ହାଇଦ୍ରାବାଦ: ଆମେ ସମସ୍ତେ ଡିଜିଟାଲ ଯୁଗରେ ପାଦ ଥାପିଛୁ । ପ୍ରତିଟି କାର୍ଯ୍ୟ ମୋବାଇଲରେ ହୋଇପାରୁଛି । ଆଙ୍ଗୁଠି ଟିପରେ ଯେପରି ସବୁକିଛି ସମ୍ଭବ ହୋଇପାରୁଛି । ଏଣୁ ଲୋକେ ମନୋରଞ୍ଜନଠୁ ଆରମ୍ଭ କରି ପ୍ରତିଟି ଦୈନନ୍ଦିନ କାର୍ଯ୍ୟ ଲାଗି ମୋବାଇଲର ବ୍ୟବହାର କରୁଛନ୍ତି । ମନୋରଞ୍ଜନ ପାଇଁ ଘଣ୍ଟା ଘଣ୍ଟା ମୋବାଇଲରେ ରିଲ୍ସ, ଫିଲ୍ମ, ୱେବସିରିଜ ଆଦି ଦେଖୁଛନ୍ତି । ହେଲେ ଆବଶ୍ୟକତାଠାରୁ ଅଧିକ ମୋବାଇଲ ବ୍ୟବହାର କରିବାର କୁଫଳ ରହିଛି । ଏହା ଶରୀରରେ ମାରାତ୍ମକ କର୍କଟ ରୋଗକୁ ନିମନ୍ତ୍ରଣ ଦେଇପାରେ ।
ଅତ୍ୟଧିକ ମୋବାଇଲ ବ୍ୟବହାର କଲେ ମଣିଷ ଶରୀର ଉପରେ କୁପ୍ରଭାବ ପଡ଼ିଥାଏ, ଯଦି ଆପଣ ଦିନକୁ ବହୁ ସମୟ ମୋବାଇଲରେ କାଟୁଛନ୍ତି । ଏହା ଶାରୀରିକ ଠାରୁ ମାନସିକ ସ୍ବାସ୍ଥ୍ୟ ଉପରେ ମଧ୍ୟ ପ୍ରଭାବ ପକାଏ ।
ଆପଣ ମାରାତ୍ମକ କ୍ୟାନ୍ସରକୁ ନିମନ୍ତ୍ରଣ କରୁନାହାନ୍ତି ତ ?
ବିଶ୍ବ ସ୍ବାସ୍ଥ୍ୟ ସଂଗଠନ (WHO)ର କହିବାନୁସାରେ ମୋବାଇଲ୍ ଫୋନ୍ ଦ୍ବାରା ନିର୍ଗତ ରେଡିଓ ଫ୍ରିକ୍ବେନ୍ସି ଶରୀର ପାଇଁ କ୍ଷତିକାରକ । ଏକ ଅଧ୍ୟୟନରୁ ଜଣାପଡିଛି ଯେ ଫୋନର ଦୀର୍ଘକାଳୀନ ବ୍ୟବହାର ଯୋଗୁଁ ମସ୍ତିଷ୍କ କର୍କଟ, ମୁଣ୍ଡ ଓ ବେକ କର୍କଟ ଏବଂ ଲ୍ୟୁକେମିଆର ଆଶଙ୍କା ବଢିପାରେ । ମୋବାଇଲ୍ ଫୋନରେ ଥିବା ରେଡିଓ ଫ୍ରିକ୍ବେନ୍ସି ଲୋକଙ୍କ ପାଇଁ କାର୍ସିନୋଜେନିକ୍ ବା କର୍କଟକୁ ନିମନ୍ତ୍ରଣ ଦେଇପାରେ ବୋଲି WHO କହିଛି ।
ସ୍ନାୟୁ ଜନିତ ରୋଗ:- ଖାଲି ସେତିକି ନୁହେଁ ମୋବାଇଲରୁ ବାହାରୁଥିବା ରେଡିଓ ଫ୍ରିକ୍ବେନ୍ସି ଯୋଗୁଁ ସ୍ନାୟୁ ଜନିତ ରୋଗ ମଧ୍ୟ ହୋଇପାରେ । ଯେପରିକି Alzheimer's (ସ୍ମୃତି ଶକ୍ତି ହ୍ରାସ ପାଇବା), Parkinson's (ମସ୍ତିଷ୍କ ଜନିତ ରୋଗ), ସ୍କ୍ଲେରୋସିସ ଆଦି ରୋଗ ହୋଇଥାଏ ।
