ନୂଆଦିଲ୍ଲୀ: ଇତିହାସରେ ପ୍ରଥମ । ତିନି ଜଣ ମହିଳାଙ୍କ ସମେତ ମୋଟ ୯ ଜଣ ସୁପ୍ରିମକୋର୍ଟର ବିଚାରପତି ଭାବେ ଶପଥ ନେଲେ । ସୁପ୍ରିମକୋର୍ଟ ନୂଆ ପ୍ରେକ୍ଷାଳୟରେ ସମସ୍ତେ ଏକା ସମୟରେ ନେଲେ ଶପଥ । ଆଜି(ମଙ୍ଗଳବାର) ଏକ ସ୍ବତନ୍ତ୍ର ଉତ୍ସବରେ ସମସ୍ତ ବିଚାରପତିଙ୍କୁ ଶପଥ ପାଠ କରାଇଛନ୍ତି ସୁପ୍ରିମକୋର୍ଟ ପ୍ରଧାନ ବିଚାରପତି ଏନଭି ରମଣା ।
ତେବେ ଆଜି ଶପଥ ନେଇଥିବା ମହିଳା ବିଚାରପତି ବିଭି ନାଗରଥନା ଦେଶର ପ୍ରଥମ ମହିଳା ପ୍ରଧାନ ବିଚାରପତି ହୋଇପାରନ୍ତି । ୧୯୬୨ ମସିହା ଅକ୍ଟୋବର ୩୦ରେ ଜନ୍ମ ଗ୍ରହଣ କରିଥିବା ଜଷ୍ଟିସ ନାଗରଥନା ପୂର୍ବତନ ସିଜେଆଇ ଇଏସ ଭେଙ୍କଟରମିୟାଙ୍କ ଝିଅ । ତେବେ ଆଜି ଶପଥ ନେଇଥିବା ୩ ଜଣ ମହିଳା ବିଚାରପତି ଜଷ୍ଟିସ ନାଥ, ଜଷ୍ଟିସ ନାଗରଥନା ଓ ନରସିଂମାଙ୍କ ମଧ୍ୟରୁ କେହି ବି ଆଗାମୀ ୫ ବର୍ଷ ମଧ୍ୟରେ ହୋଇପାରନ୍ତି ଦେଶର ପ୍ରଥମ ସିଜେଆଇ ।
ସୁପ୍ରିମକୋର୍ଟରେ ୯ ଜଣ ବିଚାରପତିଙ୍କୁ ନିଯୁକ୍ତି ପାଇଁ କଲେଜିୟମ କେନ୍ଦ୍ର ସରକାରଙ୍କୁ ସୁପାରିଶ କରିଥିଲା । ଯେଉଁଥିରେ ୩ ଜଣ ମହିଳା ବିଚାରପତି ମଧ୍ୟ ଥିଲେ । ପ୍ରଥମ ଥର କଲେଜିୟମ ଏକା ଥରକେ ୩ ଜଣ ମହିଳା ବିଚାରପତିଙ୍କ ନାଁ ସୁପାରିଶ କରିଥିଲା ।
ସୂଚନାଯୋଗ୍ୟ ଯେ ସୁପ୍ରିମକୋର୍ଟରେ ମୋଟ ମଞ୍ଜୁରି ପ୍ରାପ୍ତ ବିଚାରପତି ସଂଖ୍ୟା ହେଉଛି ୩୪ । ବର୍ତ୍ତମାନ ୨୪ ଜଣ କାର୍ଯ୍ୟରତ ଥିବାବେଳେ, ଆଜିର ୯ ଜଣଙ୍କ ନିଯୁକ୍ତି ପରେ ଏହି ସଂଖ୍ୟା ୩୩ ରେ ପହଞ୍ଚିଛି । ତେବେ ଆଗାମୀ ୨ ମାସ ମଧ୍ୟରେ ପୁଣି ୨ ଜଣ ବିଚାରପତି ଅବସର ଗ୍ରହଣ କରିବେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
