ପୁରୀ: ରାଜ୍ୟର ବେକାରୀ ଯୁବକଙ୍କ ପାଇଁ ଦିଗଦର୍ଶନ । ଜାପାନରେ ନିଯୁକ୍ତି ପାଉଛନ୍ତି ଓଡ଼ିଆ । ଜାପାନୀ ଭାଷା ଶିଖି ବିଦେଶରେ କାମ କରିବାର ସୁଯୋଗ ପାଉଛନ୍ତି । ଯାହାର ଉଦାହରଣ ଦେଖିବାକୁ ମିଳିଛି ପୁରୀରେ । ଓଡି଼ଆ ପିଲାଙ୍କୁ ଜାପାନରେ ନିଯୁକ୍ତି ଦେବା ପାଇଁ କାର୍ଯ୍ୟ କରୁଛନ୍ତି ଓଡିଆ ପୁଅ କୁନା ଦାଶ । ଜାପାନରେ ନିଯୁକ୍ତି ମିଳିବା ପରେ ଛାତ୍ରଙ୍କ ଭିତରେ ଖୁସିର ଲହରୀ ଖେଳିଯାଇଛି ।
ଜାପାନୀ ଭାଷା ଶିକ୍ଷା ଦେଲା ଜାପାନରେ ନିଯୁକ୍ତି । ଅନେକ ଛାତ୍ରଛାତ୍ରୀ ଗ୍ରାଜୁଏସନ (ଯୁକ୍ତ ତିନି) ପରେ ବେକାର ହୋଇ ଘରେ ବସିଛନ୍ତି । ଅନେକ ଛାତ୍ରଛାତ୍ରୀ ନିଯୁକ୍ତି ନପାଇ ହତୋତ୍ସାହିତ ହୋଇପଡୁଛନ୍ତି । ତେବେ ହତୋତ୍ସାହିତ ନହୋଇ ଆଇଟି କୋର୍ସ ସହିତ ଜାପାନୀ ଭାଷା ଶିକ୍ଷା ଲାଭକଲେ ଜାପାନରେ ନିଯୁକ୍ତି ମିଳିପାରିବ । ଏଭଳି କିଛି ଉଦାହରଣ ଦେଖିବାକୁ ମିଳିଛି । ପୁରୀରେ ରହୁଥିବା କିଛି ଛାତ୍ର ଆଇଟି କୋର୍ସ ସହ ଜାପାନୀ ଭାଷା ଶିକ୍ଷା ଲାଭ କରି ଜାପାନରେ ବଡ ଆଇଟି କମ୍ପାନୀରେ ନିଯୁକ୍ତି ପାଇଛନ୍ତି । ପୁରୀ ଚନ୍ଦ୍ରଶେଖର ଏକାଡେମୀରେ ଜାପାନୀ ଭାଷା ସହ ଆଇଟି କୋର୍ସ କରି ଜାପାନରେ ଥିବା ବଡ ଆଇଟି କମ୍ପାନୀରେ ଚଳିତ ବର୍ଷ ନିଯୁକ୍ତି ପାଇଛନ୍ତି 5 ଜଣ ଛାତ୍ର । ସେହିପରି ପୂର୍ବରୁ ଏଠାରୁ ଆଉ 3 ଛାତ୍ର ମଧ୍ୟ ନିଯୁକ୍ତି ପାଇଥିଲେ ।
କେଉଁ କୋର୍ସ କଲେ ଜାପାନରେ ମିଳୁଛି ନିଯୁକ୍ତି:
ଜାପାନରେ ଆଇଟି କମ୍ପାନୀରେ ନିଯୁକ୍ତି ପାଇବାକୁ ହେଲେ ଏକ ସ୍ୱତନ୍ତ୍ର କୋର୍ସ ରହିଛି । ଜାଣେ ଛାତ୍ରକୁ ରାଷ୍ଟ୍ରୀୟ ଇଲେକଟ୍ରୋନିକ୍ ଏବଂ ସୂଚନା ପ୍ରୋଦ୍ୟୋଗିକ ସଂସ୍ଥାନ ତଥା NIELIT ର 'A' ଲେଭଲ ଆଇଟି କୋର୍ସରେ ଉତ୍ତୀର୍ଣ୍ଣ ହେବାକୁ ପଡିବ । ଏଥି ସହିତ ଜାପାନୀ ଭାଷାର ଜିଏଲପିଟି କୋର୍ସ ଉତ୍ତୀର୍ଣ୍ଣ ହେବାକୁ ପଡିବ । ତେବେ କୋଲକାତାରେ ଥିବା ଟେକ୍ନୋ ଇଣ୍ଡିଆ ୟୁନିଭରସିଟି ଅଧୀନରେ ଏହି କୋର୍ସ କରିବାକୁ ପଡିବ । ଏହି କୋର୍ସର ଅବଧି ଦୁଇ ବର୍ଷ ରହିଛି । ପୁରୀର ଚନ୍ଦ୍ରଶେଖର ଏକାଡେମୀରେ ଏହି କୋର୍ସ ଶିକ୍ଷାଦାନ କରାଯାଉଛି । ଟେକ୍ନୋଇଣ୍ଡିଆ ବିଶ୍ୱ ବିଦ୍ୟାଳୟରୁ ଫ୍ରାଞ୍ଚାଇଜ୍ ଆଣି ପୁରୀର ଚନ୍ଦ୍ର ଶେଖର ଏକାଡେମୀ ଏହି କୋର୍ସ ଶିକ୍ଷାଦାନ କରୁଛି । ଦୁଇ ବର୍ଷରେ ମାତ୍ର ୬୦ ହଜାର ଟଙ୍କା ଏହି କୋର୍ସରେ ଖର୍ଚ୍ଚ ହେଉଛି । ଏହି କୋର୍ସ ଶିକ୍ଷାଦାନ କରି ମୋଟ 8 ଜଣ ଛାତ୍ର ଜାପାନରେ ଥିବା ଆଇଟି କମ୍ପାନୀରେ ଭଲ ବେତନରେ ନିଯୁକ୍ତି ପାଇଛନ୍ତି । ଜାପାନ ଭାଷା ଶିକ୍ଷା ଲାଭ ଦ୍ୱାରା ଜାପାନୀ କମ୍ପାନୀ ଗୁଡିକ ନିଯୁକ୍ତି ପାଇଁ ଅଗ୍ରାଧିକାର ଦେଇଛନ୍ତି । ଏଣୁ ଜଣେ ଛାତ୍ର ନିଜର ଗ୍ରାଜୁଏସନ ଶେଷ ପରେ ସ୍ୱଳ୍ପ ମୂଲ୍ୟରେ ନିଲିଟର A ଲେବଲ ଆଇଟି କୋର୍ସ ସହ ଦୁଇ ବର୍ଷିଆ ଜାପାନୀ ଭାଷା କୋର୍ସ କରି ଜାପାନ ରେ ଥିବା ବଡ ବଡ ଆଇଟି କମ୍ପାନି ରେ ଭଲ ଦରମାରେ ନିଯୁକ୍ତି ପାଇପାରିବେ ।
କ'ଣ କହୁଛନ୍ତି ଜାପାନରେ ନିଯୁକ୍ତି ପାଇଥିବା ଛାତ୍ର:
ଜାପାନରେ ନିଯୁକ୍ତି ପାଇଥିବା ଜଣେ ଛାତ୍ର ଚଞ୍ଚଲ ସରକାର କାହିଛନ୍ତି , "ମୁଁ ଜାପାନ ବିଷୟରେ କେବଳ ଟିଭିରୁ ଜାଣିଥିଲି । ତେବେ ସେଠାରେ ଚାକିରି ମିଳିବ କେବେବି ଭାବିନଥିଲି ।ପୁରୀର ଚନ୍ଦ୍ର ଶେଖର ଏକାଡେମୀ ଆସି ନିଲିଟର ଆଇଟି କୋର୍ସ ସହ ଜାପାନୀ ଭାଷା କୋର୍ସ କଲି । ଏବେ ଏହି କୋର୍ସ ସରିବା ପରେ ମୋତେ ଜାପାନରେ ଏକ IT କମ୍ପାନୀରେ ନିଯୁକ୍ତି ମିଳିଛି । ମୋର ଜାପାନ ଯିବା ସ୍ୱପ୍ନ ଆଜି ପୂରଣ ହୋଇଥିବାରୁ ମୁଁ ବହୁତ ଖୁସି । ତେବେ ଅନେକ ଛାତ୍ରଛାତ୍ରୀ ଏହି କୋର୍ସ ସମ୍ପର୍କରେ ଜାଣିନାନାହାନ୍ତି । ମୁଁ ଇଣ୍ଟରନେଟରୁ ଏହା ଜାଣି କୋର୍ସ କଲି । ଗ୍ରାଜୁଏସନ ପରେ ବେକାର ଥିବା ଛାତ୍ରଛାତ୍ରୀ ଏହି କୋର୍ସ କରି ଜାପାନରେ ଭଲ ଦରମାରେ ନିଯୁକ୍ତି ପାଇପାରିବେ ।"
