ବ୍ରହ୍ମପୁର: ପ୍ରତି ଦୁଇ ବର୍ଷକୁ ଥରେ ଆୟୋଜିତ ହେଉଥିବା ଗଞ୍ଜାମ ଜିଲ୍ଲା ଛତ୍ରପୁରର ଅଧିଷ୍ଠାତ୍ରୀ ଦେବୀ ମା' ରାମାୟାଣାମ୍ମାଙ୍କ ଯାତ୍ରା ଆରମ୍ଭ ହୋଇଯାଇଛି । ଗତକାଲି (ବୁଧବାର) ମା'ଙ୍କ ଘଟ ପରିକ୍ରମା ହୋଇଛି । ଘଟ ପରିକ୍ରମାର ପ୍ରଥମ ଦିନରେ ମୁଖ୍ୟ ଘଟ ସହିତ ସମସ୍ତ ପାର୍ଶ୍ବ ଘଟ ବିରାଟ ପଟୁଆରରେ ରିକାପଲ୍ଲୀଠାରେ ପହଞ୍ଚିବା ପରେ ପରମ୍ପରା ଅନୁଯାୟୀ ପ୍ରଥମେ ରାଜଭୋଗ କରାଯାଇଥିଲା । ରିକାପଲ୍ଲୀ ସ୍ଥିତ ସ୍ୱର୍ଗୀୟ ୱାଇ. କାମରାଜୁଙ୍କ ଘରକୁ ଯାଇ ରାଜଭୋଗ ଗ୍ରହଣ କରିଥିଲେ ମାଆ । ଏହି ପ୍ରସିଦ୍ଧ ରାମାୟାଣାମ୍ମା ଯାତ୍ରା ଛତ୍ରପୁରରେ ଏକ ମାସ ଧରି ଆୟୋଜିତ ହେବ ।
ମା' ରାମାୟାଣାମ୍ମା ଠାକୁରାଣୀଙ୍କ ଯାତ୍ରାର ଘଟ ପରିକ୍ରମାର ପ୍ରଥମ ଦିନରେ ମା' ନିଜ ବାପ ଘର କୁହାଯାଉଥିବା ଅସ୍ଥାୟୀ ମନ୍ଦିରରୁ ବାହାରିବା ପରେ ରିକାପଲ୍ଲୀ ସ୍ଥିତ ସ୍ୱର୍ଗୀୟ ୱାଇ. କାମରାଜୁଙ୍କ ଘରକୁ ଯାଇଥିଲେ । ସେଠାରେ ମା'ଙ୍କ ନିକଟରେ ରାଜଭୋଗ ଲାଗି ହୋଇଥିଲା । ବ୍ରହ୍ମପୁରର ବୁଢ଼ୀ ଠାକୁରାଣୀ ଯାତ୍ରାର ଗୋଟିଏ ବର୍ଷ ଅବଧି ପରେ ମା' ରାମାୟାଣାମ୍ମାଙ୍କ ଏହି ଯାତ୍ରା ହେଉଥିବାବେଳେ ମା' ଅସ୍ଥାୟୀ ମଣ୍ଡପରେ ଭକ୍ତଙ୍କୁ ଦର୍ଶନ ଦେଇଥିଲେ । ଏହି ଘଟ ଦର୍ଶନ କରିବା ପାଇଁ ଛତ୍ରପୁର ସହର ଏବଂ ଆଖପାଖ ଅଞ୍ଚଳର ବହୁ ଭକ୍ତ ଭିଡ ଜମାଉଥିବା ଦେଖିବାକୁ ମିଳୁଛି ।
ଏହା ମଧ୍ୟ ପଢନ୍ତୁ: ପ୍ରସିଦ୍ଧା ମାଇପି ମେଳା, ଯେଉଁଠି ଗୁହାରିଆ ପଡିଲେ ମାନସିକ ହୁଏ ପୂରଣ ! - Maipi Mela 2024
ଏହି ଯାତ୍ରାକୁ ସୁରୁଖୁରରେ ସମ୍ପାଦନ କରିବା ପାଇଁ ପୋଲିସ ପ୍ରଶାସନ ପକ୍ଷରୁ ବ୍ୟାପକ ସୁରକ୍ଷା ବନ୍ଦୋବସ୍ତ କରାଯାଇଛି । ଗତକାଲି ମା'ଙ୍କ ଘଟ ପରିକ୍ରମା ସମୟରେ ପୋଲିସ, ମନ୍ଦିର ସେବାୟତ, କମିଟି ସଦସ୍ୟମାନେ ଉପସ୍ଥିତ ଥିଲେ । ଏହା ବ୍ୟତୀତ ପିଲାଙ୍କ ମନୋରଞ୍ଜନ ପାଇଁ ଆସନ୍ତା ଆସନ୍ତା ୧୨ ତାରିଖରୁ ଯାତ୍ରାରେ ରାମଦୋଳି, ମୀନା ବଜାର ସମେତ ବିଭିନ୍ନ କାର୍ଯ୍ୟକ୍ରମ ଆୟୋଜନ କରାଯିବ ବୋଲି ଯାତ୍ରା କମିଟି ପକ୍ଷରୁ ସୂଚନା ଦିଆଯାଇଛି । ସମସ୍ତ କାର୍ଯ୍ୟକ୍ରମ ପରିଚାଳନାରେ ଯାତ୍ରା କମିଟି ପରିଚାଳକ ସି.ଏଚ ଦୟାନନ୍ଦ ରେଡ୍ଡୀ, ଆସିଷ୍ଟାଣ୍ଡ ପରିଚାଳକ ସମରେନ୍ଦ୍ର ନାପତି, କୋଷାଧ୍ଯକ୍ଷ ପି. ରାଜୁ ରେଡ୍ଡୀ ଏବଂ ସମସ୍ତ କମିଟି ସଦସ୍ୟ, ସ୍ୱେଚ୍ଛାସେବୀ ଏବଂ ସ୍ଥାନୀୟ ବାସିନ୍ଦାମାନେ ସହଯୋଗ କରୁଛନ୍ତି । ଏକ ମାସ ଧରି ଏହି ଯାତ୍ରା ଚାଲିବ ।
ଇଟିଭି ଭାରତ, ବ୍ରହ୍ମପୁର
