ଲକ୍ଷ୍ନୌ: ଉତ୍ତରପ୍ରଦେଶର କାସଗଞ୍ଜ ଜିଲ୍ଲାରେ ରବିବାର ନିର୍ମାଣଧୀନ କୋଠାର ଗୋଟିଏ ପାର୍ଶ୍ବ ଭାଙ୍ଗିପଡିଥିବା ଦେଖିବାକୁ ମିଳିଛି । ଏହି ଘଟଣାରେ 3 ଜଣଙ୍କର ମୃତ୍ୟୁ ଘଟିଥିବା ବେଳେ 12 ଜଣ ଆହତ ହୋଇଛନ୍ତି । ଆହତଙ୍କୁ ତୁରନ୍ତ ନିକଟସ୍ଥ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି ।
କାଶଗଞ୍ଜ ଜିଲ୍ଲା ଜନପଦର ସଦର କୋତବାଲି ଅଞ୍ଚଳରେ ରାଜିବ ବିଡଲା ନାମକ ଜଣେ ଦୋକାନୀଙ୍କ ଦୋକାନ ନିର୍ମାଣ କାର୍ଯ୍ୟ ହେଉଥିଲା । ତେବେ ଏହି ସମୟରେ ଦୋକାନର ସଟର ପକାଇବା ସମୟରେ ନିର୍ମାଣଧୀନ କୋଠାର ଗୋଟିଏ ପାର୍ଶ୍ବ ଭାଙ୍ଗିପଡିଥିଲା । ଫଳରେ ଏହା ତଳେ ଦୋକାନୀଙ୍କ ଭାଇ କୁଲଦୀପ ବିଡଲାଙ୍କ ସମେତ ଅନ୍ୟ କିଛି ଲୋକ ପୋତି ହୋଇଯାଇଥିଲେ । ଏହି ଘଟଣାଟି ହଠାତ ଘଟିବା ପରେ ସେଠାରେ ହଇଚଇ ସୃଷ୍ଟି ହୋଇଥିଲା ।
ଖବର ପାଇବା ପରେ ପ୍ରଶାସନର ଉଦ୍ଧାରକାରୀ ଦଳ ସେଠାରୁ 12 ଜଣଙ୍କୁ ଉଦ୍ଧାର କରିଥିଲେ । ଏହି ଦୁର୍ଘଟଣାରେ ଦୋକାନୀଙ୍କ ଭାଇ କୁଲଦୀପଙ୍କର ମୃତ୍ୟୁ ଘଟିଛି । ବର୍ତ୍ତମାନ ମଧ୍ୟ ପ୍ରଶାସନର ଉଦ୍ଧାର କାର୍ଯ୍ୟ ଜାରି ରହିଥିବା ବେଳେ ସେଠାରେ ଏସପି ଆଦିତ୍ୟ ପ୍ରକାଶ ବର୍ମାଙ୍କ ସହିତ ଅନ୍ୟ ପୋଲିସ ଅଧିକାରୀମାନେ ଉପସ୍ଥିତ ରହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