ଆଉ ଜଣେ ଛାତ୍ର ସତ୍ୟଜିତ ସାହୁ ନିଜ ପ୍ରତିକ୍ରିୟାରେ କହିଛନ୍ତି , "ନିଲିଟର IT 'A' ଲେଭଲ କୋର୍ସ ସହ ଜାପାନୀ ଭାଷାର ଥିବା N-3 ଲେଭଲ କୋର୍ସ କରିବା ପରେ ମୋତେ ଜାପାନରେ ଏକ ଆଇଟି କମ୍ପାନୀରେ ନିଯୁକ୍ତି ମିଳିଛି । ଅନେକ ପିଲା ଯୁକ୍ତ ତିନି ଶିକ୍ଷା ଲାଭ କରିବା ପରେ ମଧ୍ୟ ଚାକିରି ମିଳୁନି । ତେବେ ଜଣେ ଛାତ୍ର ଯେକୌଣସି ଷ୍ଟ୍ରିମରୁ ଆସି ଏହି ଏହି କୋର୍ସ କରିପାରିବେ । ଏହା ସହିତ ଜାପାନୀ ଭାଷା ଶିକ୍ଷା ଲାଭ କରି ଜାପାନରେ ଥିବା ଆଇଟି କମ୍ପାନୀରେ ନିଯୁକ୍ତି ପାଇପାରିବେ । ମୋ ପରିବାର ଗରିବ ଶ୍ରେଣୀର । ମୋ ବାପା ଜଣେ ଜଳଖିଆ ଦୋକାନୀ । ସବୁ କିଛି ସମ୍ଭବ ହୋଇଛି ଇଣ୍ଡିଆ ଜାପାନ ଫ୍ରେଣ୍ଡସିପ ସେଣ୍ଟର ତଥା ଚନ୍ଦ୍ର ସେଖର ଏକାଡେମୀର ପ୍ରତିଷ୍ଠାତା କୁନା ଦାଶଙ୍କ ସାହାଯ୍ୟ ଯୋଗୁ । ଆମର ଅର୍ଥିକ ସ୍ଥିତି ଖରାପ ଥିବାବେଳେ ସେ ମୋତେ ଅର୍ଥିକ ସାହାଯ୍ୟ ସହ ଅନ୍ୟାନ୍ୟ ସହଯୋଗ କରିଥିବାରୁ ମୋର ଚାକିରି କରିବା ସ୍ୱପ୍ନ ସତ ହୋଇଛି ।"
ଓଡିଆ ପିଲାଙ୍କୁ ଜାପାନରେ ନିଯୁକ୍ତି ଦିଗରେ କୁନା ଦାଶଙ୍କ ପ୍ରଚେଷ୍ଟା:
ଶ୍ରୀକ୍ଷେତ୍ର ପୁରୀରୁ ଯାଇ ଦୀର୍ଘ ୩୫ ବର୍ଷ ହେବ ଜାପାନରେ ରହୁଛନ୍ତି କୁନା ଦାଶ । ପୁରୀରେ ହୋଟେଲ ବ୍ୟବସାୟରେ ସଫଳ ହେବା ପରେ ଜାପାନରେ ହୋଟେଲ ବ୍ୟବସାୟ କରି ମଧ୍ୟ ସଫଳ ହୋଇଛନ୍ତି ଓଡ଼ିଆ ପୁଅ କୁନା ଦାଶ । ହେଲେ ନିଜ ମାତୃଭୁମୀକୁ ସେ ଭୁଲି ନାହାନ୍ତି । ଇଣ୍ଡିଆ-ଜାପାନ ଫ୍ରେଣ୍ଡସିପ ସେଣ୍ଟର ଅନୁଷ୍ଠାନ କରି ଓଡ଼ିଶାର କଳା , ସଂସ୍କୃତିକୁ ସେ ଜାପାନରେ ପହଞ୍ଚାଇଛନ୍ତି । ଜାପାନୀମାନଙ୍କୁ ପୁରୀକୁ ରଥଯାତ୍ରାରେ ସାମିଲ କରିବା ସହ ଓଡ଼ିଶା ଆସିବାକୁ ସବୁ ବ୍ୟବସ୍ଥା କରୁଛନ୍ତି । ବିଦେଶରେ ଓଡିଶାର କଳା ସଂସ୍କୃତି ସହ ପର୍ଯ୍ୟଟନର ପ୍ରଚାର ପ୍ରସାର କରୁଛନ୍ତି କୁନା ଦାଶ । ତେବେ ଓଡିଆ ପିଲାଙ୍କୁ ଜାପାନରେ ନିଯୁକ୍ତି ଦେବାକୁ ନେଇ ସେ ମାଗାଣାରେ ଜାପାନୀ ଭାଷା ଶିକ୍ଷା ଦେଉଛନ୍ତି । ଏନେଇ କୁନା ଦାଶ ପୁରୀ ବାଲିଘାଇରେ ଏକ ସିବିଏସଇ ସ୍କୁଲ କରି ନର୍ସରୀରୁ ଯୁକ୍ତ ଦୁଇ ବିଜ୍ଞାନ ଯାଏଁ ପିଲାଙ୍କୁ ସ୍ୱଳ୍ପ ମୂଲ୍ୟରେ ଶିକ୍ଷାଦାନ କରୁଛନ୍ତି । ତେବେ ଜାପାନରେ ବଡବଡ ଆଇଟି କମ୍ପାନୀ ଥିବାବେଳେ ମାନବ ସମ୍ବଳର ଅଭାବ ରହିଛି । ଏହାକୁ ଏକ ସୁଯୋଗ ଭାବେ ନେଇଛନ୍ତି କୁନା ଦାଶ । ଓଡିଆ ପିଲାଙ୍କୁ ନିଯୁକ୍ତି ଦେବା ପାଇଁ ସେ ତାଙ୍କ ସ୍କୁଲରେ ଆଇଟି ଶିକ୍ଷା ସହ ଜାପାନୀ ଭାଷା ଶିକ୍ଷା ଦେଉଛନ୍ତି । ଫଳରେ ବର୍ତ୍ତମାନସୁଦ୍ଧା ୮ ଜଣ ଛାତ୍ର ଜାପାନରେ ଥିବା ଆଇଟି କମ୍ପାନୀରେ ଚାକିରି ପାଇ ସାରିଲେଣି । କୋଲକାତାରେ ଥିବା ଟେକ୍ନୋ ଇଣ୍ଡିଆ ବିଶ୍ୱ ବିଦ୍ୟାଳୟରୁ ନିଲିଟର ଆଇଟି 'ଏ' ଲେଭଲ କୋର୍ସର ଫ୍ରାଞ୍ଚାଇଜ ଆଣିବା ସହ ଜାପାନୀ ଭାଷା ନିଜ ସ୍କୁଲରେ ଶିକ୍ଷା ଦେଉଛନ୍ତି । ଆଗାମୀ ଦିନରେ ଅଧିକ ଓଡିଆ ପିଲାମାନେ କିଭଳି ଅଧିକ ଜାପାନରେ ନିଯୁକ୍ତି ପାଇ ନିଜକୁ ପ୍ରତିଷ୍ଠିତ କରିପାରିବେ ତାହା ଲକ୍ଷ୍ୟ ବୋଲି କହିଛନ୍ତି କୁନା ଦାଶ ।
ଏହା ବି ପଢନ୍ତୁ...Linkedinରେ ଚାକିରି ଖୋଜିବା ହେଲା ସହଜ; ଚୁଟକିରେ AI ଫିଚର ଖୋଜିଦେବ ଜବ୍
ଏହା ବି ପଢନ୍ତୁ...ଚାକିରି ପାଇଁ ମାଗଣା କୋଚିଂ ଓ ଟ୍ରେନିଂ: 'କଳ୍ପତରୁ ପ୍ରଶିକ୍ଷଣ କେନ୍ଦ୍ର', ଆଶାୟୀଙ୍କ ଆଶାର ଆଲୋକ
