ନୂଆଦିଲ୍ଲୀ: ମହାମାରୀ କୋରୋନା ପାଇଁ ଦୀର୍ଘ ଦିନ ହେବ ମେଟ୍ରୋ ସେବା ବନ୍ଦ ରହିଥିବା ବେଳେ ଅନଲକ-4ରେ ମେଟ୍ରୋ ଚଳାଚଳକୁ ଅନୁମତି ମିଳିଛି । ସେପ୍ଟେମ୍ବର 7ରୁ ଦିଲ୍ଲୀ ସମେତ ସମଗ୍ର ଦେଶରେ ମେଟ୍ରୋ ସେବା ଆରମ୍ଭ ହେବ । ତେବେ କେନ୍ଦ୍ର ସରକାରଙ୍କ ଏହି ନିଷ୍ପତ୍ତିରେ ଖୁସୀ ବ୍ୟକ୍ତ କରିଛନ୍ତି ଦିଲ୍ଲୀ ପରିବହନ ମନ୍ତ୍ରୀ କୌଳାଶ ଗାହଲଟ । ଯାତ୍ରୀମାନେ କିପରି କୋରୋନା ନିୟମ ପାଳନ କରି ମେଟ୍ରୋରେ ଯାତ୍ରା କରିବେ ସେନେଇ ତାଙ୍କ ସରକାର ନିଶ୍ଚିତ କରିବେ ବୋଲି ସେ କହିଛନ୍ତି ।
ଇଟିଭି ଭାରତକୁ ପ୍ରତିକ୍ରିୟା ଦେଇ ସେ କହିଛନ୍ତି, ଆମେ ନିଶ୍ଚିତ କରିବୁ ଯେ ମେଟ୍ରୋରେ ସାମାଜିକ ଦୂରତା ବଜାୟ ରହିବ। ପ୍ରବେଶ ସମୟରେ ଯାତ୍ରୀଙ୍କ ଥର୍ମାଲ ସ୍କ୍ରିନିଂ କରାଯିବ। କୌଣସି ଟୋକେନ୍ ଦିଆଯିବ ନାହିଁ । ସ୍ମାର୍ଟକାର୍ଡ ଏବଂ ଅନ୍ୟାନ୍ୟ ଡିଜିଟାଲ୍ ପେମେଣ୍ଟ ପଦ୍ଧତି ବ୍ୟବହାର କରାଯିବ ବୋଲି ସେ କହିଛନ୍ତି । ତେବେ ମେଟ୍ରୋ କାର୍ଯ୍ୟକ୍ଷମ ହେବା ପରେ ବସ୍ ଗୁଡିକରେ ଭିଡ଼ କମିଯିବ । ମୁଁ ଖୁସି ଯେ ପାଞ୍ଚ ମାସ ପରେ ଲୋକଙ୍କୁ ଆଶ୍ବସ୍ଥି ମିଳିବ ।
ଦିଲ୍ଲୀ ପରିବହନ ମନ୍ତ୍ରୀ ଆହୁରି କହିଛନ୍ତି, ମେଟ୍ରୋ ସେବାର ସୁଗମ କାର୍ଯ୍ୟ ପାଇଁ ରାଜଧାନୀରେ ଦିନେ କିମ୍ବା ଦୁଇ ଦିନ ମଧ୍ୟରେ ଡିଏମଆରସି ଏବଂ ଅନ୍ୟ ଅଧିକାରୀଙ୍କ ସହ ଏକ ବୈଠକ ଅନୁଷ୍ଠିତ ହେବ।
