ଚା’ ଖଟିରେ ବ୍ରହ୍ମପୁରର ବିଜେଡି ବିଧାୟକ ପ୍ରାର୍ଥୀ ଚ୍ୟାଉ ପଟ୍ଟନାୟକ, ଚାଲିଛି ରାଜନୈତିକ ଚର୍ଚ୍ଚା - Chaa Khati Politics

Chaa Khati Politics: ବ୍ରହ୍ମପୁର: ସାଧାରଣ ନିର୍ବାଚନ ତାରିଖ ପାଖେଇ ଆସୁଥିବା ବେଳେ ପ୍ରଚାର କାର୍ଯ୍ୟ ମଧ୍ୟ ଜୋର ଧରିଛି । ବ୍ରହ୍ମପୁର ସହରର ଚା ଖଟିରେ ଦେଖିବାକୁ ମିଳୁଛି ବିଜେଡି ନେତା ଓ କର୍ମୀଙ୍କ ଭିଡ । ଚା ଖଟିରେ ପହଞ୍ଚି ସହରର ବିଭିନ୍ନ ବର୍ଗର ଜନସାଧାରଣଙ୍କୁ ସାକ୍ଷାତ କରି ଚା ପିଇବା ସହିତ ରାଜନୈତିକ ଚର୍ଚ୍ଚା କରୁଛନ୍ତି ନେତା ଓ କର୍ମୀ । ବ୍ରହ୍ମପୁର ବିଧାନସଭା ନିର୍ବାଚନ ମଣ୍ଡଳୀରେ ଚଳିତବର୍ଷ ବିଜୁ ଜନତା ଦଳରୁ ପ୍ରାର୍ଥୀ ହୋଇଥିବା ପାଞ୍ଚ ଥରର ବିଧାୟକ ଡାକ୍ତର ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ ମଧ୍ୟ ଚା ଖଟିରେ ପହଞ୍ଚି ଲୋକମାନଙ୍କ ସହ ଆଲୋଚନା କରିଛନ୍ତି ।

ମୁଖ୍ୟମନ୍ତ୍ରୀଙ୍କ ବିକାଶମୂଳକ କାର୍ଯ୍ୟଗୁଡିକୁ ଲୋକଙ୍କ ପାଖରେ ପହଞ୍ଚାଇବା ସହ ଷଷ୍ଠ ଥର ପୁଣି ନବୀନ ପଟ୍ଟନାୟକଙ୍କୁ ମୁଖ୍ୟମନ୍ତ୍ରୀ କରିବା ପାଇଁ ଅପିଲ କରିଛନ୍ତି । ସେପଟେ ଏହି ଚା ଖଟିରେ ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକଙ୍କ ସମେତ ବ୍ରହ୍ମପୁରର ମେୟର ସଂଘମିତ୍ରା ଦଳେଇ, ବ୍ରହ୍ମପୁରର ବହୁ କର୍ପୋରେଟର ଓ କର୍ମକର୍ତ୍ତାମାନେ ଏଥିରେ ସାମିଲ ହୋଇଥିଲେ । ଅନ୍ୟପଟେ ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ ଏବଂ ତାଙ୍କ ସହିତ ପ୍ରଚାରରେ ସାମିଲ ହୋଇଥିବା ଦଳୀୟ ନେତୃବୃନ୍ଦଙ୍କ ସହିତ ଆଲୋଚନା କରିଛନ୍ତି ଆମ ବ୍ରହ୍ମପୁର ସମ୍ବାଦଦାତା ସମୀର ଆଚାର୍ଯ୍ୟ । 

ଇଟିଭି ଭାରତ, ବ୍ରହ୍ମପୁର