ରାଇରଙ୍ଗପୁର: ଶେଷରେ ନରହନ୍ତା ଦନ୍ତାହାତୀକୁ ବନବିଭାଗ କାବୁ କରିବାରେ ସଫଳ ହୋଇଛି । ମୟୂରଭଞ୍ଜ ଜିଲ୍ଲାର ବାରିପଦା ବନଖଣ୍ଡ ତଥା ବାରିପଦା ରେଞ୍ଜ ଅଧୀନ ବୁଢିଖମାରୀ ସଂରକ୍ଷିତ ଜଙ୍ଗଲରେ ୭ ଘଣ୍ଟା ପରିଶ୍ରମ କରି ଶେଷରେ ବନବିଭାଗ ଦନ୍ତାହାତୀକୁ ଟ୍ରାଙ୍କୁଲାଇଜ କରିବା ପରେ କ୍ରେନ ଦ୍ବାରା ହାଇଓ୍ବାରେ ବାନ୍ଧି ତାକୁ ରାତିରେ କପିଳାଶ ଜଙ୍ଗଲ ଅଭିମୁଖେ ନିଆଯାଇଛି । ଏନେଇ ସୂଚନା ଦେଇଛନ୍ତି ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପର ଭାରପ୍ରାପ୍ତ ଅଧିକାରୀ ଡ.ପ୍ରକାଶ ଚାନ୍ଦ ଗୋଗିନାନୀ । ସେଠାକାର ଚିଡିଆଖାନାରେ ହିଂସ୍ର ବନ୍ୟପ୍ରାଣୀଙ୍କ ଚିକିତ୍ସା ସୁବିଧା ଥିବାରୁ ପିସିସିଏଫ (PCCF)ଙ୍କ ନିର୍ଦ୍ଦେଶରେ ଦନ୍ତାହାତୀକୁ ସ୍ଥାନାନ୍ତର କରାଯାଇଛି । ହାତୀ ସହିତ ଅଭିଜ୍ଞ ବନ ଅଧିକାରୀ, ପ୍ରାଣୀ ଚିକିତ୍ସକ, ଆସାମର ୪ଜଣ ତାଲିମପ୍ରାପ୍ତ ମାହୁନ୍ତ ଓ କର୍ମଚାରୀ ଯାଇଛନ୍ତି ।
ନରହନ୍ତା ଦନ୍ତା ଆକ୍ରମଣରେ ୪ଜଣଙ୍କ ମୃତ୍ୟୁ:
ନରହନ୍ତା ଦନ୍ତା ଆକ୍ରମଣରେ ବିଗତ ତିନିଦିନରେ ୪ଜଣଙ୍କ ମୃତ୍ୟୁ ଓ ୩ ଗୁରୁତର ଆହତ ଘଟଣା ବନବିଭାଗ ପାଇଁ ମଧ୍ୟ ଅଡୁଆ ସ୍ଥିତି ସୃଷ୍ଟି କରିଥିଲା । ପ୍ରଥମେ ଶୁଳିଆପଦା ଥାନା ଅନ୍ତର୍ଗତ ପାକଟିଆ ସୋନପୁରିଆ ଗ୍ରାମର ରଘୁନାଥ ହେମ୍ବ୍ରମ ହାତୀ ଆକ୍ରମଣରେ ମୃତ୍ୟୁବରଣ କରିଥିବାବେଳେ ଦୁଇ ଜଣ ଗୁରୁତର ଆହତ ହୋଇଥିଲେ । ଗୁରୁତର ଆହତଙ୍କ ମଧ୍ୟରୁ ଜଣେ ତାଡକି ଗ୍ରାମର ସର୍ବେଶ୍ଵର ସିଂ ଚିକିତ୍ସାଧିନ ଅବସ୍ଥାରେ ମୃତ୍ୟୁବରଣ କରିଥିଲେ । ସେହିପରି ଗତ ମଙ୍ଗଳବାର ସକାଳ ସମୟରେ ଦନ୍ତାହାତୀ ଆକ୍ରମଣରେ ମୋରୋଡା ଥାନା ଅନ୍ତର୍ଗତ ଉଲିଡିହି ଗ୍ରାମର ତୁରାମ ହେମ୍ବ୍ରମଙ୍କ ସ୍ତ୍ରୀ ସାକ୍ରା ହେମ୍ବ୍ରମଙ୍କ ମୃତ୍ୟୁ ଘଟିଥିଲା ।
