ପୁରୀ: ପୁଣି ଭାଇରାଲ୍ ହେଲା ଶ୍ରୀମନ୍ଦିର ଭିତର ବେଢା଼ର ଫଟୋ । ଶ୍ରୀମନ୍ଦିର ଭିତରେ ଫଟୋ ଉଠାଇ ସୋସିଆଲ ମିଡିଆରେ ଭାଇରାଲ୍ କରିଛନ୍ତି ଜଣେ ଯୁବକ । ଗୌରବ କୁମାର ସାହୁ ନାମକ ଜଣେ ଯୁବକ ନିଜ ସୋସିଆଲ ମିଡିଆରେ ଫଟୋ ଭାଇରାଲ୍ କରିଛନ୍ତି । ସୁରକ୍ଷା ବ୍ୟବସ୍ଥାକୁ ନେଇ ଉଠିଲା ପୁଣି ପ୍ରଶ୍ନ । ତେବେ ଏହି ଘଟଣା ଜଣାପଡିବା ପରେ ଭକ୍ତ ଓ ସେବାୟତ ମହଲରେ ଅସନ୍ତୋଷ ପ୍ରକାଶ ପାଇଛି ।
ଏହି ଫଟୋ ସୋସିଆଲ ମିଡିଆରେ ଘୁରି ବୁଲୁଥିବା ବେଳେ ପୋଲିସର କୌଣସି ପ୍ରତିକ୍ରିୟା ମିଳି ପାରିନାହିଁ । ଶ୍ରୀମନ୍ଦିରକୁ ପ୍ରବେଶ କରୁଥିବା ଭକ୍ତଙ୍କୁ ସଠିକ୍ ଭାବରେ ଯାଞ୍ଚ କରିବାକୁ ଦାବି ହୋଇଛି । ଏହା ପୂର୍ବରୁ ମଧ୍ୟ ଅନେକ ଥର ଶ୍ରୀମନ୍ଦିର ଭିତର ଫଟୋ ଭାଇରାଲ ହୋଇଛି । ହେଲେ ପୋଲିସ୍ କିଛି ବି କାର୍ଯ୍ୟାନୁଷ୍ଠାନ ନେଇ ପାରିନାହିଁ ।
- କ’ଣ ରହିଛି ନିୟମ ?
ସୁରକ୍ଷା ଦୃଷ୍ଟିରୁ ଶ୍ରୀମନ୍ଦିର ଭିତରକୁ ମୋବାଇଲ ନେବା ସମ୍ପୂର୍ଣ୍ଣ ନିଷେଧ ରହିଛି । ଭକ୍ତ, ପୋଲିସ୍ କର୍ମଚାରୀ, ଶ୍ରୀମନ୍ଦିର ପ୍ରଶାସନ କର୍ମଚାରୀ ଏବଂ ସେବାୟତଙ୍କ ପାଇଁ ମୋବାଇଲ ନେବା ଉପରେ ପ୍ରତିବନ୍ଧକ ରହିଛି । ହେଲେ କିଛି କ୍ଷେତ୍ରରେ ସେବାୟତ, ପୋଲିସ୍ ଓ ଶ୍ରୀମନ୍ଦିର ପ୍ରଶାସନ କର୍ମଚାରୀମାନେ ଏହି ନିୟମ ମାନୁନଥିବା ଦେଖିବାକୁ ମିଳୁଛି । ଫଳରେ ଅନେକ ଭକ୍ତ ଏମାନଙ୍କ ସହଯୋଗରେ ମନ୍ଦିର ଭିତରକୁ ମୋବାଇଲ ନେବାର ସୁଯୋଗ ପାଉଛନ୍ତି । ଅନେକ ସମୟରେ ଫଟୋ ଉଠାଇ ସୋସିଆଲ ମିଡ଼ିଆରେ ଅପଲୋଡ଼ ମଧ୍ୟ କରୁଛନ୍ତି ।
- ଧରାପଡିଲେ କ’ଣ ଦଣ୍ଡ ?
