ନୂଆଦିଲ୍ଲୀ: ଭାରତ ସରକାରଙ୍କ ଆୟୁଷ ମନ୍ତ୍ରଣାଳୟ ଅଧିନରେ କାର୍ଯ୍ୟ କରୁଥିବା ରାଷ୍ଟ୍ରିୟ ଆୟୁର୍ବେଦ ସଂସ୍ଥାନ କୋରୋନାକୁ ନେଇ 4ଟି ଔଷଧ ପ୍ରସ୍ତୁତ କରିଛି । ଏଥିମଧ୍ୟରୁ ଗୋଟେ ହେଲା ଆୟୁଷ-64 । ଜୟପୁରର ରାଷ୍ଟ୍ରିୟ ଆୟୁର୍ବେଦ ସଂସ୍ଥାନ ମାଧ୍ୟମରେ ଭାରତ ସରକାର ଆୟୁଷ ମନ୍ତ୍ରଣାଳୟ କୋରୋନା ପଜିଟିଭ୍ ରୋଗୀଙ୍କ ଉପରେ ପ୍ରଥମଥର କ୍ଲିନିକାଲ ଟ୍ରାଏଲ ଆରମ୍ଭ କରିଛି ।
ଏହି କ୍ଲିନିକାଲ୍ ଟ୍ରାଏଲ ଜୟପୁରର ଏକ ଘରୋଇ ହସ୍ପିଟାଲରେ କୋଭିଡ-19 ର ପ୍ରଥମ ପର୍ଯ୍ୟାୟ ରୋଗୀଙ୍କ ଉପରେ କରାଯାଉଛି । ଆୟୁର୍ବେଦ ପ୍ରତିଷ୍ଠାନର ନିର୍ଦ୍ଦେଶକ କହିଛନ୍ତି ଯେ ପୂର୍ବରୁ ଆମେ ମ୍ୟାଲେରିଆ ପାଇଁ ଏହି ଔଷଧ ଦେଇଥାଉ, କିନ୍ତୁ ଏଥିରେ କିଛି ପରିବର୍ତ୍ତନ ଆସିବା ପରେ ଆମେ ଏହାକୁ କୋରୋନା ରୋଗୀଙ୍କୁ ଦେଉଛୁ।
ରାଷ୍ଟ୍ରିୟ ଆୟୁର୍ବେଦ ସଂସ୍ଥାନ କହିଛି, ଆୟୁଷ-64 ଅଧ୍ୟୟନ କରିବା ପାଇଁ ଆମେ କ୍ଲିନିକାଲ୍ ରିସର୍ଚ୍ଚ ସଂଗଠନକୁ ସାଥିରେ ଯୋଡିଛୁ। ଏହାର ଫଳାଫଳ 3-4 ମାସ ମଧ୍ୟରେ ପ୍ରକାଶ ପାଇବ । ତେବେ ପ୍ରାରମ୍ଭିକ ଫଳାଫଳ ଭଲ ଥିବାର ସେ କହିଛନ୍ତି ।
ଆୟୁଷ ମନ୍ତ୍ରୀ ଶ୍ରୀପଦ ନାଇକ କହିଛନ୍ତି ଯେ ଆୟୁଷ ମନ୍ତ୍ରଣାଳୟ ମଧ୍ୟ ନିଜ ଔଷଧ ଉପରେ କାମ କରୁଛି ଓ ଜୁଲାଇ ମାସ ସୁଦ୍ଧା ଆୟୁଷ ମନ୍ତ୍ରଣାଳୟ ମଧ୍ୟ କୋରୋନା ଔଷଧ ସହିତ ବଜାରକୁ ଆସିପାରେ। କରୋନିଲ୍ ଔଷଧ ଉପରେ ଆୟୁଷ ମନ୍ତ୍ରୀ କହିଛନ୍ତି ଯେ ବାବା ରାମଦେବ ବିନା ଅନୁମତିରେ ତାଙ୍କ ଔଷଧ ଘୋଷଣା କରିବା ଉଚିତ ନୁହେଁ।
