ଚାଷୀଙ୍କୁ ହଇରାଣ କଲେ କଡା କାର୍ଯ୍ୟାନୁଷ୍ଠାନ, ବୀମା କମ୍ପାନୀଙ୍କୁ ରାଜସ୍ୱ ମନ୍ତ୍ରୀଙ୍କ ଚେତାବନୀ

ଚାଷୀଙ୍କ ପ୍ରତି ସମ୍ବେଦନଶୀଳ ହୁଅନ୍ତୁ ବୀମା କମ୍ପାନୀ । ଟାଳଟୁଳ ନୀତି ଦେଖାଇଲେ ସରକାର ନେବେ କଡା ଆକ୍ସନ । ରୋକଠୋକ ଶୁଣାଇଦେଲେ ରାଜସ୍ବ ମନ୍ତ୍ରୀ ।

ଭୁବନେଶ୍ବର: ଅଦିନିଆ ବର୍ଷା, ବନ୍ୟା ଓ ବାତ୍ୟାରେ ଫସଲ ଉଜୁଡିଥିବା ସମୟରେ ବୀମା କମ୍ପାନୀମାନେ କୃଷକଙ୍କ ପ୍ରତି ସମ୍ବେଦନଶୀଳ ହେବା ଉଚିତ୍‌ । ଅମଳ ନଷ୍ଟ ସମୟ ବୀମା ଯୋଜନାର ଲାଭ ଉଠାଇବା ସମୟ ନୁହେଁ । ଯଦି କୌଣସି କମ୍ପାନୀ ସରକାରୀ ନିର୍ଦ୍ଦେଶାବଳୀ ବାହାରକୁ ଯାଇ ଚାଷୀଙ୍କ ପ୍ରତି ଟାଳଟୁଳ ନୀତି ଗ୍ରହଣ କରନ୍ତି, ତେବେ ସରକାର ମଧ୍ୟ ତାଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପଛାଇବେ ନାହିଁ । ବୀମା କମ୍ପାନୀଗୁଡିକୁ ଏପରି ଖୋଲା ଭାଷାରେ ଚେତାବନୀ ଦେଇଛନ୍ତି ରାଜସ୍ବ ମନ୍ତ୍ରୀ ସୁରେଶ ପୂଜାରୀ ।

• କ୍ଷୟକ୍ଷତି ରିପୋର୍ଟ ଆସିବା ପରେ ମୁଖ୍ୟମନ୍ତ୍ରୀଙ୍କୁ ଅବଗତ କରାଯିବ

ରାଜସ୍ବ ମନ୍ତ୍ରୀ ସୁରେଶ ପୂଜାରୀ କହିଛନ୍ତି,‘‘ ରାଜ୍ୟର ଅନେକ ସ୍ଥାନରେ ଫସଲ ନଷ୍ଟ ହୋଇଛି । ଯାହାଫଳରେ ମଣ୍ଡି ଖୋଲିବା ତାରିଖ ମଧ୍ୟ ଘୁଞ୍ଚାଇବାକୁ ବାଧ୍ୟ ହେବାକୁ ପଡୁଛି । ପରିସ୍ଥିତିକୁ ନଜରରେ ରଖି ପୁଣି ଥରେ ମଣ୍ଡି ଖୋଲିବା ସୂଚୀ ପ୍ରକାଶ ହେବ । ଲଗାତାର ବର୍ଷା ଯୋଗୁଁ ଏଯାଏଁ କ୍ଷୟକ୍ଷତି ଆକଳନ ହୋଇନି । କୃଷି ବିଭାଗ ସହ ଆଲୋଚନା ହୋଇଛି । ଏହି ପ୍ରକ୍ରିୟାରେ ସମବାୟ ବିଭାଗର ବି ଭୂମିକା ଅଛି । ଆସନ୍ତା 28 ତାରିଖରେ ରାଜସ୍ୱ, କୃଷି ଓ ସମବାୟ ବିଭାଗ ସହ ଅନ୍ୟ ବିଭାଗ ବୈଠକ ରହିଛି । କ୍ଷୟକ୍ଷତି ରିପୋର୍ଟ ଆସିବା ପରେ ସ୍ଥିତି ନେଇ ମୁଖ୍ୟମନ୍ତ୍ରୀଙ୍କୁ ଅବଗତ କରାଯିବ । ଯଦି କି’ଏ ସର୍ଭେରୁ ବାଦ ପଡ଼ିଥିବେ, ତାହେଲେ ରାଜସ୍ବ ବିଭାଗ ନିକଟରେ ଅଭିଯୋଗ ବି କରିପାରିବେ । ସରକାର ଅତିସମ୍ବେଦନଶୀଳତା ସହ ସ୍ଥିତି ଉପରେ ନଜର ରଖିଛନ୍ତି । ମନ୍ତ୍ରୀ-ବିଧାୟକମାନେ ଗ୍ରାଉଣ୍ଡରେ ଅଛନ୍ତି । ଚାଷୀଙ୍କ ସମସ୍ୟାର ସମାଧାନ ପାଇଁ ମୋହନ ସରକାର ଅତି ସମ୍ବେଦନଶୀଳ ।’’

