ଝାରସୁଗୁଡ଼ାରେ ସଡ଼କ ଦୁର୍ଘଟଣା, ମାଇଁ ଓ ଭଣଜାଙ୍କ ଗଲା ଜୀବନ - Road Accident in Jharsuguda

Road Accident in Jharsuguda: ଝାରସୁଗୁଡ଼ା: ଆଜି ଝାରସୁଗୁଡ଼ା ଜିଲ୍ଲାରେ ଘଟିଯାଇଛି ଏକ ଅଭାବନୀୟ ଘଟଣା । ପିକଅପ ଭ୍ୟାନ ଧକ୍କାରେ ଘଟଣାସ୍ଥଳରେ ମାଇଁ ଓ ଭଣଜାଙ୍କ ଜୀବନ ଗଲା । ଆଜି ସକାଳେ ଝାରସୁଗୁଡା ଜିଲ୍ଲା ବ୍ରଜରାଜନଗର ଥାନା ଅଧିନସ୍ଥ ଗାନ୍ଧୀ ଛକ ଫାଣ୍ଡି ଅନ୍ତର୍ଗତ ଚନ୍ଦିନିମାଲ ରାସ୍ତାରେ ଏକ ଟାୟାର ବୋଝେଇ ପିକଅପ ଭ୍ୟାନ ଓ ବାଇକ ଆରୋହୀଙ୍କ ମଧ୍ୟରେ ମୁହାଁ ମୁହିଁ ଧକ୍କା ହୋଇଥିଲା । ଯାହାଫଳରେ ବାଇକ ଚାଳକ ଯୁବକ ଓ ବାଇକରେ ବସିଥିବା ସମ୍ପର୍କୀୟ ମାଇଁଙ୍କ ଘଟଣା ସ୍ଥଳରେ ମୃତ୍ୟୁ ହୋଇଥିବା ଜଣାଯାଇଛି । ମୃତକମାନେ ଲୋଇସିଂହ ଗ୍ରାମର ସାହିଲ ପ୍ରଧାନ ଏବଂ ଚାନ୍ଦନୀମାଲ ଗ୍ରାମର କଲ୍ୟାସିନୀ ପ୍ରଧାନ ବୋଲି ଜଣାପଡ଼ିଛି । ମୃତଦେହକୁ ଜବତ କରି ଝାରସୁଗୁଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟକୁ ବ୍ୟବଚ୍ଛେଦ ପାଇଁ ଗାନ୍ଧୀ ଛକ ପୋଲିସ ପଠାଇଥିବା ସୂଚନା ମିଳିଛି । ତେବେ ଦୁର୍ଘଟଣା ଫଳରେ ଅଞ୍ଚଳରେ ଉତ୍ତେଜନା ଦେଖା ଦେଇଥିବା ବେଳେ ପୋଲିସ ସ୍ଥିତିକୁ ନିୟନ୍ତ୍ରିତ କରିଛି । ଗାନ୍ଧୀ ଛକ ପୋଲିସ ପିକଅପ ଡ୍ରାଇଭରକୁ ଅଟକ ରଖି ଘଟଣାସ୍ଥଳରେ ତଦନ୍ତ ଆରମ୍ଭ କରିଥିବା ଜଣାପଡ଼ିଛି।  

ଇଟିଭି ଭାରତ, ଝାରସୁଗୁଡ଼ା