ରାଜୁ ଦାସଙ୍କୁ ଟିକେଟ୍ ପରେ ସୋର ବିଜେପିରେ ଅସନ୍ତୋଷ, ପ୍ରାର୍ଥିତ୍ବ ପୁନର୍ବିଚାର ପାଇଁ ଜୋର ଧରିଲା ଦାବି - Odisha Assembly Polls

Soro BJP workers expresses dissatisfaction: ବାଲେଶ୍ୱର: ଆସନ୍ତା ବିଧାନସଭା ନିର୍ବାଚନ ପାଇଁ ବାଲେଶ୍ବର ଜିଲ୍ଲାର ୫ଟି ଯାକ ଆସନରେ ବିଜେପି ପ୍ରାର୍ଥୀ ଘୋଷଣା କରିଛି । ତେବେ ଏଥର ସୋର ଆସନରେ ଧାମନଗର ଅଞ୍ଚଳର ରାଜେନ୍ଦ୍ର ଦାସକୁ ଟିକେଟ୍ ଦେଇଛି ଦଳ, ଯିଏକି ଗତ ଧାମନଗର ଉପନିର୍ବାଚନ ସମୟରେ ବିଜେଡି ଛାଡି ବିଜେପିରେ ମିଶିଥିଲେ । ଏବେ ତାଙ୍କୁ ସୋର୍ ନିର୍ବାଚନ ମଣ୍ଡଳୀ ପ୍ରାର୍ଥୀ ଘୋଷଣା କରାଯିବା ପରେ ସୋର ଅଞ୍ଚଳର ବହୁ ପୁରୁଣା ନେତା ତଥା ଦୁଇଥର ବିଜେପିରେ ଟିକେଟ ନିର୍ବାଚନ ଲଢ଼ିଥିବା ନେତା ଏବଂ ଆଶାୟୀମାନଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖିବାକୁ ମିଳିଛି । ମଙ୍ଗଳବାର ସନ୍ଧ୍ୟାରେ ସୋର ବିଜେପି କାର୍ଯ୍ୟାଳୟ ଆଗରେ ସ୍ଥାନୀୟ ଅଞ୍ଚଳର କିଛି ନେତା ଓ କର୍ମୀମାନେ ଏକଜୁଟ ହୋଇ ରାଜେନ୍ଦ୍ର ଦାସଙ୍କ ପ୍ରାର୍ଥୀତ୍ବ ନେଇ ଅସନ୍ତୋଷ ଜାହିର୍ କରିଛନ୍ତି ଏବଂ ପ୍ରାର୍ଥୀ ଚୟନର ପୁନର୍ବିଚାର କରିବାକୁ ଦାବି କରିଛନ୍ତି । ସୋର ନିର୍ବାଚନ ମଣ୍ଡଳୀର ବିଧାୟକ ଆଶାୟୀ ପ୍ରାର୍ଥୀ ରାକେଶ ମଲ୍ଲିକ କର୍ମୀମାନଙ୍କୁ ଧୈର୍ଯ୍ୟ ରଖିବାକୁ କହିଥିବା ବେଳେ ପ୍ରାର୍ଥୀ ଚୟନରେ ପୁନର୍ବିଚାର କରାଯିବା ନେଇ ଆଶା ପୋଷଣ କରିଛନ୍ତି । ସୋର ଆସନରୁ ରାକେଶ ମଲ୍ଲିକଙ୍କ ସହ ରବୀନ୍ଦ୍ର ଜେନା ଏବଂ ଈଶ୍ୱର ବେହେରା ପ୍ରମୁଖ ଆଶାୟୀ ଥିବାବେଳେ ଦଳର ଏଭଳି ନିଷ୍ପତ୍ତି ସେମାନଙ୍କୁ ହତୋତ୍ସାହିତ କରିଛି । ଯେଉଁଥିପାଇଁ ଆଜି ବିଜେପି କାର୍ଯ୍ୟାଳୟରେ କର୍ମୀ ଏବଂ ନେତାମାନେ ଏକଜୁଟ ହୋଇ ଆଉଥରେ ବିଚାର କରି ଉପଯୁକ୍ତ ପ୍ରାର୍ଥୀଙ୍କ ନାମ ଘୋଷଣା କରିବା ପାଇଁ ଦାବି କରିଛନ୍ତି ।

 

ଇଟିଭି ଭାରତ, ବାଲେଶ୍ୱର