ଚଣ୍ଡିଗଡ: ପ୍ରବାସୀ ଶ୍ରମିକଙ୍କ ପାଇଁ ଆରମ୍ଭ ହୋଇଛି ଟ୍ରେନ ସେବା । ସମସ୍ତ ରାଜ୍ୟ ସରକାରଙ୍କ ସହଯୋଗରେ ଫସିଥିବା ପ୍ରବାସୀ ଶ୍ରମିକଙ୍କୁ ନିଜ ରାଜ୍ୟକୁ ଫେରାଇ ଆଣୁଛନ୍ତି ରାଜ୍ୟ ସରକାର । ହେଲେ ଏମିତି ଦୃଶ୍ୟ ସାମନାକୁ ଆସୁଛି ଯେଉଁଠି କିଛି ଶ୍ରମିକ ଟ୍ରେନ ସମ୍ବନ୍ଧରେ ମଧ୍ୟ ସୂଚନା ପାଇ ପାରୁନାହାନ୍ତି । ଫଳରେ ସେମାନେ ଟ୍ରକରେ ଫେରିବାକୁ ବାଧ୍ୟ ହେଉଛନ୍ତି ।
ତେବେ ମଙ୍ଗଳବାର ରାତିରେ ପଞ୍ଜାବର ଜଳନ୍ଧରରୁ ଏକ ସ୍ବତନ୍ତ୍ର ଟ୍ରେନ 1200 ପ୍ରବାସୀ ଶ୍ରମିକଙ୍କୁ ନେଇ ଉତ୍ତରପ୍ରଦେଶକୁ ବାହାରିଥିବା ନେଇ ସୂଚନା ରହିଛି । ସେହିପରି ଗୁଜୁରାଟର ରାଜକୋଟରୁ ମଧ୍ୟ 1182 ଶ୍ରମିକଙ୍କୁ ନେଇ ସ୍ବତନ୍ତ୍ର ଟ୍ରେନ ବାହାରିଛି । ସମସ୍ତ ଶ୍ରମିକ ଉତ୍ତରପ୍ରଦେଶର ବାଲିଆ ଅଞ୍ଚଳର ହୋଇଥିବା ନେଇ ସୂଚନା ରହିଛି । ହେଲେ ସେପଟେ ଗୁଜୁରାଟର ସୁରଟରେ କାମ କରୁଥିବା 50 ପ୍ରବାସୀ ଶ୍ରମିକ ଏକ ଟ୍ରକ ଦ୍ବାରା ପାଟଣାରେ ପହଞ୍ଚିଥିବା ଜଣାପଡିଛି ।
ଆଉ ଟ୍ରକ ଡ୍ରାଇଭର ଜଣଙ୍କ ଶ୍ରମିକମାନଙ୍କୁ 3500 ଟଙ୍କା ଭଡା ଦେବାକୁ କହିଥିବା ଜଣେ ଶ୍ରମିକ କହିଛନ୍ତି । ସେ ଏହା ମଧ୍ୟ କହିଛନ୍ତି ଯେ ଆମେ ଆସିବା ସମୟରେ କୌଣସି ସ୍ଥାନରେ ବି ତାଙ୍କର ସ୍ବାସ୍ଥ୍ୟ ପରୀକ୍ଷା କରାଯାଇନାହିଁ । ତେବେ ଏହା ଜଣାପଡିବା ପରେ ପୋଲିସ କର୍ମଚାରୀ ଘଟଣାସ୍ଥଳରେ ପହଞ୍ଚି ସମସ୍ତଙ୍କୁ ପାଟଣାର ଏକ ସ୍କୁଲରେ ରଖିଛନ୍ତି । ଯେଉଁଠାରେ ସେମାନଙ୍କର ସ୍ବାସ୍ଥ୍ୟ ପରୀକ୍ଷା କରାଯିବ ବୋଲି ପୋଲିସ ଅଧିକାରୀ କହିଛନ୍ତି ।
@ANI
