ବଲାଙ୍ଗୀରର ସର୍ବାଙ୍ଗୀନ ଉନ୍ନତି ପାଇଁ କାମ କରିବି: ଗୋପାଲଜି - Balangir Assembly Constituency

Balangir Assembly Constituency ବଲାଙ୍ଗୀର: ବିଜେପି ଆଜି 112 ବିଧାନସଭା ଆସନ ପାଇଁ ପ୍ରାର୍ଥୀ ତାଲିକା ଘୋଷଣା କରିଛି । ଏହି ପରିପ୍ରେକ୍ଷୀରେ ବଲାଙ୍ଗୀର ବିଧାନସଭା ନିର୍ବାଚନ ମଣ୍ଡଳୀ ପାଇଁ ବିଜେପି ନେତା ଗୋପାଲଜି ପାଣିଗ୍ରାହୀଙ୍କୁ ପ୍ରାର୍ଥୀ କରିଛି ଦଳ । ଟିକେଟ ମିଳିବା ପରେ ଗୋପାଲଜି ପାଣିଗ୍ରାହୀଙ୍କ ସମର୍ଥକଙ୍କ ମଧ୍ୟରେ ଖୁସିର ଲହରୀ ଖେଳି ଯାଇଛି । ବିଜେପି ନେତା ଓ କର୍ମୀମାନେ ଗୋପାଲଜିଙ୍କୁ ଶୁଭେଚ୍ଛା ଜଣାଇଛନ୍ତି । 

ତେବେ ଗୋପାଲଜି ପାଣିଗ୍ରାହୀ ଟିକେଟ ପାଇବା ପରେ ପ୍ରଧାନମନ୍ତ୍ରୀ ମୋଦି, ବିଜେପି ଜାତୀୟ ସଭାପତି ଜେପି ନଡ୍ଡା, ରାଜ୍ୟ ସଭାପତି ମନମୋହନ ସାମଲ ତଥା ବିଲାଙ୍ଗୀର ଲୋକସଭା ଆସନ ବିଜେପି ପ୍ରାର୍ଥିନୀ ସଂଗୀତା କୁମାରୀ ସିଂହ ଦେଓ ଓ କନକ ବର୍ଦ୍ଧନ ସିଂହ ଦେଓଙ୍କୁ ଧନ୍ୟବାଦ ଜଣାଇଛନ୍ତି । ବଲାଙ୍ଗୀରବାସୀ ତାଙ୍କୁ ଭଲରେ ଜାଣିଛନ୍ତି ଯେ, ସେ ବଲାଙ୍ଗୀର ବିକାଶ ପାଇଁ ବିନା ସ୍ୱାର୍ଥରେ ଅନେକ ଆନ୍ଦୋଳନ କରି ଆସିଛନ୍ତି । ଲୋକଙ୍କ ସୁଖ ଦୁଃଖରେ ସବୁ ବେଳେ ଛିଡା ହୋଇଛନ୍ତି । ଏହି ସବୁ କାରଣ ପାଇଁ ଲୋକ ତାଙ୍କ ଭଲ ପାଆନ୍ତି ଓ ଏହି ଭଲ ପାଇବା ତାଙ୍କ ପ୍ରତି ଜାରି ରଖିବେ ବୋଲି ଗୋପାଲଜି କହିଛନ୍ତି । 

ସେହିପରି ମୋଦିଙ୍କ ଗ୍ୟାରେଣ୍ଟି ଓ ବିକଶିତ ଭାରତ ପଣ ସମସ୍ତେ ଜାଣିଛନ୍ତି । ସମାନ ଭାବରେ ବଲାଙ୍ଗୀରର ସର୍ବାଙ୍ଗୀନ ଉନ୍ନତି ପାଇଁ ସେ ପୂର୍ବରୁ ମଧ୍ୟ କାମ କରିଛନ୍ତି ଓ ଆଗକୁ କାମ ଜାରି ରଖି ବଲାଙ୍ଗୀର ମାଟିର ସେବା କରିବେ । ଶିକ୍ଷା, ସ୍ୱାସ୍ଥ୍ୟ, ଜଳସେଚନ ଓ ନିଯୁକ୍ତିକୁ ସେ ଅଗ୍ରାଧିକାର ଦେଇ ଲୋକଙ୍କ ସେବା କରିବେ ବୋଲି କହିଛନ୍ତି। 

ଇଟିଭି ଭାରତ, ବଲାଙ୍ଗୀର