'ଗାଁ ସାଥୀ'ଙ୍କୁ ଭୁଲିଗଲେ ରାଜ୍ୟ ସରକାର ! ପାରିଶ୍ରମିକ ମିଳୁନଥିବା ଅଭିଯୋଗ

Gaon Sathi Workers Wage Dispute: କେନ୍ଦ୍ରାପଡ଼ା: ନିଯୁକ୍ତି ଦେଲେ, ହେଲେ ପାରିଶ୍ରମିକ ଦିଆଯାଇନଥିବା ଅଭିଯୋଗ ଆଣିଛନ୍ତି 'ଗାଁ ସାଥୀ' । ଜବକାର୍ଡ ଖାତାଧାରୀଙ୍କ ଦରମାରୁ ଯାହା ଯେତିକି ମୁଣ୍ଡପିଛା ମିଳୁଛି ସେତିକିରେ ଖୁସି ରହିବାକୁ ପଡୁଛି ବୋଲି ସେମାନେ କୋହଭରା କଣ୍ଠରେ କହିଛନ୍ତି । "ନିର୍ବାଚନ ଥିବାରୁ ଶିକ୍ଷିତ ବେକାର ଯୁବକଯୁବତୀମାନଙ୍କ ପାଇଁ ରାଜ୍ୟ ସରକାର 2008ରେ 'ଗାଁ ସାଥି' ଯୋଜନାର ଶୁଭାରମ୍ଭ କରିଥିଲେ । ରାଜ୍ୟରେ 60 ହଜାରରୁ ଊର୍ଦ୍ଧ୍ବ ଶିକ୍ଷିତ ବେକାର ମହିଳା ଏବଂ ପୁରୁଷଙ୍କୁ ନିଯୁକ୍ତି ବି ଦେଇଥିଲେ । ଏପରିକି ଯୋଗ୍ୟତା ମୁତାବକ ମାସକୁ 25 ଶହ ଟଙ୍କା ଲେଖାଏଁ ପାରିଶ୍ରମିକ ଦେବାର ସ୍ବପ୍ନ ବି ଦେଖାଇଥିଲେ । 2009 ନିର୍ବାଚନ ସରିଗଲା ପରେ ଆଜି ପର୍ଯ୍ୟନ୍ତ 16 ବର୍ଷ ବିତିଥିଲେ ମଧ୍ୟ ଗାଁ ସାଥିମାନଙ୍କୁ ରାଜ୍ୟ ସରକାର ଅଣଦେଖା କରିଛନ୍ତି"ବୋଲି ଅଭିଯୋଗ କରିଛନ୍ତି 'ଗାଁ ସାଥୀ ସଂଘ'ର କାର୍ଯ୍ୟକର୍ତ୍ତା ।

2009 ମସିହାଠାରୁ ଆଜି ପର୍ଯ୍ୟନ୍ତ ଏହି ଗାଁ ସାଥୀମାନଙ୍କୁ ନା ମିଳିଛି କୌଣସି ନିୟମିତ ପାରିଶ୍ରମିକ ନା ଏମାନଙ୍କୁ ବ୍ଲକ କ୍ୟାଡରର ସ୍ୱୀକୃତି। ଦୀର୍ଘ ବର୍ଷ ହେବ ଏମାନେ କେନ୍ଦ୍ର ସରକାରଙ୍କ MGNREG କାମରେ ଶ୍ରମିକମାନଙ୍କୁ ସହଯୋଗ କରି ଆସୁଛନ୍ତି । ଏପରିକି ଦାବି ଉପସ୍ଥାପନା କରିବାକୁ ଯାଇ ଅନେକ ଥର ଜେଲ ମଧ୍ୟ ଯାଇଥିବା ଅଭିଯୋଗ କରିଛନ୍ତି । ଆଗାମୀ ଦିନରେ ଯଦି ରାଜ୍ୟ ସରକାର ଦାବି ପୂରଣ ନକରନ୍ତି ତେବେ ଆଗକୁ ଆନ୍ଦୋଳନ ତୀବ୍ର କରିବାକୁ ଚେତାବନୀ ଦେଇଛନ୍ତି ।

ଇଟିଭି ଭାରତ,କେନ୍ଦ୍ରାପଡ଼ା