ହାଇଦ୍ରାବାଦ: ପଡୋଶୀ ରାଜ୍ୟ ତେଲେଙ୍ଗାନାରେ ଫେରିଛି ଲକଡାଉନ । 10 ଦିନ ତେଲେଙ୍ଗାନାରେ ଝୁଲିବ ତାଲା । କୋରୋନା ସଂକ୍ରମଣ ବୃଦ୍ଧିକୁ ଦୃଷ୍ଟିରେ ରଖି ରାଜ୍ୟ କ୍ୟାବିନେଟ ବୈଠକରେ ନିଆଯାଇଛି ବଡ ନିଷ୍ପତ୍ତି ।
ଆଜି(ବୁଧବାର)ଠାରୁ ଆସନ୍ତା 10 ଦିନ ପର୍ଯ୍ୟନ୍ତ ତେଲେଙ୍ଗାନାରେ ଲକଡାଉନ ଘୋଷଣା କରାଯାଇଛି । ମଙ୍ଗଳବାର ବସିଥିଲା ତେଲେଙ୍ଗାନା ସରକାରଙ୍କ କ୍ୟାବିନେଟ ବୈଠକ । ଏହି ବୈଠକରେ କୋରୋନା ସଂକ୍ରମଣ ବୃଦ୍ଧିକୁ ନେଇ ଆଲୋଚନା କରାଯାଇଥିଲା । ଆଉ ଏହା ପରେ ଲକଡାଉନ ଲାଗୁ କରିବାକୁ ନିଷ୍ପତ୍ତି ନିଆଯାଇଛି ।
ବୁଧବାର ଦିନ 10ଟାରୁ ତେଲେଙ୍ଗାନାରେ ଆରମ୍ଭ ହେବ ଲକଡାଉନ । ପ୍ରତ୍ୟେକ ଦିନ ସକାଳ 6ଟାରୁ ଦିନ 10ଟା ଯାଏଁ ସମସ୍ତ ପ୍ରକାର କାର୍ଯ୍ୟକଳାପକୁ ଅନୁମତି ଦିଆଯିବ । ହେଲେ ଦିନ 10ଟା ପରେ ସମଗ୍ର ରାଜ୍ୟରେ ସମ୍ପୂର୍ଣ୍ଣ ଲକଡାଉନ ଲାଗିବ ।
ଏହାପୂର୍ବରୁ ହାଇଦ୍ରାବାଦର ଚାରମୀନାରରେ ପ୍ରବଳ ଭିଡକୁ ନେଇ ସରକାରଙ୍କ ଉପରେ ଉଠିଥିଲା ପ୍ରଶ୍ନ । କୋରୋନା ସଂକ୍ରମଣ ବୃଦ୍ଧି ମଧ୍ୟରେ ଚାରମୀନାରରେ ପ୍ରବଳ ଭିଡ ଦେଖିବାକୁ ମିଳିଥିଲା । ଏହା ପରେ ସରକାର ଘଟଣାକୁ ଗମ୍ଭୀରତାର ସହ ନେଇଛନ୍ତି ।