• ଲାଭଖୋର ମନବୃତ୍ତି ନୁହେଁ ବରଂ ଚାଷୀଙ୍କ ପ୍ରତି ସମ୍ବେଦନଶୀଳ ହୁଅ:- ରାଜସ୍ବ ମନ୍ତ୍ରୀ

ଫସଲବୀମା ନେଇ ବୀମା କମ୍ପାନୀଙ୍କୁ ରାଜସ୍ୱ ମନ୍ତ୍ରୀଙ୍କ କଡା ଚେତାବନୀ ଦେଇଛନ୍ତି । କହିଛନ୍ତି,‘‘ ଚାଷୀଙ୍କୁ ହଇରାଣ କଲେ କିମ୍ବା ଟାଳଟୁଳ ନୀତି ଗ୍ରହଣ କଲେ କଡା ଆକ୍ସନ ନେବେ ସରକାର । ଫସଲବୀମା ନିୟମ କମ୍ପାନୀ ଲାଭ ପାଇଁ ନୁହେଁ । ଏସମୟରେ ବୀମା କମ୍ପାନୀମାନେ ଚାଷୀଙ୍କ ପ୍ରତି ସମ୍ବେଦନଶୀଳ ହେବା ଉଚିତ୍‌ । 24 ତାରିଖ ଯାଏ 20 ହଜାରରୁ ଅଧିକ ଚାଷୀ ବୀମା ପାଇଁ ଆବେଦନ କରି ସାରିଲେଣି । ସେମାନଙ୍କୁ ବୀମା ପ୍ରଦାନ ନେଇ ବୀମା କମ୍ପାନୀ ଗୁଡିକ ଆଇନ୍‌ ଅନୁଯାୟୀ କାମ କରିବା ଦରକାର । ପୂର୍ବ ଭଳି ଆଇନ ବାହାରକୁ ଯିବାକୁ ଚେଷ୍ଟା କଲେ ସରକାରଙ୍କ ପାଖରେ ବହୁତ ଅସ୍ତ୍ର ଅଛି ସେମାନଙ୍କୁ ଲାଇନକୁ ଆଣିବାକୁ ।’’

• FAQ ମାନ କୋହଳ ସମ୍ପର୍କରେ ଜିଲ୍ଲାପାଳ ନିଷ୍ପତ୍ତି ନେବେ: ଯୋଗାଣ ମନ୍ତ୍ରୀ

ସେହିପରି ଯୋଗାଣ ମନ୍ତ୍ରୀ କୃଷ୍ଣ ପାତ୍ର କହିଛନ୍ତି,‘‘ FAQ ମାନ ଉପରେ ସମ୍ପୂର୍ଣ୍ଣ ବୁଝାମଣା କରିହେବନି । କାହିଁକି ନା ‘ଏଫସିଆଇ’ ଚାଉଳ ନେବନି । ଫଳରେ ତାହା ପଡିରହି ନଷ୍ଟ ହେବ । ଏହି ପ୍ରକ୍ରିୟାରେ କେତେ କୋହଳ କରିହେବ, ସେ ସମ୍ପର୍କରେ ଜିଲ୍ଲାପାଳମାନେ ନିଷ୍ପତ୍ତି ନେବେ । ଯେଉଁମାନଙ୍କର କ୍ଷତି ହୋଇଛି, ସେମାନେ କ୍ଷତିପୂରଣ ପାଇବେ । ଜିଲ୍ଲାପାଳମାନଙ୍କୁ ରିପୋର୍ଟ ଦେବାକୁ ନିର୍ଦ୍ଦେଶ ଦିଆଯାଇଛି । FAQ ମାନରେ ସ୍ଥିତି ଦେଖି ଯଥାସମ୍ଭବ କୋହଳ କରନ୍ତୁ, କିନ୍ତୁ ଚାଷୀଙ୍କୁ ଫେରାନ୍ତୁ ନାହିଁ । ଧାନ ପୂରା ନଷ୍ଟ ହେଇଥିଲେ ନେଇ ହେବନି । ଜିଲ୍ଲା ସ୍ତରରେ ଚାଷୀ, ମିଲର, ପ୍ରଶାସନ ମିଳିତ ଭାବେ ଏନେଇ ନିଷ୍ପତ୍ତି ନେବେ ।’’

ଇଟିଭି ଭାରତ, ଭୁବନେଶ୍ବର