ଯାତ୍ରାରେ ଅଶ୍ଳୀଳ ନୃତ୍ୟକୁ ନେଇ ଉତ୍ତେଜନା, ଚେୟାର ଫୋପାଡିଲେ ଦର୍ଶକ

ଯାଜପୁର: ପୁଣି ଅଶୀଳ ନୃତ୍ୟ ପରିବେଷଣକୁ ବିରୋଧ । ଯାଜପୁରରେ ଯାତ୍ରା ସ୍ୱପ୍ନମହଲର କାର୍ଯ୍ୟକ୍ରମବେଳେ ଡ୍ୟାନ୍ସର ନିଶା ମହାରଣା ନୃତ୍ୟ କରୁଥିବାବେଳେ ଚେୟାର ମାଡ଼ ହୋଇଛି । ଚେୟାର ମାଡରେ ଆଇଟମ ଡ୍ୟାନ୍ସର ନିଶା ମହାରଣାଙ୍କ ମୁଣ୍ଡରେ ଆଘାତ ଲାଗିଛି। ସୂଚନା ଅନୁସାରେ, ଯାଜପୁର ଜିଲ୍ଲା କୋରେଇ ଥାନା ରଗଡିଠାରେ ମା' କାମୁଡ଼େଇ ଆଞ୍ଚଳିକ ଯୁବକ ସଂଘ ପକ୍ଷରୁ ଅୟୋଜିତ ହୋଇଥିଲା ଏହି ଯାତ୍ରା । 

ଗତକାଲି (ମଙ୍ଗଳବାର) ରାତିରେ ଯାତ୍ରା ସ୍ଵପ୍ନ ମହଲର ତୃତୀୟ ରଜନୀ ଥିଲେ । ଅତିଥି କଳାକାର ଭାବେ ମେଲୋଡିରେ ଆସି ଆଇଟମ ଗୀତରେ ନିଶା ନୃତ୍ୟ ପରିବେଷଣ କରୁଥିବାବେଳେ ଅଶ୍ଳୀଳତାକୁ ବିରୋଧ କରି ଜଣେ ଦର୍ଶକ ତାଙ୍କ ଉପରକୁ ଚେୟାର ମାଡ କରିଥିବା ଜଣାପଡିଛି । ସେପଟେ ଚେୟାର ମାଡ ଘଟଣାକୁ ନେଇ ଉଭୟ ମଞ୍ଚ ଉପରେ ଓ ବାହାରେ କିଛି ସମୟ ପାଇଁ ଉତ୍ତେଜନା ଲାଗି ରହିଥିଲା। କୋରେଇ ପୋଲିସ ଘଟଣାସ୍ଥଳରେ ପହଞ୍ଚି ପରିସ୍ଥିତିକୁ ନିୟନ୍ତ୍ରଣକୁ ନେଇଥିଲା । କୋରେଇ ପୋଲିସ ଓ ଯାତ୍ରା କମିଟି ସଦସ୍ୟମାନେ ତାଙ୍କୁ କୋରେଇ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରି ପ୍ରାଥମିକ ଚିକିତ୍ସା କରିଥିବା ଜଣାପଡିଛି । ସେପଟେ ଏହି ଘଟଣାକୁ ନେଇ ଦୁଃଖ ପ୍ରକାଶ କରିଛନ୍ତି କମିଟିର ସଦସ୍ୟ ।

ଇଟିଭି ଭାରତ, ଯାଜପୁର