ଶୋଇଥିବା ସମୟରେ ପାଦରେ ଦଳିଲା ଦନ୍ତା :
ପରେ ବେତନଟୀ ରେଞ୍ଜରେ ପ୍ରବେଶ କରି ଦନ୍ତାହାତୀଟି ଆଣୁଆ ଗ୍ରାମର ସୁଗା ମହାନ୍ତଙ୍କୁ ଆକ୍ରମଣ କରିବାରୁ ସୁଗା ମହାନ୍ତଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ଚିକିତ୍ସା ପାଇଁ ପିଆରଏମ ମେଡିକାଲ କଲେଜରେ ଭର୍ତ୍ତି କରାଯାଇଥିଲା । ସେହିପରି ଗତ ବୁଧବାର ବିଳମ୍ବିତ ରାତିରେ ଅର୍ଥାତ୍ ଗୁରୁବାର ଭୋର ତିନିଟା ପାଖାପାଖି ବାରିପଦା ରେଞ୍ଜ ଅନ୍ତର୍ଗତ ରାଧିକାଶୋଳ ଗ୍ରାମରେ ତିନି ଚାରୋଟି ଘର ଭାଙ୍ଗିବା ସହ ସୀତାରାମ ହାଁସଦା ଓ ତାଙ୍କ ସ୍ତ୍ରୀ ମାନକା ହାଁସଦା ଶୋଇଥିବା ସମୟରେ ମାନକାକୁ ହାତୀଟି ପାଦରେ ଦଳି ଦେଇଥିଲା। ଫଳରେ ଘଟଣାସ୍ଥଳରେ ହିଁ ମାନକାଙ୍କ ମୃତ୍ୟୁ ଘଟିଥିବା ବେଳେ ଅଳ୍ପକେ ତାଙ୍କ ସ୍ବାମୀ ବର୍ତ୍ତି ଯାଇଥିଲେ ।
କପିଳାଶ ଜଙ୍ଗଲକୁ ଗଲା ନରହନ୍ତା ଦନ୍ତା:
ଅମାନିଆ ଦନ୍ତାହାତୀଟି ଶିମିଳିପାଳରୁ ପଶ୍ଚିମବଙ୍ଗ ଯାଇଥିବା ବେଳେ ସେଠାକାର ଜନସାଧାରଣ ନିଆଁ ହୁଳା ଫିଙ୍ଗିବା ସହିତ ତତଲା ଲୁହା ରଡରେ ଚେଙ୍କ ଦେବା ଓ ଡାଇନାମା ଦ୍ବାରା ବିଦ୍ୟୁତ ତାର ଚାର୍ଜ କରି ଆଘାତ ଦେବା ଭଳି ଜଘନ୍ୟକାଣ୍ଡ ଭିଆଇବା ପରେ ଦନ୍ତା ହାତୀଟି ହିଂସ୍ର ହୋଇ ଉପରୋକ୍ତ ଘଟଣା ଭିଆଇଥିବା ବନବିଭାଗ ପକ୍ଷରୁ ସୂଚନା ମିଳିଛି । ଏନେଇ ଗୁରୁବାର ବନବିଭାଗ ପକ୍ଷରୁ ସ୍ଵତନ୍ତ୍ର ବୈଠକ ବସିବା ପରେ ହାତୀକୁ ଆୟତ୍ତ କରି ସ୍ବଭାବ ପରିବର୍ତ୍ତନ ନିଷ୍ପତ୍ତି ନିଆଯାଇଥିଲା । ଟ୍ରାଙ୍କୁଲାଇଜ କରି ତାକୁ କାବୁ କରି ସ୍ଥାନାନ୍ତର ନିଷ୍ପତ୍ତି ନିଆଯାଇଥିଲା। ତଦନୁଯାୟୀ ଗତ ରାତିରେ ଦନ୍ତାକୁ କାବୁ କରାଯାଇଥିଲା । ଟ୍ରାଙ୍କୁଲାଇଜ କରିବା ପରେ କ୍ରେନ ଦ୍ବାରା ହାଇଓ୍ବାରେ ବାନ୍ଧି ତାକୁ ରାତିରେ କପିଳାଶ ଜଙ୍ଗଲ ଅଭିମୁଖେ ନିଆଯାଇଛି ।
ଇଟିଭି ଭାରତ,ମୟୂରଭଞ୍ଜ
