ରାୟପୁର: ଭାଲୁ ଆକ୍ରମଣରେ ଚାଲିଗଲା ଚାରି ଜୀବନ । ଛତିଶଗଡର ସୁରଗୁଜା ଡିଭିଜନର କୋରିଆ ଜିଲ୍ଲାରେ ଭାଲୁ ଆକ୍ରମଣରେ ଦୁଇ ମହିଳାଙ୍କ ସମେତ ଚାରି ଜଣଙ୍କର ମୃତ୍ୟୁ ହୋଇଥିବା ପୋଲିସ ପକ୍ଷରୁ ସୂଟନା ମିଳିଛି ।
ମିଳିଥିବା ସୂଚନା ଅନୁସାରେ,ରବିବାର ସନ୍ଧ୍ୟାରେ ଅଙ୍ଗୱାହି ଗାଁର କିଛି ସ୍ଥାନୀୟ ଆଦିବାସୀ ଜଙ୍ଗଲରୁ ଜଙ୍ଗଲଜାତ ଦ୍ରବ୍ୟ ସଂଗ୍ରହ କରି ଘରକୁ ଫେରୁଥିବା ସମୟରେ ଭାଲୁ ସେମାନଙ୍କ ଉପରକୁ ଆକ୍ରମଣ କରିଥିଲା । ଦୁର୍ଘଟଣାର ଖବର ପାଇ ବିଳମ୍ବିତ ରାତି ପର୍ଯ୍ୟନ୍ତ ଜିଲ୍ଲା ପ୍ରଶାସନ, ପୋଲିସ ଏବଂ ଜଙ୍ଗଲ ବିଭାଗ ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ।
ଭାଲୁ ଭୟରେ କିଛି ଲୋକ ଗଛ ଉପରକୁ ଚଢି ଯାଇଥିବାବେଳେ ସେମାନଙ୍କ ମଧ୍ୟରୁ ଚାରିଜଣଙ୍କ ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ ଦୁଇଜଣ ମହିଳା ଥିବା ଜଣାପଡିଛି । ମୃତକମାନେ ହେଲେ ଫୁଲ ସାଇ, ଇଜୋରିଆ ସାଇ, ରାଜକୁମାରୀ ସାଇ ଏବଂଶିବଚାନ ସାଇ ବୋଲି ଜଣାପଡିଛି ।
ଆକ୍ରମଣ କରିଥିବା ଭାଲୁକୁ ବନବିଭାଗ ଦଳ ପ୍ରାୟ ଏକ ଘଣ୍ଟା ପରେ ଜଙ୍ଗଲ ଭିତରକୁ ଘଉଡାଇବାରେ ସକ୍ଷମ ହୋଇଥିଲେ । ଆହତ ହୋଇଥିବା ବ୍ୟକ୍ତିମାନଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି ।
