ନୂଆଦିଲ୍ଲୀ: ଚିକିତ୍ସା କ୍ଷେତ୍ରରେ ଏମସ ଡାକ୍ତରଙ୍କୁ ଆଉ ଏକ ବଡ ସଫଳତା । ଜଣେ ଯୁବକ 20 ସେମିର ଛୁରୀ ଗିଳିଦେବା ପରେ ଅସ୍ତ୍ରୋପଚାର କରାଯାଇ ତାଙ୍କ ଯକୃତରୁ ଏହି ଛୁରୀଟିକୁ କାଢିବାରେ ସଫଳତା ପାଇଛନ୍ତି ଡାକ୍ତର । ମାତ୍ର ଯୁବକ ଜଣଙ୍କ ଛୁରୀ ଗିଳିଦେବା ପରେ ଦୀର୍ଘ ଦୁଇମାସ ପର୍ଯ୍ୟନ୍ତ ତାଙ୍କୁ କୌଣସି ଯନ୍ତ୍ରଣା ହୋଇନଥିଲା । ପରେ ଧିରେ ଧିରେ ଶାରୀରିକ ଯନ୍ତ୍ରଣା ଆରମ୍ଭ ହେବା ପରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା ।
ସୂଚନା ଅନୁସାରେ, ଏମିତି ଏକ ଅଜବ ମାମଲା ହରିୟାଣାର ପାଲୱାଲ ଜିଲ୍ଲାର ଏକ ଗାଁରୁ ଆସିଥିବା ଜଣାପଡିଛି। 28 ବର୍ଷୀୟ ଯୁବକ ଜଣଙ୍କ ଏପରି କାଣ୍ଡ ଘଟାଇବା ପରେ କେହି ଏ ବାବଦରେ ଜାଣିବାକୁ ପାଇନଥିଲେ । ଯେତେବେଳେ ଯୁବକଙ୍କ ପେଟ ଯନ୍ତ୍ରଣା ସହ ଭୋକ ନହେବା ଲକ୍ଷଣ ଦେଖା ଦେଲା ସେତେବେଳେ ଏହି ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଥିଲା।
ଅନ୍ୟପଟେ, ଏମସ ଡାକ୍ତରଙ୍କ କହିବାନୁଯାୟୀ, ଅସ୍ତ୍ରୋପଚାର ବହୁତ ଚ୍ୟାଲେଞ୍ଜିଂ ରହିଥିଲା । ଏମିତିକି ଛୁରୀଟି ଯୁବକଙ୍କ ଯକୃତର ବିଭିନ୍ନ ସମ୍ବେଦନଶୀଳ ସ୍ଥାନରେ କ୍ଷତି କରିଥିଲା । ଯାହା ଫଳରେ ଯୁବକଙ୍କ ଜୀବନ ପ୍ରତି ବିପଦ ରହିଥିଲା ମାତ୍ର ଅସ୍ତ୍ରୋପଚାର ସଫଳ ହେବା ପରେ ଯୁବକଙ୍କ ସ୍ବାସ୍ଥ୍ୟାବସ୍ଥା ଠିକ ଥିବା ହସ୍ପିଟାଲ କର୍ତ୍ତୃପକ୍ଷ କହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
