ବାଲେଶ୍ୱର: ରଙ୍ଗ ବେରଙ୍ଗର ଭଳିକି ଭଳି ଲାଖ ଚୁ଼ଡି । ଯାହାକୁ ଦେଖିଲେ କିଣିବା ପାଇଁ ମନ ହେବ । ଏହି ପୁରାତନ କାଳର ଏହି ଚୁଡି ଏବେବି ସମସ୍ତଙ୍କ ବେଶ ପସନ୍ଦ । ବାଲେଶ୍ୱର ଜିଲ୍ଲାର ନୀଳଗିରି ଅଞ୍ଚଳର ଅନେକ ମହିଳାଙ୍କୁ ରୋଜଗାର ଯୋଗାଇଛି ଏହି ଲାଖ ଚୁଡି ।
- ଲାଖ ଚୁଡିର ଚାହିଦା
ଆଜିର ଅତ୍ୟାଧୁନିକ ଯୁଗରେ ବି ଅନେକ କିଛି ଏମିତି ଜିନିଷର ଚାହିଦା ରହିଛି ଯାହା ରୋଜଗାର ଦେବା ସହ ଲୋକଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି । ପୁରାତନ କାଳରେ ବ୍ୟବହାର ହେଉଥିବା ଅନେକ ଜିନିଷ ଏବେ ହଜିହଜି ଆସୁଥିବା ବେଳେ କିଛି ମହିଳାଙ୍କ ପ୍ରଚେଷ୍ଠା ଯୋଗୁଁ ସେସବୁ ପୁରୁଣା ଜିନିଷ ପୁଣି ଆଦୃତ ଲାଭ କରିଛି । ସେମିତି ଏକ ଜିନିଷ ହେଉଛି ଲାଖରେ ତିଆରି ଚୁଡ଼ି ଓ ସାମଗ୍ରୀ । ଏହାକୁ ତିଆରି କରିବା ଯେତିକି କଷ୍ଟକର, ଏହା ସେତିକି ଲୋକାଦୃତ ମଧ୍ୟ । ଯେଉଁଥିପାଇଁ ଏହାକୁ ତିଆରି କରୁଥିବା କାରିଗରମାନେ ବେଶ୍ ଦୁଇ ପଇସା ରୋଜଗାର କରି ପାରୁଛନ୍ତି ।
ଜଣେ କି ଦୁଇଜଣ ନୁହେଁ ବରଂ ଏକାଧିକ ମହିଳା ଲାଖରେ ଚୁଡ଼ି ତିଆରି କରି ହୋଇ ପାରିଛନ୍ତି ରୋଜଗାରକ୍ଷମ । ବାଲେଶ୍ୱର ଜିଲ୍ଲା ନୀଳଗିରି ତରତରି ଅଞ୍ଚଳର ଅନେକ ମହିଳା ଏବେ ଲାଖରେ ତିଆରି ଚୁଡ଼ି ବାହାର ରାଜ୍ୟକୁ ପଠାଇବା ସହ ଅନଲାଇନ ଜରିଆରେ ମଧ୍ୟ ବ୍ୟବସାୟ କରି ଭଲ ପଇସା ରୋଜଗାର କରିପାରୁଛନ୍ତି । ଲାଖରେ ତିଆରି ଚୁଡ଼ି ସମେତ ଅନ୍ୟାନ୍ୟ ଜିନିଷର ସମ୍ଭାର ନେଇ ମହିଳାମାନେ ବାଲେଶ୍ୱର ପଲିଶ୍ରୀ ମେଳାରେ ପସରା ମେଲାଇଛନ୍ତି ।
- ରୋଜଗାର ଦେଇଛି ଲାଖ ଚୁଡି
ଲାଖ କାରିଗର ସୋହାଲି ମୁର୍ମୁ କହିଛନ୍ତି," ଲାଖ ଚାଷ କରାଯାଉଛି, ସେଥିରୁ ଆମେ ସଂଗ୍ରହ କରି ଲାଖ ଚୁଡ଼ି ତିଆରି କରୁଛୁ । ଆମର 30 ଜଣ ମହିଳା ଅଛନ୍ତି, ଆମେସବୁ ମିଶିକି ଲାଖ ଚୁଡ଼ି ତିଆରି କରୁଛୁ । ଏମିତି ମେଳାରେ ଯେଉଁଠି ଷ୍ଟଲ ପଡ଼େ ଆମେ ନେଇକି ଯାଉ । ଆମେ ଆଟିଡିଏରୁ ତାଲିମ ନେଇ ଲାଖ ଚୁଡ଼ି ତିଆରି କରିବା ଶିଖିଛୁ । ଆମେ 30 ଜଣ ଚୁଡ଼ି ତିଆରି କରୁଛୁ । ଲାଖ ଉପରେ ପଥର ଲଗାଯାଇ ଡିଜାଇନ କରାଯାଉଛି । ପାଖାପାଖି 20ରୁ 30 ପ୍ରକାର ଡିଜାଇନର ଚୁଡ଼ି ତିଆରି କରୁଛୁ । ଚୁଡି ବ୍ୟତୀତ ପେନଷ୍ଟାଣ୍ଡ, ପେପର ୱେଟ, ଗହଣା ସେଟ୍ ସବୁ ତିଆରି କରୁଛୁ । ଆମେ ଯେମିତି ଅର୍ଡର ପାଉଛୁ ସେମିତି ବି ତିଆରି କରିଦେଉଛୁ ।
ଏହାମଧ୍ୟ ପଢନ୍ତୁ... ଆରମ୍ଭ ହେଲା ଜାତୀୟସ୍ତରୀୟ ପଲ୍ଲିଶ୍ରୀ ମେଳା, ଝଲସୁଛି ମହିଳାଙ୍କ ହାତତିଆରି ସାମଗ୍ରୀ ବଲାଙ୍ଗୀରରେ ପ୍ରସିଦ୍ଧ ଲାଖ ବିନ୍ଧା ପର୍ବ ଅନୁଷ୍ଠିତ, ଲକ୍ଷ୍ୟ ଭେଦ କଲେ କନକ ବର୍ଦ୍ଧନ ସିଂହଦେଓ |
ଓଡ଼ିଶା ବାହାରେ ବି ରହିଛି ଲାଖ ଚୁଡିର ଚାହିଦା
ସେ ଆଉମଧ୍ୟ କହିଛନ୍ତି," ଓଡିଶା ବାହାରକୁ ବି ଆମେ ଚୁଡ଼ି ପଠାଉଛୁ । ଅନଲାଇନରେ ବି ଆମେ ଆମ ଜିନିଷ ବିକ୍ରି କରୁଛୁ । ଆମେ ମାସକୁ 5ରୁ 7 ହଜାର ଟଙ୍କା ରୋଜଗାର କରି ପାରୁଛୁ । ଘରେ ବସିକି ଆମେ କାମ କରି ପାରୁଛୁ, ସେଇଥିରେ ଆମେ ଘର ଚଳେଇ ପାରୁଛୁ, ପିଲା ପାଠ ବି ପଢୁଛନ୍ତି ।"
ଇଟିଭି ଭାରତ, ବାଲେଶ୍ୱର
