ପୂରଣ ହେଲା ଦୀର୍ଘ ଦିନର ଦାବି, ୱାଗନ୍ କାରଖାନାର ଭିତ୍ତିପ୍ରସ୍ତର ସ୍ଥାପନ କଲେ ପ୍ରଧାନମନ୍ତ୍ରୀ

Wagon Factory in Balangir: ବଲାଙ୍ଗୀର: ଜିଲ୍ଲାବାସୀଙ୍କ ଦୀର୍ଘ ଦିନର ଦାବି ପୂରଣ ହୋଇଛି । କାଣ୍ଟାବାଞ୍ଜିରେ ୱାଗନ୍ ପିରିଓଡିକାଲ୍ ଓଭର ହୌଲିଙ୍ଗ କାରଖାନାର ଭିତ୍ତିପ୍ରସ୍ତର ସ୍ଥାପନ କରିଛନ୍ତି ପ୍ରଧାନମନତ୍ରୀ ନରେନ୍ଦ୍ର ମୋଦି । ଏନେଇ ଅଞ୍ଚଳରେ ଖୁସିର ମାହୋଲ ଥିବା ବେଳେ ପ୍ରଧାନମନ୍ତ୍ରୀ ମୋଦିଙ୍କୁ ଧନ୍ୟବାଦ୍ ଦେଇଛନ୍ତି ସ୍ଥାନୀୟ ସାଂସଦ । ବଲାଙ୍ଗୀର ଦୀର୍ଘ 24 ବର୍ଷର ଦାବି ଥିଲା ଯେ ବଲାଙ୍ଗୀର କଣ୍ଟାବାଞ୍ଜି ଠାରେ ରେଳ ୱାଗନ କାରଖାନା ସ୍ଥାପନ ହେଉ । ଯାହାଦ୍ବାରା ଜିଲ୍ଲାର ଦାଦନ ସମସ୍ୟା ପ୍ରଶମିତ ହେବ । ତେବେ ଏନେଇ ଗତକାଲି(ମଙ୍ଗଳବାର) ପ୍ରଧାନମନ୍ତ୍ରୀ ମୋଦି ଓଡ଼ିଶା ଗସ୍ତରେ ଆସିଥିବା ବେଳେ ବଲାଙ୍ଗୀର କଣ୍ଟାବାଞ୍ଜି ଠାରେ ୱାଗନ କାରଖାନା ନିର୍ମାଣ ପାଇଁ ଭିତ୍ତିପ୍ରସ୍ତର କରିଛନ୍ତି । 244 କୋଟି 77 ଲକ୍ଷ ଟଙ୍କାରେ ଏହାର ନିର୍ମାଣ ହେବ ଯାହାଦ୍ବାରା ଏଠିକାର ଲୋକେ ନିଯୁକ୍ତି ପାଇବେ ବୋଲି କୁହାଯାଇଛି । ତେବେ ଏନେଇ କଣ୍ଟାବାଞ୍ଜି ଠାରେ ରେଳ ବିଭାଗ ପକ୍ଷରୁ ଏକ ଶୋଭା କାର୍ଯ୍ୟକ୍ରମର ଆୟୋଜନ ହୋଇଥିଲା । ଯେଉଁଥିରେ ରେଳ ଅଧିକାରୀଙ୍କ ସହ ବଲାଙ୍ଗୀର ସାଂସଦ ସଙ୍ଗୀତା କୁମାରୀ ସିଂହ ଦେଓ ପ୍ରମୁଖ ଉପସ୍ଥିତ ରହି ଏଥିପାଇଁ ପ୍ରଧାନ ମନ୍ତ୍ରୀ ନରେନ୍ଦ୍ର ମୋଦି ଓ ରେଳମନ୍ତ୍ରୀ ଅଶ୍ଵିନୀ ବୈଷ୍ଣବଙ୍କୁ ଧନ୍ୟବାଦ ଜଣାଇଛନ୍ତି । 

ଇଟିଭି ଭାରତ, ବଲାଙ୍ଗୀର