ପିପିଲିରେ ପୁଣିଥରେ ଆଶ୍ରିତଙ୍କ ଉପରେ ଆଶା କଲା ବିଜେପି - Pipili Assembly Constituency

Pipili Assembly Constituency ନିମାପଡ଼ା: ପୁଣିଥରେ ପିପିଲିରୁ ନିର୍ବାଚନ ଲଢ଼ିବେ ଆଶ୍ରିତ ପଟ୍ଟନାୟକ । ପୁରୀ ଜିଲ୍ଲା ବିଜେପି ସଭାପତି ଆଶ୍ରିତଙ୍କ ଉପରେ ଭରସା କରି ପିପିଲି ବିଧାନସଭା ନିର୍ବାଚନ ମଣ୍ଡଳୀରୁ ପ୍ରାର୍ଥୀ କରିଛି ବିଜେପି । ସେପେଟେ ଆଶ୍ରିତ ଟିକେଟ ପାଇବା ପରେ ଉତ୍ସାହିତ ବିଜେପି କର୍ମୀ । ଗତ ନିର୍ବାଚନ ଓ ଉପନିର୍ବାଚନରେ ବିଜେପି ପକ୍ଷରୁ ଟିକେଟ ପାଇ ବିଜେଡି ଠାରୁ ପରାସ୍ତ ହୋଇଥିଲେ ଆଶ୍ରିତ । ଚଳିତ ନିର୍ବାଚନରେ ବିଜେପିରୁ ଅନେକ ଆଶାୟୀ ରହିଥିଲେ ମଧ୍ୟ ଆଶ୍ରିତଙ୍କ ଉପରେ ଭରସା କରିଛି ଦଳ । ୨୦୨୪ ସାଧାରଣ ନିର୍ବାଚନରେ ପିପିଲିରେ ପଦ୍ମ ଫୁଟିବ ଓ ଏଥିପାଇଁ ଦଳ ଏକାଠି ହୋଇ ନିର୍ବାଚନ ଲଢ଼ିବା ପାଇଁ ଶପଥ ନେଇଛନ୍ତି ବିଜେପି କର୍ମୀ । 

ରାଜ୍ୟ ରାଜନୀତିରେ ପିପିଲି ନିର୍ବାଚନ ମଣ୍ଡଳୀ ସବୁବେଳେ ଚର୍ଚ୍ଚାରେ ରହିଆସିଛି । ଏଠାରୁ ବିଜେଡି, ବିଧାୟକ ପ୍ରାର୍ଥୀ ଭାବେ ରୁଦ୍ର ପ୍ରତାପ ମହାରଥୀ ନାମ ଘୋଷଣା କରିସାରିଥିବା ବେଳେ ଆଜି ବିଜେପି ପ୍ରାର୍ଥୀ ଘୋଷଣା କରିଛି । ତେବେ ବିଜେପି ପକ୍ଷରୁ ପ୍ରାର୍ଥୀ ଘୋଷଣା ହେବା ପରେ ପିପିଲିରେ ରାଜନୈତିକ ବାତାବରଣ ସରଗରମ ହେବାରେ ଲାଗିଛି । ଏଥର ନିର୍ବାଚନରେ ବିଜେପି ହିଁ ବାଜିମାତ କରିବ ବୋଲି ଦୃଢ଼ୋକ୍ତି ପ୍ରକାଶ କରିଛନ୍ତି ଆଶ୍ରିତ । ସେହିପରି ନିମାପଡ଼ାରେ ପ୍ରଭାତୀ ପରିଡ଼ା, ସତ୍ୟବାଦୀରେ ଓମ ପ୍ରକାଶ ମିଶ୍ର, ପୁରୀରେ ଜୟନ୍ତ କୁମାର ଷଡ଼ଙ୍ଗୀ, ବ୍ରହ୍ମଗିରିରେ ଉପାସନା ମହାପାତ୍ରଙ୍କୁଲ ବିଜେପି ବିଧାୟକ ପ୍ରାର୍ଥୀ ଭାବରେ ଟିକେଟ ପ୍ରଦାନ କରିଛନ୍ତି ।

ଇଟିଭି ଭାରତ, ନିମାପଡ଼ା