ରାମେଶ୍ୱର ପୀଠରେ ସାମୁହିକ ବ୍ରତୋପନୟନ ଉତ୍ସବ ଆୟୋଜିତ

Mass Thread Ceremony: ସୁବର୍ଣ୍ଣପୁର: ସହରର ପ୍ରସିଦ୍ଧ ରାମେଶ୍ୱର ପୀଠରେ ଆଜି ସାମୁହିକ ବ୍ରତୋପନୟନ ଉତ୍ସବ ଆୟୋଜିତ ହୋଇଯାଇଛି । ନବ ବ୍ରହ୍ମଚାରୀଙ୍କ ଭିକ୍ଷାମ ଦେହି ଧ୍ୱନିରେ ମୁଖରିତ ହୋଇଛି ପବିତ୍ର ରାମେଶ୍ୱର ପୀଠ । ପ୍ରାତଃ କାଳରୁ ଅଷ୍ଟପ୍ରହରୀ ନାମଯଜ୍ଞର ମହାମନ୍ତ୍ର ହରେ କୃଷ୍ଣ ହରେ ରାମର ଧ୍ୱନିରେ ଏକ ଅନନ୍ୟ ମନଲୋଭା ଅଧ୍ୟାତ୍ମିକ ପରିବେଶ ସୃଷ୍ଟି ହୋଇଛି । ଚନ୍ଦ୍ରିକା ସେବା ଟ୍ରଷ୍ଟ ପକ୍ଷରୁ ଏହି ସାମୁହିତ ବ୍ରତୋପନୟନ ଉତ୍ସବ ଆୟୋଜନ କରାଯାଇଥିଲା । ସୁବର୍ଣ୍ଣପୁର, ବଲାଙ୍ଗୀର, ସମ୍ବଲପୁର ଓ ବରଗଡ଼ ଜିଲ୍ଲାର ଅନେକ ପରିବାର ଏହି ସାମୂହିକ ବ୍ରତୋପନୟନର ସୁଯୋଗ ନେଇଛନ୍ତି । ଏହି ଉତ୍ସବରେ 15ଟି ପରିବାର ସାମିଲ ହୋଇ ନିଜ ସନ୍ତାନମାନଙ୍କୁ ଯଜ୍ଞୋପବିତ ଉତ୍ସବରେ ସାମିଲ ହେବା ପାଇଁ ଆବେଦନ କରିଥିଲେ । ଚନ୍ଦ୍ରିକା ସେବା ଟ୍ରଷ୍ଟ ପକ୍ଷରୁ ପୁରୋହିତଙ୍କ ଠାରୁ ଆରମ୍ଭ କରି ଯଜ୍ଞର ସମସ୍ତ ସାମଗ୍ରୀ, ଶ୍ରୀଅନ୍ନ ଯଜ୍ଞ, ଅଷ୍ଟପ୍ରହରୀ ନାମ ଯଜ୍ଞ ଆଦିର ଆୟୋଜନ କରାଯାଇଥିଲା । ତେବେ ପ୍ରତି ବର୍ଷ ମାଘ ମାସରେ ଏକ ପୂଣ୍ୟ ଦିବସ ନିର୍ଦ୍ଧାରିତ କରି ଚନ୍ଦ୍ରିକା ସେବା ଟ୍ରଷ୍ଟ ସାମୂହିକ ବ୍ରତୋପନୟନ କରିବା ସହିତ ବ୍ରହ୍ମଚାରୀଙ୍କ ସମସ୍ତ ଖର୍ଚ୍ଚ ବହନ କରିବେ ବୋଲି ଆଜି ସେବା ଟ୍ରଷ୍ଟର ସଭାପତି ବଣ୍ଟୁ ଅଗ୍ରୱାଲ ପ୍ରକାଶ କରିଛନ୍ତି । 

ଇଟିଭି ଭାରତ, ସୁବର୍ଣ୍ଣପୁର