ନୂଆଦିଲ୍ଲୀ: ଆସନ୍ତା ୧୯ ତାରିଖରେ ସାରା ଦେଶରେ ବନ୍ଦ ରହିବ ବ୍ୟାଙ୍କ ସେବା । କାରଣ ଚଳିତ ମାସ ୧୯ରେ ସର୍ବଭାରତୀୟ ବ୍ୟାଙ୍କ କର୍ମଚାରୀ ସଂଘ(All India Bank Employee Association) ପକ୍ଷରୁ ବ୍ୟାଙ୍କ ଧର୍ମଘଟ ଡାକରା ଦିଆଯାଇଛି । AIBEAର ସଦସ୍ୟମାନେ ଏହି ଧର୍ମଘଟରେ ସାମିଲ ହେଉଥିବାରୁ ବ୍ୟାଙ୍କ ସେବା ପ୍ରଭାବିତ ହେବ । ତେବେ ଧର୍ମଘଟ ଦିନ ତୃତୀୟ ଶନିବାର ପଡୁଛି ।
ସାଧାରତଃ ପ୍ରତ୍ୟେକ ମାସର ଦ୍ୱିତୀୟ ଓ ଚତୁର୍ଥ ଶନିବାର ବ୍ୟାଙ୍କ୍ ସେବା ବନ୍ଦ ରହୁଥିବା ବେଳେ ଚଳିତ ମାସରେ ତୃତୀୟ ଶନିବାର ବ୍ୟାଙ୍କ ସେବା ଧର୍ମଘଟ ଯୋଗୁଁ ବ୍ୟାହତ ହେବ । ନଭେମ୍ବର ୧୯ ଶନିବାର ଦିନ ପଡ଼ୁଛି । ଏହାର ପରଦିନ ରବିବାର ପଡୁଥିବାରୁ ଲଗାତାର ଦୁଇ ଦିନ ବ୍ୟାଙ୍କ ବନ୍ଦ ରହିବ । ଏହାର ପ୍ରଭାବରେ ବ୍ୟାଙ୍କ ଶାଖା ଓ ATM ସେବା ପ୍ରଭାବିତ ହେବ । ଦୁଇ ଦିନ ଯାଏଁ ଲୋକମାନଙ୍କୁ ATMରେ ନଗଦ ଅଭାବର ସମ୍ମୁଖୀନ ହେବାକୁ ପଡିପାରେ ।
ଏହାମଧ୍ୟ ପଢନ୍ତୁ: ବିମୁଦ୍ରୀକରଣକୁ ୬ ବର୍ଷ: ଏବେବି ରେକର୍ଡ ସ୍ତରରେ ନଗଦ କାରବାର
ବ୍ୟାଙ୍କ ଅଫ୍ ବରୋଦା ରେଗୁଲେଟାରୀ ଫାଇଲିଂରେ କହିଛି ଯେ, ସର୍ବଭାରତୀୟ ବ୍ୟାଙ୍କ କର୍ମଚାରୀ ସଂଘ(AIBEA)ର ଜେନେରାଲ ସେକ୍ରେଟାରୀ ଧର୍ମଘଟ କରିବା ପାଇଁ ଭାରତୀୟ ବ୍ୟାଙ୍କ ସଂଘ ( Indian Bank Association) ଉଦ୍ଦେଶ୍ୟରେ ନୋଟିସ ଜାରି କରିଛନ୍ତି । ନୋଟିସରେ ସଂଘ ଚାକିରି ସୁରକ୍ଷା, ଦ୍ୱିପାକ୍ଷିକ ଚୁକ୍ତିର ଉଲ୍ଲଂଘନରୁ ବିରତ ଆଦି ଦାବି ନେଇ ଆସନ୍ତା ୧୯ ତାରିଖରେ ଧର୍ମଘଟ କରିବା(Bank strike on November 19) ସମ୍ପର୍କରେ ଉଲ୍ଲେଖ କରିଛି ।
