ଠାକୁରଙ୍କୁ ଛାଡିଲେନି ଚୋର, ପଞ୍ଚମୁଖୀ ହନୁମାନ ମନ୍ଦିରରେ ବୁଲାଇଲେ କଳାକନା

କଟକ: ଲୁଟେରାଙ୍କ ଟାର୍ଗେଟରେ କଟକ ଖାନନଗର ଅଞ୍ଚଳର ପ୍ରସିଦ୍ଧ ପଞ୍ଚମୁଖୀ ହନୁମାନ ମନ୍ଦିର । କବାଟ ତାଡି ଲୁଟିନେଲେ ପ୍ରଭୁ ହନୁମାନ ଓ ମା' ସୀତାଙ୍କ ଦୁର୍ଲଭ ସୁନା ଓ ରୁପା ଅଳଙ୍କାର । ଆଜି (ଶନିବାର) ପ୍ରବଳ ଶ୍ରଦ୍ଧାଳୁଙ୍କ ସମାଗମ ଉଦ୍ଦେଶ୍ୟରେ ଗତକାଲି ବିଳମ୍ବିତ ରାତିରେ ପ୍ରଭୁଙ୍କୁ ସୁନା ରୁପା ଅଳଙ୍କାରରେ ସଜ୍ଜିତ କରାଯାଇଥିଲା । କିନ୍ତୁ ଦୃର୍ବୁତ୍ତମାନେ ରାତିରେ ପ୍ରଭୁଙ୍କ ଶ୍ରୀମୁଖରୁ ଏସବୁ କାଢ଼ିନେଇ ଚମ୍ପଟ ମାରିଛନ୍ତି । ଯୋଜନା ବଦ୍ଧ ଭାବରେ ଏହା କରାଯାଇଥିବା ମନ୍ଦିର ମୁଖ୍ୟ ପୂଜକ ସନ୍ଦେହ କରୁଥିବା ବେଳେ ଏନେଇ ଏତଲା ଦେଇଛନ୍ତି ।

ସେପଟେ ପୋଲିସ ଡଗ ସ୍କ୍ବାର୍ଡ ନେଇ ଘଟଣାର ଛାନଭିନ ଆରମ୍ଭ କରିଛି । ଲୁଟେରାମାନେ ହନୁମାନଙ୍କ ମୁକୁଟ, ଗଦା, ଚିତା ମୁଖପାଟି ଓ ଶ୍ରୀଅଙ୍ଗ ମାଳି ଏବଂ ମା' ସୀତାଙ୍କ ମୁକୁଟ ଆଦି ଚୋରି କରିନେଇଛନ୍ତି । ଯାହାର ଅନୁମାନିକ ମୂଲ୍ୟ ୭୦ ଲକ୍ଷରୁ ଅଧିକ ହେବ । ଲୁଟ ନେଇ ଆଜି ସକାଳେ ପ୍ରଥମେ ମନ୍ଦିର ପୂଜକ ଜାଣିବା ପରେ ସମସ୍ତଙ୍କୁ ଜଣାଇବା ସହିତ ପୋଲିସକୁ ଖବର ଦେଇଥିଲେ । ଦୁର୍ବୃତ୍ତମାନେ ମନ୍ଦିର ପଛପଟ ଲୁହା ଗେଟ ଶିକୁଳି ଭାଙ୍ଗି ଭିତରେ ପ୍ରବେଶ କରିଥିବା ଦେଖିବାକୁ ମିଳିଛି । ଏହି ଚୋରି ଘଟଣାରେ ମଧୁପାଟଣା ଥାନା ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛ । 

ଡିସିପି ମଧ୍ୟ ମନ୍ଦିରରେ ପହଞ୍ଚି ଘଟଣାର ତର୍ଜମା କରିଛନ୍ତି । ସାଇଣ୍ଟିଫିକ ଟିମ, ଡଗ ସ୍କ୍ୱାର୍ଡ ଓ ସ୍ପେଶାଲ ସ୍କ୍ୱାର୍ଡ ପହଞ୍ଚି ଘଟଣାର ଅଧିକ ତଦନ୍ତ କରୁଛନ୍ତି । ପ୍ରାଥମିକ ତଦନ୍ତରୁ ହନୁମାନଙ୍କ ସ୍ଵର୍ଣ୍ଣ ଓ ରୌପ୍ୟ ଅଳଙ୍କାର ଚୋରି ଯାଇଥିବା ବେଳେ ମନ୍ଦିରର ପଛପଟ ଗେଟ ଭାଙ୍ଗି ଦୁର୍ବୃତ୍ତମାନେ ମନ୍ଦିରେ ପଶିଥିବା ଜଣାପଡିଛି । ପାଖାପାଖି ରାତି ୨ରୁ ୩ଟା ଭିତରେ ଚୋରି ହୋଇଥିବା ବେଳେ ପୋଲିସ ସିସିଟିଭି ଆଧାରରେ ଅଧିକ ତଦନ୍ତ କରୁଛି ବୋଲି କହିଛନ୍ତି କଟକ ଡିସିପି ଜଗମୋହନ ମୀନା ।

ଏହା ମଧ୍ୟ ପଢ଼ନ୍ତୁ...କଳାକନା ବୁଲାଇଲା ପଡ଼ୋଶୀ, ୧୬ ଲକ୍ଷ ଟଙ୍କା ସହ ଲୁଟିଲା ସୁନା ଓ ରୁପା ଏହା ମଧ୍ୟ ପଢ଼ନ୍ତୁ...ନିଜ ଅଫିସରେ ବୁଲାଇଥିଲେ କଳାକନା, 5 ଜଣଙ୍କୁ ବାନ୍ଧିଲା ପୋଲିସ

ଇଟିଭି ଭାରତ, କଟକ