ହାଇଦ୍ରାବାଦ: ଆମେରିକାରେ ଲାଗୁ ହୋଇଥିବା ଭିସା କଟକଣା ପାଇଁ ଯେ କେତେ ସାଧାରଣ ଲୋକେ କେତେ ହଇରାଣ ହେଉଛନ୍ତି ତାହାର କୌଣସି ଠିକଣା ନାହିଁ । ମୁଖ୍ୟତଃ ଏଥିରେ ଅନ୍ତର୍ଜାତୀୟ ଛାତ୍ରଛାତ୍ରୀଙ୍କ ପାଇଁ ଭିସା କଟକଣା ଜାରି ହୋଇଥିବା ନିଜ ଭବିଷ୍ୟତ ଅନ୍ଧକାରରେ ଥିବା ପ୍ରକାଶ କରିଛନ୍ତି ଛାତ୍ରଛାତ୍ରୀ । ଏମିତିରେ ନିଜ ଦୁଃଖ ପ୍ରକାଶ କରିଛନ୍ତି ସିନ୍ସିନାଟି ୟୁନିଭର୍ସିଟିରେ ଜୁନିୟର ବାୟୋଇଞ୍ଜିନିୟରିଂ ମେଜର ଅଧ୍ୟୟନରତ ଭର୍ଦ୍ଧା ଅଗ୍ରୱାଲ ।
ଭର୍ଦ୍ଧାଙ୍କ କହିବା ଅନୁଯାୟୀ ଗତ ସେମିଷ୍ଟାରରେ ଆମେରିକା ସରକାର ସେମାନଙ୍କୁ ଭିସା କଟକଣାରୁ ଛାଡ ଦେଇଥିବା ବେଳେ ବର୍ତ୍ତମାନ କୋରୋନା ମହାମାରୀ ସମୟରେ ଏହି ନୂଆ ନିୟମ ଅନେକଙ୍କ ଅସୁବିଧାରେ ପକାଇଛି । ଏହା ନା ଯେ କେବଳ ସେମାନଙ୍କ ପଢାକୁ ପ୍ରଭାବିତ କରିଛି ବରଂ ଏହା ସେମାନଙ୍କ ଭବିଷ୍ୟତକୁ ମଧ୍ୟ ଅନ୍ଧକାର ଭିତରକୁ ଠେଲି ଦେଇଛି । ଗୋଟିଏ ପଟେ ମହାମାରୀ ସମୟରେ ଘରଠାରୁ ଦୂରରେ ରହିବାର କଷ୍ଟ ଓ ଅନ୍ୟପଟେ ନୂଆ ଭିସା କଟକଣା ଅନ୍ତର୍ଜାତୀୟ ଛାତ୍ରଛାତ୍ରୀମାନଙ୍କୁ ମାନସିକ ଭାବେ ଅବସାଦଗ୍ରସ୍ତ କରାଇଛି ।
ଆମେରିକୀୟ ଇମିଗ୍ରେସନ ଓ କଷ୍ଟମ ଏନଫୋର୍ସମେଣ୍ଟ(ଆଇସିଇ)ର ନୂଆ ପଲିସି ଅନୁଯାୟୀ ଅନ୍ତର୍ଜାତୀୟ ଛାତ୍ରଛାତ୍ରୀମାନେ ପଢୁଥିବା ୟୁନିଭର୍ସିଟିଗୁଡିକ ଯଦି କେବଳ ଅନଲାଇନ କ୍ଲାସ ଯୋଗାଉଛି ତେବେ ସେମାନଙ୍କୁ ତୁରନ୍ତ ଦେଶ ଛାଡିବାକୁ ହେବ । କିନ୍ତୁ ଯଦି ୟୁନିଭର୍ସିଟି ସାମୟିକ ଭାବେ ଅନଲାଇନ କ୍ଲାସ ଯୋଗାଉଛି ତେବେ ଆମେରିକାରେ ଛାତ୍ରଛାତ୍ରୀମାନେ ରହିପାରିବେ ବୋଲି ସ୍ପଷ୍ଟ କରାଯାଇଛି ।
