ସାତ ଦିନ ହେଲାଣି ଅନ୍ଧାରରେ ଗାଁ, ଟ୍ରାନ୍ସଫର୍ମର ଦାବିରେ ବିଦ୍ୟୁତ କାର୍ଯ୍ୟାଳୟ ଘେରାଉ - Public Protest in Niali

PUBLIC DEMAND FOR ELECTRICITY: ନିଆଳି: ବିଦ୍ୟୁତ କାର୍ଯ୍ୟାଳୟ ଘେରିଲେ ଗ୍ରାମବାସୀ । ଖରା ସାଙ୍ଗକୁ ଅସହ୍ୟ ଗୁଳି ଗୁଳି ଜନ ଜୀବନକୁ ଅସ୍ତବ୍ୟସ୍ତ କରି ଦେଉଛି । ଆଉ ଏଇ ସମୟରେ ଦାଉ ସାଜିଛି ନିଆଳିରେ ବିଦ୍ୟୁତ କାଟ । ସାତ ଦିନ ଧରି ବିଦ୍ୟୁତ ଟ୍ରାନ୍ସଫର୍ମର ଅଚଳ ହୋଇଯାଇଛି ହେଲେ ବିଦ୍ୟୁତ୍‌ ବିଭାଗ ନୂତନ ଟ୍ରାନ୍ସଫର୍ମ ବସାଇବା ପାଇଁ ନାଁ ଧରୁନଥିବା ଅଭିଯୋଗ କରିଛନ୍ତି ଗ୍ରାମବାସୀ ।

କଟକ ଜିଲ୍ଲା ନିଆଳି ଟିପିସିସିଡିଓଏଲ ବିଦ୍ୟୁତ ଉପଖଣ୍ଡ ଅଧିନ ବଡ କୋରକୋର ଓ ନାକଟା ସାହିକୁ ସଂଯୋଗ ହୋଇଥିବା ଟ୍ରାନ୍ସଫର୍ମ ଗତ ୧୨ ତାରିଖରୁ ଅଚଳ ହୋଇପଡିଛି ।‌ ଏ ସମ୍ପର୍କରେ ବାରମ୍ବାର ଅଭିଯୋଗ ସତ୍ତ୍ୱେ ବିଭାଗ କର୍ମଚାରୀ ନ ଶୁଣିବାରୁ ଶେଷରେ ଦୁଇ ଗ୍ରାମବାସୀ ବିଦ୍ୟୁତ କାର୍ଯ୍ୟାଳୟ ଘେରାଉ କରିଛନ୍ତି ।‌ ହେଲେ ବିଦ୍ୟୁତ କାର୍ଯ୍ୟାଳୟରେ ତଳିଆ କର୍ମଚାରୀଙ୍କୁ ଛାଡି ଦେଲେ ଉପରିସ୍ଥ ଅଧିକାରୀ‌ ଅନୁପସ୍ଥିତ ଥିବା ଅଭିଯୋଗ କରିଛନ୍ତି ଉପଭୋକ୍ତା । ଖବର ପାଇ ନିଆଳି ପୋଲିସ ଘଟଣାସ୍ଥଳ ପହଞ୍ଚି ଲୋକଙ୍କ ସହିତ ଆଲୋଚନା କରିଛି । ତେବେ ଆଜି ଯଦି ନୂତନ ଟ୍ରାନ୍ସଫର୍ମ ନବସେ ତେବେ ଗ୍ରାମବାସୀ ମାନେ ରାଜରାସ୍ତାକୁ ଓହ୍ଲାଇବେ ବୋଲି ଧମକ ଦେଇଛନ୍ତି ।  

ଇଟିଭି ଭାରତ, ନିଆଳି