ପୁଣି ଦୁଆରଶୁଣୀ ଘାଟିରେ ଦୁର୍ଘଟଣା, ହୁହୁ ହୋଇ ଜଳିଗଲା ପିଆଜ ବୋଝେଇ ଟ୍ରକ୍ - Truck Catches Fire

Truck Catches Fire At Duarsuni Ghati: ରାଇରଙ୍ଗପୁର : ଦୁଆରଶୁଣୀ ଘାଟିରେ ଥମିବାର ନାଁ ନେଉନି ଦୁର୍ଘଟଣା । ଆଜି ପୁଣି ଏକ ଦୁର୍ଘଟଣାର ଖବର ଆସିଛି । ଭାରସାମ୍ୟ ହରାଇ ଏକ ପିଆଜ ବୋଝେଇ ଟ୍ରକ ଦୁର୍ଘଟଣାଗ୍ରସ୍ତ ହେବା ପରେ ହୁ ହୁ ହୋଇ ଜଳିଯାଇଛି । ମୟୂରଭଞ୍ଜ ଜିଲ୍ଲା ବିଶୋଇ ଥାନା ଅନ୍ତର୍ଗତ ବିଶୋଇ-ବାଙ୍ଗିରିପୋଷି ଦେଇ ଯାଇଥିବା ୪୯ ନମ୍ବର ଜାତୀୟ ରାଜପଥ ରାଜାବସା ଗ୍ରାମ ନିକଟରେ ଏହି ଦୁର୍ଘଟଣା ଘଟିଛି। ଟ୍ରକଟି ପିଆଜ ବୋଝେଇ କରି କୋଲକାତା ଅଭିମୁଖେ ଯାଉଥିବା ବେଳେ ଟ୍ରକରେ ନିଆଁ ଲାଗିଯାଇଥିଲା। ଖବର ପାଇ ଘଟଣାସ୍ଥଳରେ ଉଭୟ ବିଶୋଇ ଓ ବାଙ୍ଗିରିପୋଷି ଅଗ୍ନିଶମ ବାହିନୀ କର୍ମଚାରୀ ପହଞ୍ଚି ନିଆଁକୁ ଆୟତ୍ତ କରିବାକୁ ଚେଷ୍ଟା ଚଳାଇଥିଲେ। ହେଲେ ସେତେବେଳକୁ ଟ୍ରକଟି ସମ୍ପୂର୍ଣ୍ଣ ଜଳି ପୋଡ଼ି ପାଉଁଶ ହୋଇଯାଇଥିଲା। 

ପୋଲିସ ଘଟଣାସ୍ଥଳରେ ପହଞ୍ଚିଥିବାବେଳେ ସୁରକ୍ଷା ଦୃଷ୍ଟିରୁ କିଛି ଘଣ୍ଟା ପାଇଁ ଉଭୟ ପଟୁ ଗାଡି଼ ଚଳାଚଳ ବନ୍ଦ ରଖିଥିଲେ। ତେବେ ଟ୍ରକ ଚାଳକ ଓ ହେଲପର ଘଟଣାସ୍ଥଳରୁ ପଳାଇଯାଇଥିବାରୁ ସୁରକ୍ଷିତ ଥିବା ଜଣାପଡ଼ିଛି। ବିଶୋଇ ଥାନା ପୋଲିସ ଏକ ଦୁର୍ଘଟଣା ମାମଲା ରୁଜୁ କରି ତଦନ୍ତ ଚଳାଇଛି। ଗାଡ଼ି ଚାଳକମାନେ ଘାଟି ରାସ୍ତାରେ ଦ୍ରୁତ ଗତିରେ ଯାଉଥିବାରୁ ବାରମ୍ବାର ଘଟୁଛି ଦୁର୍ଘଟଣା। ଫଳରେ ଅନେକ ଧନ ଜୀବନ ହାନି ହେଉଛି । ଘାଟି ରାସ୍ତାର ସମ୍ପ୍ରସାରଣ ପାଇଁ ପାହାଡ଼ରେ ବ୍ଲାଷ୍ଟିଂ କରାଯାଇ ପଥର ସବୁ ଫଟାଯାଉଥିଲା। ବର୍ତ୍ତମାନ ସାଧାରଣ ନିର୍ବାଚନକୁ ଦୃଷ୍ଟିରେ ରଖି ଘାଟିରେ ବ୍ଲାଷ୍ଟିଂ ବନ୍ଦ କରାଯାଇଛି। ଏସବୁ ଭିତରେ ପୁଣି ଥରେ ଆଜି ଦୁଆରଶୁଣୀ ଘାଟିରେ ଘଟିଯାଇଛି ଏକ ଦୁର୍ଘଟଣା। 

ଇଟିଭି ଭାରତ, ମୟୂରଭଞ୍ଜ