ସେପଟେ କେତେକ ୟୁନିଭର୍ସିଟି ହାଇବ୍ରିଡ ମଡେଲରେ ଛାତ୍ରଛାତ୍ରୀଙ୍କୁ ପଢାଇବା ଆରମ୍ବ କରିଛନ୍ତି । ଏମିତିରେ ଆମେରିକାରେ ରହିବାକୁ ହେଲେ ଅନ୍ତର୍ଜାତୀୟ ଛାତ୍ରଛାତ୍ରୀମାନଙ୍କୁ ସର୍ବନିମ୍ନ ଗୋଟିଏ ‘ଇନ-ପର୍ସନ’ କ୍ଲାସରେ ମହଜୁଦ ରହିବାକୁ ହେବ । ତାହେଲେ ଯାଇ ସେମାନେ କଟକଣାରୁ ବାଦ ପଡିବେ ଓ ଦେଶରେ ରହି ନିଜର ପଢା ଶେଷ କରିପାରିବେ । ହେଲେ ଯଦି ୟୁନିଭର୍ସିଟି ଗୁଡିକ ସେମିଷ୍ଟାର ଅଧାରେ କୋରୋନା ସଂକ୍ରମଣରୁ ବଞ୍ଚିବା ପାଇଁ ଅନଲାଇନ କ୍ଲାସ ଆରମ୍ଭ କରନ୍ତି ତେବେ ଛାତ୍ରଛାତ୍ରୀମାନଙ୍କୁ ସ୍ବଦେଶ ଫେରିବାକୁ ହେବ ବୋଲି ନିର୍ଦ୍ଦେଶ ରହିଛି ।
ଏନେଇ ଭାରତୀୟ ଇମିଗ୍ରେସନ ଆଇନଜୀବୀ ମଞ୍ଜୁନାଥ ଗୋକରେ କହିଛନ୍ତି କି ଏହି ନିୟମ କେବଳ ଟ୍ରମ୍ପଙ୍କର ରାଜନୈତିକ ଚାଲ । କେବଳ ୟୁନିଭର୍ସିଟିମାନଙ୍କୁ କୋରୋନା ସଂକ୍ରମଣ ସତ୍ତ୍ବେ ପୁଣି ଖୋଲିବା ପାଇଁ ଓ ଦେଶରେ ଇମିଗ୍ରେସନର ସଂଖ୍ୟା ହ୍ରାସ କରିବା ପାଇଁ ଏପରି ନିୟମ ଲାଗୁ କରାଯାଇଥିବା ସେ ପ୍ରକାଶ କରିଛନ୍ତି । ବର୍ତ୍ତମାନ ସୁଦ୍ଧା ଏହି ନିୟମ ବିଧିବଦ୍ଧ ଭାବେ ଫେଡେରାଲ ରେଜିଷ୍ଟରରେ ଉଲ୍ଲେଖ ହୋଇନଥିବାରୁ ଏପରି ସ୍ଥିତିରେ ହଡବଡ ନହୋଇ ମାନସିକ ଭାବେ ସ୍ଥିର ରହିବା ପାଇଁ ସମସ୍ତ ଅନ୍ତର୍ଜାତୀୟ ଛାତ୍ରଛାତ୍ରୀଙ୍କୁ ପରାମର୍ଶ ଦେଇଛନ୍ତି ଗୋକରେ ।
ଆମେରିକାରେ ଲାଗୁ ନୂଆ ନିୟମକୁ ବର୍ତ୍ତମାନ ହାର୍ଭର୍ଡ ଓ ଏମଆଇଟି ପରି ଶିକ୍ଷା ସଂସ୍ଥା ବିରୋଧ କରିଥିବା ବେଳେ ଖୁବଶୀଘ୍ର ଏହି ନିୟମ ବିରୋଧରେ ଆିନଗତ କାର୍ଯ୍ୟାନୁଷ୍ଠାନ ନିଆଯିବା ନେଇ ଗୋକରେ ଆଶାବାଦୀ ରହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