ଶ୍ରୀମନ୍ଦିର ଭିତରକୁ ଭକ୍ତଙ୍କ ପାଇଁ ମୋବାଇଲ୍ ନେବା ନିଷେଧ ଥିବା ବେଳେ ଧରାପଡିଲେ ଏକ ହଜାର ଟଙ୍କା ଜରିମାନା ସହ ମୋବାଇଲ ଜବତ ହେବାର ନିୟମ ରହିଛି । ହେଲେ ଭକ୍ତଙ୍କ ପାଇଁ ଏହି କଟକଣା ଥିବା ବେଳେ, ଏହି କଟକଣା ସେବାୟତ,ପୋଲିସ୍ ଓ ଶ୍ରୀମନ୍ଦିର କର୍ମଚାରୀ ମାନୁ ନାହାନ୍ତି । ଯାହା ଫଳରେ ବାରମ୍ବାର ଶ୍ରୀମନ୍ଦିରର ଭିତର ଫଟୋ ଭାଇରାଲ୍ ହେଉଥିବା ବେଳେ ଶ୍ରୀମନ୍ଦିରର ସୁରକ୍ଷା ବିପଦକୁ ଠେଲି ହୋଇଯାଇଛି । ରାଜ୍ୟ ସରକାର ଶ୍ରୀମନ୍ଦିରର ସୁରକ୍ଷା ପାଇଁ ଶ୍ରୀମନ୍ଦିର ଭିତରକୁ ମୋବାଇଲ ନେବା କଟକଣାକୁ କଡାକଡି କାର୍ଯ୍ୟକାରୀ କରିବାକୁ ସାଧାରଣରେ ଦାବି ହୋଇଛି ।
- ପୂର୍ବରୁ ବି ଭାଇରାଲ ହୋଇଛି ଫଟୋ
ଗତବର୍ଷ ଜୁଲାଇରେ ଶ୍ରୀମନ୍ଦିର ଭିତର ଫଟୋ ସୋସିଆଲ ମିଡିଆରେ ଭାଇରାଲ ହୋଇଥିଲା । ନିଖିଲ ଗିରି ନାମକ ଜଣେ ଯୁବକ ଶ୍ରୀମନ୍ଦିର ଭିତରେ ଫଟୋ ଉଠାଇ ନିଜ ଇନଷ୍ଟାଗ୍ରାମ ଆକାଉଣ୍ଟରେ ଅପଲୋଡ଼ କରିଥିଲେ । ଶ୍ରୀମନ୍ଦିର ଆନନ୍ଦ ବଜାରର ପ୍ରବେଶ ପଥରେ ଏହି ଫୋଟୋ ଉଠା ଯାଇଥିବା ବେଳେ ଶ୍ରୀମନ୍ଦିରର ସମ୍ପୂର୍ଣ୍ଣ ଦୃଶ୍ୟ ନଜରକୁ ଆସିଥିଲା ।
ସେହିବର୍ଷ ଫେବୃଆରୀ ମାସରେ ଶ୍ରୀମନ୍ଦିରର ଭିତର ବେଢ଼ା ଫଟୋ ସୋସିଆଲ ମିଡିଆରେ ପୁଣି ଭାଇରାଲ୍ ହୋଇଥିଲା । ଭାଇରାଲ ଫଟୋରେ ସତ୍ୟନାରାୟଣ ମନ୍ଦିରଠାରୁ ଭିତର ବେଢ଼ା ଏବଂ ବଟବୃକ୍ଷ ସହିତ ଅନ୍ୟ ମନ୍ଦିର ସ୍ପଷ୍ଟ ଦୃଶ୍ୟମାନ ହୋଇଥିଲା । ତେବେ ଏହି ଫଟୋକୁ ଜନି ଦତ୍ତ ନାମକ ଜଣେ ଯୁବକ ନିଜ ଇନ୍ଷ୍ଟଗ୍ରାମ୍ରେ ପୋଷ୍ଟ କରିଥିଲେ । ଏହାକୁ ସେବାୟତ ଓ ଭକ୍ତ ମହଲରେ ନିନ୍ଦା କରାଯାଇଥିଲା ।
ଇଟିଭି ଭାରତ, ପୁରୀ
