ସରକାରଙ୍କ ଶ୍ରମିକ ମାରଣ ନୀତି ବିରୋଧରେ ଗର୍ଜିଲା ପୋଷ୍ଟାଲ ସଂଘ

Postal Union Protest In Rourkela: ରାଉରକେଲା: କେନ୍ଦ୍ର ସରକାରଙ୍କ ଶ୍ରମିକ ବିରୋଧୀ ନୀତି ପାଇଁ ଗର୍ଜିଲା ଅଖିଳ ଭାରତ ପୋଷ୍ଟମ୍ୟାନ ଓ ଏମଟିଏସ କର୍ମଚାରୀ ସଂଘ । ଆଜି(ରବିବାର) ଦିନ ରାଉରକେଲା ସହରରେ ଏକ ବିଶାଳ ପ୍ରତିବାଦ ଶୋଭାଯାତ୍ରା କରିଛି ସଂଘ । ନ୍ୟାସନାଲ ଫେଡେରେସନ୍ ଅଫ୍ ପୋଷ୍ଟାଲ ଏମ୍ପୋଇଜ ଓ ଅଲ୍ ଇଣ୍ଡିଆ ପୋଷ୍ଟାଲ ଏମ୍ପୋଇଜ ୟୁନିୟନ ସହ ବନ୍ଧିତ ଅଖିଳ ଭାରତ ଡ଼ାକ ବିଭାଗ ଓ ଏମଟିଏସ କର୍ମଚାରୀ ସଂଘ ଓଡ଼ିଶା ସର୍କଲର ୩୦ତମ ଦ୍ଵିବାର୍ଷିକୀ ସମ୍ମିଳନୀ ଅନୁଷ୍ଠିତ ହୋଇଯାଇଛି । ଏହି ସମ୍ମିଳନୀରେ ଦେଶରେ ସାମଗ୍ରିକ ଭାବରେ ଦେଶରେ କେନ୍ଦ୍ର ସରକାରଙ୍କ ଜନ ବିରୋଧୀ ତଥା ଶ୍ରମିକ ବିରୋଧୀ ନୀତି ଯୋଗୁଁ ଶ୍ରମିକ ଓ କର୍ମଚାରୀମାନେ କିଭଳି ଭାବରେ ବିଭିନ୍ନ ସମସ୍ୟାର ସମ୍ମୁଖିନ ହେଉଛନ୍ତି ସେ ସମ୍ପର୍କରେ ଆଲୋଚନା କରାଯାଇଥିଲା  । 

ଏହାସହ ଦେଶର ସମସ୍ତ ଶ୍ରମ ଆଇନଗୁଡିକୁ ବାତିଲ କରି ୪ଟି ଶ୍ରମକୋର୍ଡରେ ପରିଣତ କରି ସେମାନଙ୍କୁ ସରକାର କ୍ରୀତଦାସରେ ପରିଣତ କରିବା ପାଇଁ ସରକାର ଚେଷ୍ଟା କରୁଥିବା ଅଭିଯୋଗ କରିଛି ସଂଘ । ତେବେ ସର୍ବନିମ୍ନ ମଜୁରୀ ୨୬ ହଜାର ଟଙ୍କା, ସାମାଜିକ ସୁରକ୍ଷା ଆଦି ପ୍ରସଙ୍ଗରେ ଆଗାମୀ ଦିନରେ ବ୍ୟାପକ ଆନ୍ଦୋଳନ ପାଇଁ ଆହ୍ୱାନ ଦିଆଯାଇଛି । କର୍ମଚାରୀଙ୍କ ଉପରେ ପ୍ରତିଦିନ କାର୍ଯ୍ୟଭାର ଅଧିକ ହେବା ଯୋଗୁଁ ଅସନ୍ତୋଷ ପ୍ରକାଶ ପାଇଛି । ଏହି ସର୍ବଭାରତୀୟ ସମ୍ମିଳନୀରେ ସରକାରଙ୍କ ଜନ ବିରୋଧୀ ଓ ଶ୍ରମିକ ବିରୋଧୀ ନୀତି ବିରୋଧରେ ଆନ୍ଦୋଳନ ପାଇଁ ଖସଡ଼ା ପ୍ରସ୍ତୁତ କରାଯାଇଥିବା ସୂଚନା ମିଳିଛି  । 

ଇଟିଭି ଭାରତ, ରାଉରକେଲା