ଓଡି଼ଶାରେ ବେକାରୀ ସମସ୍ୟା ସାମାଧାନ ମୋର ଲକ୍ଷ୍ୟ: କୁନା ଦାଶ
ଇଣ୍ଡିଆ ଜାପାନ ଫ୍ରେଣ୍ଡସିପ୍ ସେଣ୍ଟର ପ୍ରତିଷ୍ଠାତା କୁନା ଦାଶ କହିଛନ୍ତି, "ଜଣେ ଯୁକ୍ତ ତିନି ପାସ କରିବା ପରେ କେନ୍ଦ୍ର ସରକାରଙ୍କ ନିଲିଟର ଆଇଟି କୋର୍ସ ସହ ଜାପାନୀ ଭାଷାର JLPT ଟେଷ୍ଟରେ ଉତ୍ତୀର୍ଣ୍ଣ ହେବାକୁ ପଡିବ । ଏହି ଶିକ୍ଷା ଲାଭ କରି ଚଳିତବର୍ଷ ଆମ ସ୍କୁଲର ୫ ଜଣ ଛାତ୍ର ଜାପାନରେ IT କମ୍ପାନୀରେ ନିଯୁକ୍ତି ପାଇଛନ୍ତି । ସେମାନେ ନିଯୁକ୍ତି ପାଇଥିବା ଆଇଟି କମ୍ପାନୀରେ ଅସିଷ୍ଟାଣ୍ଟ ଇଂଜିନିୟର ଭାବେ କାର୍ଯ୍ୟ କରିବେ । ସେଠାରେ ଅଭିଜ୍ଞତା ହେବା ପରେ ଅହୁରି ଆଗକୁ ବଢିପାରିବେ । ଏକ ଉନ୍ନତ ଦେଶର ଭାଷା ଶିଖିଲେ ସେହି ଦେଶରେ ନିଯୁକ୍ତି ମିଳିବାରେ ଅଧିକ ଅଗ୍ରାଧିକାର ମିଳିଥାଏ । ପ୍ରଥମେ ଜଣେ ସେଠାରେ ଭାରତୀୟ ମୁଦ୍ରାରେ ଏକ ଲକ୍ଷ ଟଙ୍କା ପାଇବ । ସେଠାରେ ମାସିକ ରହିବା ଖର୍ଚ୍ଚ ୫୦ ହଜାର ଟଙ୍କା ପରେ ମାସକୁ ୫୦ ହଜାର ଟଙ୍କା ନିଜ ପରିବାରକୁ ପଠାଇ ପାରିବ । ଏହାଦ୍ୱାରା ଅନେକ ପିଲା ଉପକୃତ ହୋଇପାରିବେ । ପରବର୍ତ୍ତୀ ସମୟରେ ଭାରତ ଆସି ଭଲ ଦରମାରେ ନିଯୁକ୍ତି ପାଇପାରିବେ । ଜାପାନ ଏକ ଉନ୍ନତ ଦେଶ ହୋଇଥିବାବେଳେ ସେଠାରେ କିନ୍ତୁ ମାନବ ସମ୍ବଳ ଅଭାବ ରହିଛି । ଏଣୁ ଏହାକୁ ଏକ ସୁଯୋଗ ଭାବେ ନେଇ IT ସହ ଜାପାନୀ ଭାଷା ଶିକ୍ଷା ଲାଭ କରି ଆମ ଓଡିଶାର ଯୁବକମାନେ ଭଲ ଦରମାରେ ଜାପାନରେ ଚାକିରି କରି ନିଜର ଆର୍ଥିକ ସ୍ଥିତି ସୁଦୃଢ କରିପାରିବେ । ସାରା ଦେଶରେ ITର ଚାହିଦା ରହିଛି । ଏଣୁ ଆଇଟି ସହ ଏକ ଉନ୍ନତ ଦେଶର ଭାଷା ଶିଖିପାରିଲେ ନିଯୁକ୍ତି ମିଳିିବାର ଅଧିକ ସୁଯୋଗ ରହିଛି ।"
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
