ଜିଲ୍ଲା ଭିତ୍ତିକ ନିଯୁକ୍ତି ଦାବିରେ ଗର୍ଜିଲେ ଆଶାୟୀ, ଜିଲ୍ଲାପାଳଙ୍କ କାର୍ଯ୍ୟାଳୟରେ ଦେଲେ ଧାରଣା

Aspirant youth Protest Over District based recruitment in Nabarangpur ନବରଙ୍ଗପୁର: ଜିଲ୍ଲାରେ ଜୋର ଧରିଲା ଜିଲ୍ଲା ଭିତ୍ତିକ ନିଯୁକ୍ତି ଦାବି । ଜିଲ୍ଲା ଭିତ୍ତିକ ନିଯୁକ୍ତି ଦାବିରେ ଗର୍ଜିଲେ ଶତାଧିକ ଶିକ୍ଷିତ ବେକାର ଯୁବକ ଯୁବତୀ । ଶୁକ୍ରବାର ନବରଙ୍ଗପୁର ସଦର ପୋଲିସ ଷ୍ଟେସନ ନିକଟରୁ ଶହ ଶହ ଶିକ୍ଷିତ ବେକାର ଯୁବକ ଯୁବତୀ ଏକ ବିଶାଳ ରାଲି କରି ସହର ପରିକ୍ରମା କରିବା ସହ ନବରଙ୍ଗପୁର କାର୍ଯ୍ୟାଳୟ ସମ୍ମୁଖରେ ପହଞ୍ଚି ପ୍ରତିବାଦ କରିଛନ୍ତି । ହାତରେ ପ୍ଲାକାର୍ଡ ଧରି ଯୁବକ ଯୁବତୀମାନେ ପ୍ରତିବାଦ କରିଥିଲେ । ସରକାର ବିରୋଧୀ ନାରା ଦେବା ସହିତ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଛନ୍ତି । 

ଆନ୍ଦୋଳକାରୀଙ୍କ ଅଭିଯୋଗ ଅନୁଯାୟୀ, ନବରଙ୍ଗପୁର ଭଳି ଆଦିବାସୀ ଅଧ୍ୟୁଷିିତ ଜିଲ୍ଲାରେ ହଜାର ହଜାର ଶିକ୍ଷିତ ଆଦିବାସୀ ଯୁବକ ଯୁବତୀ ଚାକିରୀ ଆଶାୟୀ ଥିବା ବେଳେ ସରକାର କିନ୍ତୁ ସେମାନଙ୍କ ପ୍ରତି ଅଣଦେଖା କରି ବାହାର ଜିଲ୍ଲାର ପ୍ରାର୍ଥୀଙ୍କୁ ଚାକିରି ଦେଉଛନ୍ତି । ଯାହାଫଳରେ ଜିଲ୍ଲାର ପ୍ରାର୍ଥୀମାନେ ଚାକିରୀ ନ ପାଇ ବେକାର ହୋଇ କର୍ମସଂସ୍ଥାନ ସନ୍ଧାନରେ ବାହାର ରାଜ୍ୟକୁ ଦାଦନ ଖଟିବା ପାଇଁ ଯିବାକୁ ବାଧ୍ୟ ହେଉଛନ୍ତି । ଯଦି ସରକାର ଏନେଇ ହୃଦବୋଧ କରି କୌଣସି ପଦକ୍ଷେପ ନ ନିଅନ୍ତି ତେବେ ଆଗାମୀ ଦିନରେ ପ୍ରତିବାଦ ଜୋରଦାର କରାଯିବ ବୋଲି କହିଛନ୍ତି ଆନ୍ଦୋଳନକାରୀ । ଏହାସହ ଏନେଇ ମୁଖ୍ୟମନ୍ତ୍ରୀଙ୍କ  ଉଦ୍ଦେଶ୍ୟରେ ଏକ ଦାବିପତ୍ର ଜିଲ୍ଲାପାଳଙ୍କୁ ପ୍ରଦାନ କରିଛନ୍ତି ।

ଇଟିଭି ଭାରତ, ନବରଙ୍ଗପୁର