ବୌଦ୍ଧରେ ବିଧାୟକ ଓ କନ୍ଧମାଳ ସାଂସଦଙ୍କୁ ସମ୍ବର୍ଦ୍ଧନା - ELECTED MLA AND MP Felicitation

ବୌଦ୍ଧ: ନବ ନିର୍ବାଚିତ ବିଧାୟକ ତଥା ସାଂସଦଙ୍କୁ ଜିଲ୍ଲାର ବିଭିନ୍ନ ସ୍ଥାନରେ ସ୍ବାଗତ କରାଯାଇଛି । ବୌଦ୍ଧ ଜିଲ୍ଲା ସଦର ମହକୁମା ଠାରେ ବିଭିନ୍ନ ସଙ୍ଗଠନ ପକ୍ଷରୁ ନାଗରିକ ସମ୍ବର୍ଦ୍ଧନା ଜ୍ଞାପନ କରାଯାଇଛି । ଏହି ଅବସରରେ ଉଭୟ ନିର୍ବାଚିତ ସଦସ୍ୟ ଅଞ୍ଚଳର ବିକାଶ ପାଇଁ ସମସ୍ତଙ୍କ ସହଯୋଗ କାମନା କରିବା ସହିତ ଉଭୟଙ୍କୁ ନିର୍ବାଚିତ କରିଥିବାରୁ ନିର୍ବାଚନ ମଣ୍ଡଳୀର ସମସ୍ତଙ୍କୁ କୃତଜ୍ଞତା ଜ୍ଞାପନ କରିଥିଲେ । ବୌଦ୍ଧର ବିଧାୟକ ସରୋଜ କୁମାର ପ୍ରଧାନ ଓ କନ୍ଧମାଳ ସାଂସଦ ସୁକାନ୍ତ କୁମାର ପାଣିଗ୍ରାହୀ ଶନିବାର ପ୍ରଥମେ ବୌଦ୍ଧ ଜିଲ୍ଲାର ଆରାଧ୍ୟ ଦେବୀ ମା’ ଭୈରବୀଙ୍କ ମନ୍ଦିରରେ ପହଞ୍ଚି ଆଶୀର୍ବାଦ ନେଇଥିଲେ । ପରେ ପୁରୁଣା କଟକ ଡାକ୍ତରଖାନାରେ ପହଞ୍ଚି ରୋଗୀଙ୍କ ସହିତ ଆଲୋଚନା କରି ଫଳମୂଳ ବଣ୍ଟନ କରିଥିଲେ । ପରେ ଉଭୟ ବିଧାୟକ ଓ ସାଂସଦ ଚାରିଛକ, ଲୁଣିବାହାଲ, ନୂଆପଡା, ବୀରନରସିଂପୁର, ଚମ୍ପାପୁର, ରାଧାନଗର, ବାମଣ୍ଡା, ସରସରା, ବୁଟୁପାଲି ଭଳି ବିଭିନ୍ନ ସ୍ଥାନକୁ ଉଭୟ ଯାଇଥିବାବେଳେ ସେଠାରେ ତାଙ୍କୁ ସ୍ବାଗତ ସମ୍ବର୍ଦ୍ଧନା ଜ୍ଞାପନ କରାଯାଇଥିଲା । ସେହିପରି ସନ୍ଧ୍ୟାରେ ବୌଦ୍ଧର ଟାଉନ ହଲ ପରିସରରେ ଶତାଧିକ ସଂଗଠନ ପକ୍ଷରୁ ଉଭୟ ବିଧାୟକ ଓ ସାଂସଦଙ୍କୁ ନାଗରିକ ସମ୍ବର୍ଦ୍ଧନା ଜ୍ଞାପନ କରାଯାଇଥିଲା । ଏହି ଅବସରରେ ବୌଦ୍ଧ ବିଧାୟକ ସରୋଜ ପ୍ରଧାନ ଜିଲ୍ଲାର ବିପର୍ଯ୍ୟସ୍ତ ଶିକ୍ଷା ବ୍ୟବସ୍ଥା, ସ୍ବାସ୍ଥ୍ୟ ସେବା ତଥା ପାନୀୟଜଳ ଓ ଜଳସେଚନର ଅବ୍ୟବସ୍ଥା କୁନେଇ ଗଭୀର ଉଦବେଗ ପ୍ରକାଶ କରିବା ସହିତ ଏସବୁ ସମସ୍ୟାର ସମାଧାନ ଦିଗରେ ସମସ୍ତଙ୍କ ଆଶୀର୍ବାଦ ଲୋଡିଥିଲେ ।

ଇଟିଭି ଭାରତ, ବୌଦ୍ଧ