ୍ଚିତ ଭାବରେ ଦେଶର ସାମୂହିକ ନିଷ୍ଠା ଶକ୍ତିର ଫଳାଫଳ । ଦେଶବାସୀଙ୍କ ନିଷ୍ଠା ସହ ଶକ୍ତି ହେଉଛି ଏହି ସଂଗ୍ରାମରେ ଆମର ସର୍ବଶ୍ରେଷ୍ଠ କ୍ଷମତା ଓ ତାହା ହେଉଛି ଦେଶବାସୀଙ୍କ ସେବା ଶକ୍ତି। ମୋଦି କହିଛନ୍ତି ଯେ ଆମର ଡାକ୍ତର, ନର୍ସିଂ କର୍ମଚାରୀ, ସ୍ବିପର୍, ପୋଲିସ୍, ମିଡିଆ ସହକର୍ମୀମାନେ କରୁଥିବା ସେବା ବିଷୟରେ ମୁଁ ଅନେକ ଥର ଆଲୋଚନା କରିଛି। ମୁଁ ଏହା ବିଷୟରେ ମନ କି ବାତରେ ମଧ୍ୟ ଉଲ୍ଲେଖ କରିଛି । ସେବା ପାଇଁ ନିଜକୁ ଉତ୍ସର୍ଗ କରିଥିବା ଲୋକଙ୍କ ସଂଖ୍ୟା ଅସଂଖ୍ୟ ।
ମୋଦି କହିଛନ୍ତି ଆଜିକାଲି ଦେଶର ବିଭିନ୍ନ ପ୍ରାନ୍ତରୁ ମହିଳା ସ୍ବୟଂ ସହାୟକ ଗୋଷ୍ଠୀର କଠିନ ପରିଶ୍ରମର ଅସଂଖ୍ୟ କାହାଣୀ ଆମ ପାଖକୁ ଆସୁଛି। ଗାଁ ଓ ସହରରେ ଆମର ଭଉଣୀ ଓ ଝିଅମାନେ ପ୍ରତିଦିନ ମାସ୍କ ତିଆରି କରୁଛନ୍ତି । ଏହି କାର୍ଯ୍ୟରେ ସମସ୍ତ ସାମାଜିକ ସଂଗଠନ ମଧ୍ୟ ସେମାନଙ୍କୁ ସମର୍ଥନ କରୁଛନ୍ତି।
ଶ୍ରମିକମାନଙ୍କ ବିଷୟରେ ମୋଦି କହିଛନ୍ତି, ‘ଆମ ଦେଶରେ ଏପରି କୌଣସି ଶ୍ରେଣୀ ନାହିଁ ଯିଏ ଅସୁବିଧାରେ ନାହିଁ ଏବଂ ଯଦି ଏହି ସଙ୍କଟର ସବୁଠାରୁ ବଡ ଆଘାତ କାହା ଉପରେ, ତେବେ ଏହା ଆମର ଗରିବ, ଶ୍ରମିକ ଶ୍ରେଣୀ । ସେମାନଙ୍କର ଯନ୍ତ୍ରଣା ଶବ୍ଦରେ କହିବା ଅସମ୍ଭବ । ଏକ ବିପର୍ଯ୍ୟୟ ଯାହା ସମଗ୍ର ବିଶ୍ବରେ କୌଣସି ଉପଶମ ନାହିଁ, ଯାହାର କୌଣସି ପୂର୍ବ ଅଭିଜ୍ଞତା ନାହିଁ । ଏଭଳି ପରିସ୍ଥିତିରେ ଆମେ ନୂତନ ଆହ୍ବାନ ଓ ସମସ୍ୟାର ସମ୍ମୁଖୀନ ହେଉଛୁ ’।
ଏହାସହ ଯୋଗ ଓ ଆୟୁର୍ବେଦକୁ ନେଇ ମଧ୍ୟ ମୋଦି ସୂଚନା ଦେଇଛନ୍ତି । ବିଶ୍ବର ଅନେକ ନେତା ଯୋଗ ଓ ଆୟୁର୍ବେଦକୁ ନେଇ ପଚାରୁଛନ୍ତି । କୋରୋନା ସମୟରେ ଯୋଗ ଓ ଆୟୁର୍ବେଦ କିପରି ସାହାଯ୍ୟ କରୁଛି, ସେ ନେଇ ମଧ୍ୟ ବିଶ୍ବର ଅନେକ ନେତା ଜାଣିବାକୁ ଇଚ୍ଛୁକ ।
ମୋଦି କହିଛନ୍ତି ଯେ ଗୋଟେପଟେ ଆମେ କୋରୋନା ମହାମାରୀ ସହ ଲଢୁଥିବାବେଳେ ଅନ୍ୟ ପଟେ ମଧ୍ୟ ପୂର୍ବ ଭାରତର କିଛି ଅଞ୍ଚଳରେ ପ୍ରାକୃତିକ ବିପର୍ଯ୍ୟୟର ସମ୍ମୁଖୀନ ହୋଇଛୁ। ଗତ କିଛି ସପ୍ତାହ ମଧ୍ୟରେ, ଆମେ ପଶ୍ଚିମବଙ୍ଗ ଓ ଓଡିଶାରେ ମହାବାତ୍ୟା ଅମ୍ଫାନର ବିପଦ ଦେଖିଛୁ। ବାତ୍ୟା ଦ୍ବାରା ଅନେକ ଘର ନଷ୍ଟ ହୋଇଯାଇଥିଲା। କୃଷକମାନେ ମଧ୍ୟ ବହୁ କ୍ଷତି ସହିଥିଲେ। ପରିସ୍ଥିତିର ଆକଳନ କରିବାକୁ ମୁଁ ଓଡିଶା ଓ ପଶ୍ଚିମବଙ୍ଗ ଯାଇଥିଲି। ଯେଉଁ ସାହସ ସହିତ ପଶ୍ଚିମବଙ୍ଗ ଓ ଓଡିଶାର ଲୋକମାନେ ପରିସ୍ଥିତିର ସମ୍ମୁଖୀନ ହୋଇଛନ୍ତି, ତାହା ପ୍ରଶଂସନୀୟ ।
