ଲକ୍ଷ୍ନୌ: ଶୁକ୍ରବାର ଉତ୍ତରପ୍ରଦେଶ ସାହାରନପୁର ନିକଟସ୍ଥ ଥାନା ବିହାରୀଗଡର ସାତପୁରା ଗ୍ରାମରେ ଥିବା ଏକ ବାଣ କାରଖାନାରେ ଅଗ୍ନିକାଣ୍ଡ ଘଟିଛି । ଏହି ଦୁର୍ଘଟଣାରେ କାରଖାନାର ପ୍ରାୟ 6ରୁ ଅଧିକ କର୍ମଚାରୀ ଆହତ ହୋଇଛନ୍ତି ଏବଂ ବାଣ ଫୁଟି ଅନେକ ଗାଡି କ୍ଷତିଗ୍ରସ୍ତ ହୋଇଥିବା ସୂଚନା ମିଳିଛି ।
ବିହାରୀଗଡ ଥାନା ନିକଟସ୍ଥ ସାତପୁରା ଗ୍ରାମରେ ଥିବା ବାଣ କାରଖାନାରେ ଶୁକ୍ରବାର ହଠାତ୍ ଅଗ୍ନିକାଣ୍ଡ ଘଟିଥିଲା । ଏହି ସମୟରେ କାରଖାନାରେ କର୍ମଚାରୀମାନେ କାର୍ଯ୍ୟରତ ଥିବା ଜଣାପଡିଛି । ତେବେ ମିଳିଥିବା ସୂଚନା ଅନୁସାରେ କାରଖାନାରେ କାର୍ଯ୍ୟ କରୁଥିବା ଆଉ କିଛି କର୍ମଚାରୀ ଏବେ ମଧ୍ୟ କାରଖାନା ମଧ୍ୟରେ ଫସି ରହିଛନ୍ତି ।
ଘଟଣା ସଂପର୍କରେ ଖବର ପାଇ ପୋଲିସ, ପ୍ରଶାସନିକ ଅଧିକାରୀ ଏବଂ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଆଁ ଲିଭା କାର୍ଯ୍ୟ ଜାରି ରଖିଛନ୍ତି । ଉଦ୍ଧାରକାରୀ ଦଳ ଫସି ରହିଥିବା କର୍ମଚାରୀମାନଙ୍କୁ ଦୁର୍ଘଟଣାସ୍ଥଳରୁ ଉଦ୍ଧାର କରୁଥିବା ବେଳେ ଆହତମାନଙ୍କୁ ସାହାରନପୁର ଜିଲ୍ଲାର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି ।
ସେପଟେ ଉକ୍ତ ବାଣ କାରଖାନାରେ କିପରି ଅଗ୍ନିକାଣ୍ଡ ଘଟିଲା ଏ ସଂପର୍କରେ କୌଣସି ସୂଚନା ମିଳିନଥିବା ବେଳେ ପୋଲିସ ଅଧିକ ତଦନ୍ତ ଜାରି ରଖିଥିବା ସୂଚନା ମିଳିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