ପ୍ରଜନନ ସମସ୍ୟା:- ମୋବାଇଲ ଫୋନ ପ୍ରଜନନ କ୍ଷମତା ଉପରେ ମଧ୍ୟ ପ୍ରଭାବ ପକାଇଥାଏ । ଏହାଦ୍ବାରା ମହିଳାଙ୍କ କ୍ଷେତ୍ରରେ ଗର୍ଭଧାରଣରେ ସମସ୍ୟା ହେଉଥିବା ବେଳେ ଗର୍ଭପାତ ମଧ୍ୟ ହୋଇଥାଏ । ସେହିପରି ମୋବାଇଲରୁ ବାହାରୁଥିବା ମାରାତ୍ମକ ରଶ୍ମି ପୁରୁଷଙ୍କ କ୍ଷେତ୍ରରେ ଶୁକ୍ରାଣୁ ହ୍ରାସ କରିଥାଏ । ଏପରିକି ଗର୍ଭରେ ଶିଶୁର ବିକାଶରେ ମଧ୍ୟ ପ୍ରଭାବ ପଡ଼ିଥାଏ ।
କଣ ଦେଖାଯାଏ ଶାରୀରିକ ସମସ୍ୟା:-
- ମୋବାଇଲ ଅତ୍ୟଧିକ ବ୍ୟବହାର କରିବା ଦ୍ବାରା ବେକ ଓ ଅଣ୍ଟାରେ ଯନ୍ତ୍ରଣା ହୋଇଥାଏ ।
- ମୋବାଇଲରୁ ବାହାରୁଥିବା ବ୍ଲୁ ଲାଇଟ୍ ଯୋଗୁଁ ଆଖିରେ ଯନ୍ତ୍ରଣା ହେବା ସହ ଦୃଷ୍ଟିଶକ୍ତି ହ୍ରାସ ପାଏ ।
- ମେଦ ବହୁଳତା ଓ କାର୍ଡିଓ ଭାସ୍କୁଲାର (ହୃତପିଣ୍ଡ ଜନିତ) ସମସ୍ୟା
- ନିଦରେ ସମସ୍ୟା ଓ ଥକ୍କା ଲାଗିବା
କଣ ଦେଖାଯାଏ ମାନସିକ ସମସ୍ୟା:-
- ସୋସିଆଲ ମିଡିଆ ଦ୍ବାରା ପ୍ରଭାବିତ ହୋଇ ଚାପଗ୍ରସ୍ତ ହେବା ଏବଂ ଚିନ୍ତା ବୃଦ୍ଧି
- କ୍ରମାଗତ ବିଭ୍ରାଟ ବା ଛୋଟ କାର୍ଯ୍ୟରେ ବି ଧ୍ୟାନର ଅଭାବ
- ଏକାକୀ ଲାଗିବା
- ଗୁରୁତ୍ବପୂର୍ଣ୍ଣ ଦାୟିତ୍ବ ଏବଂ ସମ୍ପର୍କକୁ ଅବହେଳା
ଏଥିରୁ କିପରି ବର୍ତ୍ତିବେ ?
'ଅତ୍ୟଧିକ ମୋବାଇଲ ଫୋନ ବ୍ୟବହାର କରିବା ହେଉଛି ଜନସ୍ବାସ୍ଥ୍ୟ ସଙ୍କଟ' ବୋଲି କହିଛନ୍ତି ସେଣ୍ଟର ଫର ଇଣ୍ଟରନେଟ ଆଣ୍ଡ ଟେକ୍ନୋଲୋଜି ଆଡିକ୍ସନର ସହ ପ୍ରତିଷ୍ଠାତା ଡକ୍ଟର ଡେଭିଡ ଗ୍ରୀନଫିଲ୍ଡ । ଏଣୁ ଆମକୁ ମୋବାଇଲ ବ୍ୟବହାର ଉପରେ କିଛି ପ୍ରତିବନ୍ଧକ ବା ଏକ ସୀମା ସ୍ଥିର କରିବା ଆବଶ୍ୟକ ।
- ମୋବାଇଲ ଫୋନ ବ୍ୟବହାର ନେଇ ଏକ ନିର୍ଦ୍ଦିଷ୍ଟ ସମୟ ବାଛନ୍ତୁ ।
- ନିଜକୁ ଅଧିକ ଶାରୀରିକ କାର୍ଯ୍ୟକଳାପ ଓ ବାହାର କାର୍ଯ୍ୟରେ ବ୍ୟସ୍ତ ରଖନ୍ତୁ ।
- ମାନସିକ ଶାନ୍ତି ଲାଗି ବ୍ୟାୟାମ ଓ ଧ୍ୟାନ ଭଳି ଯୋଗର ଅଭ୍ୟାସ କରନ୍ତୁ ।
